1 Reta zha kuu nyelaaz lee Jesús nak Crist, zhiinn Diox nak zhaʼa. Ne reta zha kuu nke leettsoo Xutaa Diox, noga nke leettsoo zha xgann Xutaa Diox. 2 Ne leettsa nke leettsooʼaa Diox ne nzhonaa diiz lo Diox, noga neʼaa nke leettsooʼaa re zhiinn Diox, 3 tak lee zha kuu nke leettsoo Diox, nzhon zha diiz xkiiz Diox; ne lee kuu nabee Diox nagte thib kuu nagan gon zha diiz, 4 ne reta zha kuu nak zhiinn Diox, ntsow zha gan lo re kuu went kuu nzo lo yezlyu ree; ne ntsow zha gan lo re kuu went, tak nyelaaz zha Jesucrist. 5 Loka zha kuu nyelaaz lee Jesús nak Xgann Diox, zhaʼa ntsow gan lo re kuu went kuu nzo lo yezlyu ree.

6 Lee Jesucrist myaad lo yezlyu ree kon nit ne kon ren; ne nagte beeta kon nit, sinke myaad Jesucrist kon nit ne kon ren. Ne Mbi Nayon nak kuu ndaa kwente, tak lee Mbi Nayon nak kuu wli. 7 Ne tson kuu nak kuu ndaa kwente: 8 Mbi Nayon, nit ne ren; ne thibka kuu ni re yon koree. 9 Ne os leeʼaa nyelaazaa kuu mbez re men; masraa ndoblo yelaazaa kuu ni Diox, tak mas nataak kuu ni Diox, ne lee Diox mndaa kwent chaan Xgann Diox. 10 Ne loka zha kuu nyelaaz Xgann Diox, ndaa Diox kwent chaan Xgann Diox lo zha. Per lee zha kuu nyelaazt Xgann Diox, nto zha Diox taxal zha kuu nkedi, tak nyelaazt zha kuu ndaa Diox kwent chaan Xgann Diox. 11 Ne kuu ndaa Diox kwent nak: Ndaa Diox yalnaban kuu thitanax loʼaa, ne Xgann Diox ndaa yalnabana. 12 Ne lee zha kuu nyelaaz Xgann Diox, nkeno zha yalnaban kuu thitanax; per lee zha kuu nyelaazt Xgann Diox, nkenot zha yalnaban kuu thitanax.

13 Ngekeen re koree lo goo, zha kuu nyelaaz Xgann Diox, tsa ne goo nap goo yalnaban kuu thitanax.

14 Ne kon dib ndroo leettsooʼaa neʼaa ton Diox xkiizaa, os leeʼaa naabaa thib kuu lo Diox taxal nlaaz Diox, tataa Diozhe. 15 Ne os neʼaa lee Diox nzhon kuu naabaa lo Diox, noga neʼaa tekayaaʼaa re kuu naabaa lo Diox.

16 Os lee thib goo ne goo lee thib zha kuu nyelaaz Jesús ndaa thib falt, kuu ndanote zha lo yalguth, ndoblo naab goo lo Diox por zhaʼa, tsa taa Diox yalnaban lo zha, os leey nake thib falt kuu ndanot zha lo yalguth. Tak nzo falt kuu ndano zha lo yalguth, ne nitʼn ndoblo naab goo lo Diox por falta. 17 Reta kuu went nak falt; per nzo falt kuu ndanot zha lo yalguth.

18 Noga neʼaa reta zha kuu nak zhiinn Diox, ntsowt raa zha kuu went; tak zhiinn Diox nak zha, ne lee Xgann Diox nkenap zha, ne yent kwan tak tsow Maxuuy lo zha. 19 Ne wen neʼaa nakaa zhiinn Diox, ne reta men kuu nzi dib naxta lo yezlyu kuu nyelaazt Diox, nzo lo yalnabee chaan Maxuuy. 20 Noga wen neʼaa lee Xgann Diox myaad mndaa yalnzhaak loʼaa, tsa yenaa ne lebeeʼaa, Zha kuu wlipaa nak. Ne thibka nakaa kon Diox por Xgann Diox, kuu nak Jesucrist. Ne lee Jesucrist nak Diox kuu wlipaa, ne ndaa Jesucrist yalnaban kuu thitanax loʼaa. 21 Re goo zha kuu ndakʼn taxal zhiinn na, kenap goo goo ne yelaazt goo re kuu wlit nak Diox.

¡Tbaa gake!