IZAI
1
1 Tupàn Tuweharupi Wiko Ma'e umume'u amo uze'eg Izai Amoz ta'yr pe a'e, Uzi tuwihawete romo heko mehe a'e, Zotàw tuwihawete romo heko mehe a'e no, Akaz tuwihawete romo heko mehe a'e no, Ezeki tuwihawete romo heko mehe a'e no. Zuta ywy rehe har wanuwihawete romo wanekon wà. Na'aw Tupàn Tuweharupi Wiko Ma'e ize'eg Zuta rehe har Zeruzarez rehe har xe ko pape rehe kury.
Tupàn uze'eg Izaew wanemiapo kwer ikatu 'ym ma'e rehe kury
2 Pezeapyaka katu nehe, o ywak.
Peme'egatu nehe, o ywy,
ta'e Tupàn Tuweharupi Wiko Ma'e uze'eg a'e xe.
Uze'eg nezewe a'e.
— Amuzehu kar hera'yr ihe wà. Azekaiw wanehe.
Nezewe rehe we uzeapo heàmàtyry'ymar romo wà.
3 Tapi'ak ukwaw uzar.
Zumen izar umuapyk hemi'u ràm imono izupe. Zumen ukwaw imuapyk àwàm a'e.
Heremiaihu nukwaw kwaw ma'e wà.
Teko Izaew izuapyapyr nukwaw pixik kwaw ma'e wà, i'i Tupàn.
4 Kwa, iaiw a'e teko ikatu 'ym ma'e wà.
Tynehem wemiapo kwer ikatu 'ym ma'e pupe wà.
Iaiw upaw rupi wà.
Iaiw ma'e iapo haw ikatu wanupe upaw rupi.
Utyryk Tupàn Tuweharupi Wiko Ma'e wi wà.
Weityk Tupàn Ikatuahy Ma'e Izaew wazar wà.
Weruwak ukupe kwer izupe wà.
5 Màràzàwe tuwe pezapo wiwi ikatu 'ym ma'e peiko.
Aipo peputar wera'u penehe Tupàn izepyk àwàm.
Heta peperew peàkàg rehe.
Upaw rupi pezemumikahy.
6 Peàkàg wi te pepy rehe,
penetekwer paw rehe heta pepetek awer.
Heta tetea'u pekixi awer. Heta tetea'u peperew huwy ma'e no.
Ni amo nuhez kwaw pekixi awer wà, peperew wà.
Ni amo nomono kwaw pàn xig ma'e peperew rehe wà iwànaw romo wà. Ni amo numukatu kwaw uri kawer pupe wà.
7 Peywy iaiw.
Tata umumaw tawhu peneko haw wà.
Penenataromo amo ywy rehe har
umuaiw peywy wà.
Naheta kwaw ikatu ma'e a'e ywy rehe kury.
Amo ywy rehe har umumaw peywy wà.
8 Xo Zeruzarez zo numumaw kwaw wà.
Nuzawy kwaw uwà rehe ume'egatu ma'e hàpuzràn uwà tyw myter pe har.
Nuzawy kwaw tàpuz pixika'i ma'e zàràkàxihu zàwenugar tyw myter pe har.
Nuzawy kwaw tawhu. A'e pe har wàmàtyry'ymar umàmàn tawhu iwyr wà.
9 Aze mo Tupàn Tuweharupi Wiko Ma'e Ikàg Wera'u Ma'e
numuigo kar iwer mo amo a'e pe har wà,
nuzawy iwer mo Xotom tawhu kwehe arer.
Zaiko mo tawhu Komor imumaw pyrer kwehe arer ài.
10 Pe tuwihaw Zeruzarez pe har wà,
pezeapyaka katu Tupàn Tuweharupi Wiko Ma'e ze'eg rehe nehe.
Pe tawhu pe har wà,
pezekaiw katu zanezar ipurumu'e haw rehe nehe.
