1 Izo uze'eg putar a'e nehe kury.

2 Aze mo apuner hezewyr haw rehe hereko awer pe.

Tupàn uzekaiw katu herehe a'e 'ar mehe.

3 A'e 'ar rehe Tupàn wexak kar herape ràm ihewe. Nuzawy kwaw tatainy ihewe.

A'e rupi apuner ipytun mehe heata haw rehe.

4 A'e 'ar rehe hekàg hema'eahy 'ym pà. Tupàn wiko hemyrypar romo a'e.

Hemyrypar romo heko haw wiko heràpuz rehe uzekaiw katu ma'e romo.

5 Tupàn upuner wera'u ma'e wiko herehe we a'e.

Hera'yr wiko heywyr wà.

6 Heta tapi'ak kamykwer heràpuz me tuweharupi. Uhyk urewe.

Heta ma'e ikawer uri ita wamyter pe hezuz ma'e kwer wi henuhem pyrer no.

7 Tàmuz wazemono'ogaw pe heho mehe,

Apyk tenà'àg wamytepe.

8 Kwàkwàmo uwàpytymawok heho àwàm herexak mehe wà.

Tua'uhez ma'e upu'àm herexak mehe wà no.

9 Teko ikàg wera'u ma'e upytu'u uze'eg ire wà.

Nuze'eg kwaw ta'e akwaw wanuwake ihe xe.

10 Tuwihaw upytu'u uze'eg ire wà no.

Numume'u kwaw amo ma'e wà.

11 Heze'eg henu arer umume'u heze'eg awer ikatu haw ihewe wà.

Herexak arer uze'egatu herehe wà no.

12 Ta'e apytywà hemetarer 'ym ma'e ihe wà xe, aze wenoz upytywà haw ihewe wà.

Azekaiw katu tu 'ym ma'e wanehe no, aze naheta kwaw wanehe uzekaiw ma'e.

13 Teko ma'e hereko 'ymar umur uze'egatu herehe wà.

Kuzà imen umàno ma'e kwer hurywete wà, ta'e apytywà ihe wà xe.

14 Hekatu haw ihe, hemunar 'ymaw ihe no, amunehew kamir ài ihe.

Nuzawy kwaw hekamir tuweharupi har ihewe.

15 Aiko teha romo hehàpyhà 'ym ma'e wanupe.

Aiko pe romo wata 'ym ma'e wanupe no.

16 Aiko hemetarer 'ym ma'e wanu romo.

Aiko amo ywy rehe arer wapyro har romo no.

17 Amumaw imunar ma'e wapuner haw.

Apyro wanemipyhyk kwer wà no, wapoàpe wi wà no.

18 Nezewe aze'eg hezeupe. — Amumaw putar kwarahy tetea'u ihe nehe.

Àmàno putar heràpuz me katu haw inuromo nehe.

19 Aiko putar ywyra ài ihe nehe, hapo 'y pe uhem ma'e ài nehe.

Tuweharupi zuwiri umuàkym ywyra pyhaw. Aiko ywyra zàwe ihe.

20 Teko paw uze'egatu herehe wà. Nuexak kwaw katu 'ymaw herehe wà. Tuweharupi hekàg putar nehe.

Hepuruapo wer ma'e tetea'u rehe nehe, a'e hezeupe a'e mehe.

21 Teko paw ume'e herehe wà.

Wenu hepureruze'egaw uze'eg 'ym pà wà.

22 — Neremu'em, ni'i kwaw ni pitài teko heze'eg pawire wà.

Heze'eg wixe waàkàg pupe.

Nuzawy kwaw 'y ywyxiguhu rehe upiripirik ma'e.

23 Teko wàrogatu àmàn kwarahy haku mehe wà.

Nezewegatete paw rupi wàrogatu heze'eg wà.

24 Àro kar ma'e ma'e hàro 'ymar wanupe ihe.

Herurywete ihe, a'e rupi heruwa umukàg kar teko wà.

25 Aiko wanuwihaw ài.

Aiko tuwihaw teko wanemiapo ràm imume'u har ài.

Aiko tuwihawete zauxiapekwer wanenataromo har ài wanupe no.

Ma'erahy ipuraraw mehe amurywete kar ihe wà.