2
Xibá dxiʼa le ral-laʼ usë́diruʼ
1 Naʼa, ral-laʼ guʼu didzaʼ le röjlö́z xibá dxiʼa.
2 Busedi yuguʼ bönniʼ gula:
Bitiʼ ral-laʼ ilë́ʼajëʼ.
Ral-laʼ iláquiëʼ baʼa ladxiʼ, en bönniʼ taʼyéajniʼinëʼ.
Ral-laʼ gaca idú ca taʼyéajlëʼë Cristo.
Ral-laʼ ilaʼdxíʼinëʼ luzáʼagaquiëʼ, en ilaʼbözëʼ zxön ladxiʼ.
3 Busedi yuguʼ nigula gula:
Ilunnu le raza ládxëʼë Dios.
Cabí ilaʼnnënu que luzáʼagacanu, en cabí ilë́ʼajnu.
Ral-laʼ uluʼsédinu le naca dxiʼa.
4 Ral-laʼ uluʼsédinuʼ nigula niʼ yúʼugacanu iz cuidiʼ
para ilaʼdxíʼinu bönniʼ que queë́gacanu, encaʼ zxíʼinigacanu.
5 Ral-laʼ ilácanu nigula taʼyéajniʼinu, en nigula dxiʼa ladxiʼ.
Ral-laʼ ilún chíʼinu le dë lídxigacanu, en ilácanu dxiʼa.
Ral-laʼ ilunnu bal bönniʼ que queë́gacanu.
Ral-laʼ cabí bi ilunnu le güíʼi lataj nu innë́ ziʼ que xtídzëʼë Dios.
6 Busedi yuguʼ bönniʼ niʼ nacuʼë iz cuidiʼ:
Ral-laʼ ilácagaquiëʼ bönniʼ taʼyéajniʼinëʼ.
7 Ral-laʼ gúnticaʼsuʼ le naca dxiʼa,
uluíʼinuʼ bönachi caní ca ral-laʼ ilúngaca.
Ca rusédinuʼ ral-laʼ uluíʼi nacuʼ idú ladxiʼ, en baʼa ladxiʼ.
8 Ral-laʼ usédinuʼ didzaʼ dxiʼa le cabí gaca nu bi innë́ que.
Caní gunuʼ ga utuíʼinëʼ bönniʼ ridáʼbaguëʼë,
en bitiʼ gaca bi innë́ʼ queë́liʼ runliʼ le ruáʼ döʼ.
9 Busedi bö́chiʼruʼ niʼ taʼyéajlëʼë Cristo, en nadóʼogaquiëʼ:
Ral-laʼ ilaʼcuʼë nöxaj lógaquiëʼ xángaquiëʼ.
Ral-laʼ ilunëʼ yúguʼtë le ilaʼyaza ládxiʼgaquiëʼ xángaquiëʼ.
Bitiʼ ral-laʼ táʼbagaʼgaquiëʼ le taʼnná bëʼë.
10 Bitiʼ bi uluʼcáchiʼlanëʼ.
Ral-laʼ uluʼluíʼi cuíngaquiëʼ tsahuiʼ ca naca yúguʼtë le tunëʼ.
Caní uluíʼi lo naca dxiʼa xibá queëʼ Dios, Nu busölá rëʼu.
11 Cristo, bönniʼ naʼ buzáʼ ládxëʼë Dios queë́ruʼ chibuluíʼi lahuëʼ lógaca yúguʼtë bönachi para uluʼlágaca. 12 Lëʼ rusédinëʼ rëʼu ucáʼanaruʼ le cabí raza ládxëʼë Dios, en cabí së ládxiʼruʼ le naca que yödzölió ni, pero cö́zaruʼ zxön ladxiʼ, en gácaruʼ tsahuiʼ dza ni zóaruʼ naʼa, en gunruʼ ca rë́ʼëni quézinëʼ Dios. 13 Ral-laʼ cö́zaruʼ le runruʼ löza le gun ga gácaruʼ bicaʼ ba, lë naʼ gaca dza niʼ cateʼ uluíʼi lahuëʼ Jesucristo lu beníʼ idú queëʼ. Náquiëʼ Dios zxön, Nu rusölá rëʼu. 14 Lë cazëʼ budödi cuinëʼ uláz queë́ruʼ, para böáʼuëʼ rëʼu lu yúguʼtë le naca xihuiʼ, ateʼ ruúnëʼ rëʼu tsahuiʼ para gácaruʼ bönachi queëʼ, en güíʼi ládxiʼruʼ gunruʼ le naca dxiʼa.
15 Yuguʼ lë ni bëʼ didzaʼ, en guchiza icja nágagaca bönachi niʼ, ateʼ len yöl-laʼ unná bëʼ gudil-la léguequi. Bénticaʼsö caní, para cabí siʼ lataj nu ucáʼana cáʼasö xtídzuʼu.