11 Nezewe uze'eg Tupàn Tuweharupi Wiko Ma'e.
— Naputar kwaw ma'ea'yr tetea'u wazuka haw hemuwete haw romo ihe.
Tuweharupi pezuka ma'ea'yr herenataromo pe wà.
Uhyk àràpuhàrànete ihewe wà. Uhyk ma'ea'yr ikyra katu ma'e ihewe wà.
Uhyk ma'ea'yr hapy pyr ihewe wà.
Hehuhuk wer tapi'aka'yr hexak mehe ihe.
Naputar kwaw àràpuhàràn hawitu ma'e ihe wà kury. Naputar kwaw àràpuhàrànete ihe wà kury.
12 Herenataromo pezur mehe nehe,
mo uzapo kar a'e ma'e paw peme.
Mo uzapo kar a'e ma'e heràpuzuhu izywyr katu haw pe.
13 Aze perur ma'e ihewe nehe, napurumuawyze kwaw ihe nehe.
Yhyk hyàkwegatu ma'e herenataromo penemiapy a'e, iro ihewe a'e.
Pepynykawhu zahy pyahu mehe har iroahy ihewe wà. Mynykaw mytu'u haw 'ar mehe har iro ihewe wà.
Amogwer mynykaw iro ihewe wà no, ta'e penemiapo kwer ikatu 'ym ma'e umumaw a'e ma'e herenataromo har iapo pyr upaw rupi a'e xe.
Amogwer 'ar rehe nahemuwete kwaw pe.
14 Mynykaw zahy pyahu mehe har a'e, amo 'ar imonokatu pyr mehe har a'e wà no,
hehuhuk wer wanexak mehe ihe.
Hekene'ogatu wanexak ire.
15 Pepo hupir mehe ihewe peze'eg mehe,
name'e kwaw penehe nehe.
Pepuner ihewe peze'eg tetea'u haw rehe nehe.
Nezewe rehe we napeinu kwaw nehe,
ta'e penemiapo kwer ikatu 'ym ma'e pemuigo kar ipo ipiw ma'e ài a'e xe.
16 Pezahak peho pezemukatu pà nehe.
Pekatu 'ymaw na'ikatu kwaw ihewe.
Pepytu'u ikatu 'ym ma'e iapo re nehe.
17 Pezemu'e ikatu ma'e iapo haw rehe nehe.
Pereko katu amogwer pe wà nehe.
Pepytywà teko ma'e hereko 'ymar wà nehe.
Pezekaiw kwarer tu 'ym ma'e wà nehe, kuzàtài ihy 'ym ma'e wà nehe.
Pepyro kuzà imen umàno ma'e kwer katu 'ymaw wi pe wà nehe, i'i Tupàn Tuweharupi Wiko Ma'e.
18 Nezewe uze'eg Tupàn Tuweharupi Wiko Ma'e.
— Pezur xe nehe. Zaze'eg putar zanezeupeupe ko ma'e rehe nehe.
Penemiapo kwer ikatu 'ym ma'e nuzawy kwaw pemupinipinimaw ipiràg ma'e. Zawaiw katu imuhem kar haw.
Ipiràg ipihun wewer a'e.
Nezewe rehe we ihe apumukatu putar uzahak ma'e ài ihe nehe.
Pekatu haw nuzawy kwaw amanezu ixigatu haw nehe.
Pekatu haw nuzawy kwaw àràpuhàràn hawitu ma'e hawer ipuez re nehe.
19 Aze peiko wiko wera'u 'ym ma'e ài nehe, aze hereruzar pe nehe,
pe'u putar ma'e ywy wi hezuz ma'e ikatu ma'e nehe.
20 Aze peiko hereruzar 'ymar romo nehe, aze peiko wiwi heze'eg heruzar 'ymar romo nehe, aze hereityk pe nehe,
zauxiapekwer pezuka putar zeàmàtyry'ymawhu pe wà nehe.
Ihe, Tupàn Tuweharupi Wiko Ma'e ihe, aze'eg kwez ihe kury, i'i Tupàn Tuweharupi Wiko Ma'e.
