2 XAMUEW
1
Amo umume'u Xau imàno haw Tuwihaw Tawi pe
1 Xau imàno re Amarek ywy rehe har wazuka re uzewyr Tawi wà Zikirak tawhu pe a'e kury. Umumaw mokoz 'ar a'e pe wiko pà. 2 Iku'egwer pe uhem amo kwàkwàmo Xau rehe we arer wà iker haw wi a'e kury. A'e 'ym mehe umu'i ukamir uzemumikahy haw hexak kar pà a'e. Umuhàmuhàz ywy ku'i kwer uwàkàg rehe no. Ur Tawi heko haw pe kury. Wapyk upenàràg rehe ywy rehe uwa imuhyk pà, tuwihawete imuwete haw hexak kar pà izupe. 3 Na'e upuranu Tawi hehe kury. — Ma'e wi erezur, i'i izupe. — Azur Izaew wapytu'u awer wi ihe, i'i izupe.
4 — Emume'u ma'e uzeapo ma'e kwer ihewe kury, i'i Tawi izupe. — Zauxiapekwer Xau rehe we arer a'e wà, uzàn oho zeàmàtyry'ymawhu wi a'e wà. Piri ywy rehe har uzuka Izaew tetea'u wà. Xau umàno a'e. Ta'yr Zonata umàno a'e no, i'i izupe.
5 — Màràzàwe tuwe erekwaw Xau Zonata hehe we izuka awer ne, i'i Tawi izupe.
6 Uwazar kwàkwàmo ize'eg izupe nezewe. — Ahem e ywytyr Zimoa her ma'e pe ihe. Aexak Xau upurukutukaw rehe uzekok mehe ihe. Piri ywy rehe har waiwyramawa rehe har wà, kawaru waku'az har wà no, uhem Xau huwake wà. 7 Na'e uwak Xau herenoz pà a'e kury. — Aiko xe ihe, hezar, a'e izupe. 8 — Mo romo ereiko ne, i'i Xau ihewe. — Amarek izuapyr romo aiko ihe, a'e izupe. 9 — Hekutuk tuwe Piri ywy rehe har a'e wà. Àmàno etea'i kury. Ezur xe hezuka pà kury, i'i ihewe. 10 A'e rupi azeupir i'àmaw pe izuka pà na'arewahy ihe kury. — Tàrityka'i u'ar putar ywy rehe kury. A'e mehe umàno putar kury, a'e hezeupe. A'e rupi azuka. A'e rupi anuhem iàkàg rehe har tàtà ma'e iàkàg wi kury. Anuhem ipoapyw ku'aw har izuwi newe herur pà ihe kury, i'i izupe.
11 Na'e Tawi umu'i ukamir uzemumikahy haw hexak kar pà kury. Zauxiapekwer hehe we har paw uzapo izàwegatete a'e wà no. 12 Uzai'o wà. Uzegar uzemumikahy haw rehe wà. Uzekwaku umai'u 'ym pà wà no. Xo kwarahy heixe etea'i mehe zo umumaw wà. Uzai'o Xau imàno awer rehe wà, Zonata rehe wà no, Izaew Tupàn Tuweharupi Wiko Ma'e hemiruze'eg wanehe wà no, ta'e umàno teko tetea'u zeàmàtyry'ymawhu pe wà xe.
13 Na'e upuranu Tawi kwàkwàmo a'e uzeapo ma'e kwer imume'u arer rehe kury. — Ma'e pe nereko haw ne, i'i izupe. — Amarek izuapyr romo aiko ihe. Aiko xe neywy rehe ihe kury, i'i izupe.
14 Màràzàwe tuwe nerekyze kwaw Tupàn Tuweharupi Wiko Ma'e hemixak kwer izuka mehe ne, i'i izupe.
15 Na'e wenoz pitài awa uzehe we har imuwà kury. — Ezuka ko kwàkwàmo ty, i'i izupe. Ukutuk a'e awa kwàkwàmo kury, izuka pà kury. 16 Na'e uze'eg wi Tawi a'e Amarek zuapyr pe kury. — Ne ae erezezuka kar ihewe ne. Ta'e erezuka tuwihawete Tupàn hemixak kwer ne xe. Ta'e eremume'u izuka awer ihewe ne xe, i'i izupe.
Uzai'o Tawi Xau rehe, Zonata rehe kury
17 Na'e uzegar Tawi Xau imàno awer rehe Zonata imàno awer rehe kury. 18 — Pemu'e Zuta ko zegar haw rehe pe wà nehe, i'i wemiruze'eg wanupe. Amo umuapyk ko zegar haw pape azeharomoete har her ma'e rehe a'e.
19 Na'aw izegar awer xe kury.
— Zaneruwihaw umàno ywytyr Izaew ywy rehe har rehe wà kury.
Zauxiapekwer ikàg wera'u ma'e zanerehe we har u'ar a'e wà.
20 Pemume'u zo wamàno awer Kat tawhu pe nehe.
Pemume'u zo wamàno awer Akerom tawhu myter pe nehe.
Nezewe mehe kuzàgwer Piri ywy rehe har nahurywete kwaw wà nehe.
Nezewe mehe tupàn a'ua'u wamuwete har wazyr
nuzemomor kwaw urywete haw rehe wà nehe.
21 Tuwe àmàn nukyr kwaw Zimoa ywytyr rehe nehe.
Tuwe zuwiri nuhem kwaw a'e pe nehe.
Tuwe nahezuz kwaw ma'e ko a'e pe har wanupe nehe.
Ta'e ywy ku'i kwer upyk zauxiapekwer ipuruzukaiwahy ma'e u'yw wi wazemimaw a'e wà xe.
Ta'e Xau u'yw wi izemimaw naheny kwaw a'e pe a'e kury xe.
22 Zonata uzuka zauxiapekwer tetea'u uzywyrapar pupe a'e wà.
Xau itakihepuku nuzawy kwaw waàmàtyry'ymar wazuka mehe a'e.
Weityk ikàg ma'e wà. Uzuka wàmàtyry'ymar wà no.
23 Xau a'e, Zonata a'e no, ikatuahy teko wanupe a'e wà. Ipuràg eteahy wà, ikatuahy wà.
Upyta uzehe we wikuwe mehe wà. Wiko uzehezehe we umàno mehe wà no.
Uzàn wera'u wiràhu wanuwi wà. Ikàg wera'u zàwàruhu iriàw wanuwi wà no.
24 Kuzàgwer Izaew izuapyapyr wà, pezai'o Xau rehe nehe.
Umur Xau topoz ipuràg eteahy ma'e àràpuhàràn hawer ipiràg ma'e iapo pyrer peme a'e.
Pemupuràg eteahy kar itazu or pupe.
25 Zauxiapekwer ikàg wera'u ma'e u'ar zeàmàtyry'ymawhu pe umàno pà a'e wà.
Umàno Zonata ywytyr rehe a'e.
26 Azai'o teko nerehe, Zonata herywyr.
Uruamutar katu ihe.
Heamutar katu pe ne no.
Heamutar katu awer ikatuahy ihewe.
Amo kuzà heamutar a'e wà.
Zonata heamutar haw ikatu wera'u kuzà heamutar haw wi a'e.
27 Zauxiapekwer ikàg wera'u ma'e u'ar wà.
Watakihepuku upytu'u wà kury, wapurukutukaw upytu'u wà no,
i'i Tawi uzegar pà.