1 Per lee Mbi Nayon chaan Diox kwathoz nambi ne: Lee re wiz bluz, nzo zha laa yelaazt raa zha Diox. Ne gon zha re kuu nloo re mbi kuu nkedi, ne teke zha dits re yalkedi kuu nloo Maxuuy. 2 Ne yo re zha kuu kedi kuu ntsowt kuu ni. Re zha kuu ngok nad xgab ne nloot raa kuu wli lo xgab zha. 3 Re zha ree tyalt zha tseya re men, ne neeka tyalt zha wu re men re kuu mtaan Diox par wu re men. Per lee re zha kuu nyelaaz Jesús, re zha kuu nlebee kuu wli, ndoblo zha wu zhay ne taa zha texkix lo Diox leettsa wu zhay. 4 Tak reta kuu mdexkwaa Diox wen nak, ne reta kuu mndaa Diox ndoblot gab men went nake, os ndaa reʼaa texkix lo Diox or nkayaa re leey, 5 tak lee xkiiz Diox ne kuu ndedizaa lo Diox ntsow nzhak nambiy.

6 Os leeʼa teteeda re zha kuu nyelaaz Jesús re koree, tsasi gaka thib mos wen chaan Jesucrist. Tsa gak neya lo Diox tak nyelaaza xkiiz Jesucrist, ne tekeʼa dits re diiz wen kuu wli kuu mloo zha loʼa. 7 Ne yelaazta re kwent gox kuu nyelaaz re men yezlyu ree, kuu ntegan yek re men. Ne thib bloo yeka bteke dits kuu wli, kuu nak ban men taxal nlaaz Diox. 8 Tak lutta ntsow rtsin jersis chaan kwerp yezlyu ree, per lee thib ko men yek men ban men taxal nlaaz Diox, konasi nataak lo yalnaban ree ne lo tedib yalnabana. 9 Diiz ree si wli, ne reta men ndoblo yelaaze. 10 Kona nkeʼaa tsiin ne ndriidaa yalti, tak nyelaazaa Diox kuu naban ne ngebetaa zha, tak lee zha telaa retalee kuu nyelaaz zha.

11 Re koree ndoblo nabeeʼa ne looʼa. 12 Taata diiz gab neeka thib men leeʼa nataagta, tak ndyeena; sinke ndoblo looʼa lo re zha kuu nyelaaz Jesús, leeʼa nali naka lo re kuu ndediza, ne lo re kuu ntsowa, ne xa nke leettsooʼa tabena, ne xa nyelaaza Jesucrist ne xa nambi ndoʼa lo Diox. 13 Thibka bloo yeka laba xkiiz Diox, bteni re zha, ne bteteed re zha kwent chaan Jesucrist asta leettsa tsin na. 14 Thibka bloo yeka blortsin re kuu nataak kuu mndelaaz Diox loʼa, leettsa mxoob re zha gol yaa zha yeka, ne mndaa zha kwent kuu nzhab Diox lo zha kwent chaana.

15 Thib bloo yeka ne btsow re koree, tsa reta zha ne naa xa ndezhena lo kwent chaan Diox. 16 Bkenapa leeka lu, ne ndoblo neʼa naa kwan looʼa, ne thib bloo yeka bana taxal nake. Os leeʼa tsowa koree, tsowa gan yalnaban kuu thitanax ne noga reta zha kuu gon diiz re kuu niʼa.