Purupyro haw, zepykaw no
21 Amo 'ar rehe Zeruzarez tawhu pe har weruzar katu Tupàn a'e wà.
Ko 'ar rehe nuzawy kwaw kuzàwyzài wà.
Amo 'ar rehe heta tetea'u teko ikatu ma'e iapo har a'e pe wà, imunar 'ym ma'e wà.
Ko 'ar rehe xo puruzuka ma'e zo upyta a'e pe wà kury.
22 Zeruzarez, amo 'ar rehe ereiko parat ikatuahy ma'e ài ne.
Ko 'ar rehe ereiko heityk pyrer ài kury.
Ko 'ar 'ym mehe ereiko win ikatu wera'u ma'e ài.
Ko 'ar rehe ereiko win 'y inuromo imupyràn pyrer ài.
23 Tuwihaw wiko iaiw ma'e romo wà.
Uzemuryparypar ma'e rehe imunar ma'e wanehe we wà.
Tuweharupi teko omono temetarer a'e tuwihaw wanupe wà. Omono ma'e wanupe wà no.
Nezewe mehe tuwihaw numume'u kwaw a'e teko wanehe uzepyk àwàm wà.
Nuzekaiw kwaw tu 'ym ma'e wanehe wà.
Na'ima'enukwaw kwaw kuzà imen umàno ma'e kwer ma'erahy wanemipuraraw rehe wà.
24 A'e rupi, pezeapyaka katu Zanezar ize'eg mehe nehe. Tupàn Tuweharupi Wiko Ma'e Ikàg Wera'u Ma'e romo Izaew wazar Ikàg Ma'e romo hekon a'e.
Nezewe uze'eg wemiaihu wanupe.
— Azepyk putar penehe nehe, heàmàtyry'ymar wà.
Amekuzar putar penemiapo kwer ikatu 'ym ma'e peme nehe.
25 Hekwahy haw rupi azepyk putar penehe nehe.
Xo nezewe mehe zo pekatuahy putar nehe.
Peiko putar itaper tata pupe imukatu pyrer ài nehe.
26 Amono putar tuwihaw kwehe arer zàwenugar peme ihe wà nehe.
Amono putar pureruze'eg ma'e ikatu ma'e kwehe arer zàwenugar peme ihe wà nehe no.
A'e rupi teko uze'eg putar nezewe Zeruzarez pe wà nehe, — Tawhu ikatu haw heta haw, i'i putar izupe wà nehe. — Tawhu Tupàn rehe zeruzar haw heta haw, i'i putar izupe wà nehe, i'i Tupàn.
27 Tupàn Ikatuahy Ma'e upyro putar Xiàw a'e nehe. Upyro putar upaw rupi a'e pe wiko ma'e wà,
aze uzemumikahy wemiapo kwer rehe Tupàn henataromo wà nehe.
28 Umumaw putar ize'eg heruzar 'ymar paw wà nehe, ikatu 'ym ma'e iapo har paw wà nehe no.
Umumaw putar uzewi utyryk ma'e paw wà nehe no.
29 A'e 'ar mehe pemaranugar putar ywyra penemimuwete wanuwake har wanehe nehe.
Kwehe mehe ikatuahy a'e ywyra peme wà.
Pezapo ma'etymaw tupàn a'ua'u penemimuwete waiwyr.
Ikatuahy peme. Amo 'ar mehe pepytu'u putar hehe pezeruzar ire nehe.
30 Peiko putar ywyra huwer uxinig ma'e kwer ài nehe,
ma'e 'yw imuàkym pyr 'ym ài nehe.
31 Teko upuner ma'e nuzawy kwaw ka'a uxinig ma'e wà.
Wanemiapo kwer nuzawy kwaw tata pirik ma'e.
Tata umumaw putar a'e upuner ma'e a'e wà nehe, wanemiapo kwer inuinuromo a'e wà nehe.
Naheta kwaw wapyro àràm wanupe wà nehe.