4
Cara idop yang bekin sanáng Tuhan Allah pung hati
1 Jadi bagini, sodara dong! Botong kokoe sang bosong, ko biar bosong idop bekin sanáng Tuhan Allah pung hati, sama ke botong su ajar sang bosong. Memang bosong su idop iko itu samua, ma tagal kotong ni su jadi Tuhan Yesus pung kelu, botong minta ko bosong usaha lebe kuat lai.
2 Bosong samua su tau apa yang botong ajar kasi bosong tu, pake Tuhan Yesus pung kuasa.
3 Tuhan Allah pung mau bagini: idop barisi! Jang idop kotor. Andia, jang maen serong deng orang yang bukan lu pung laki, ko, lu pung bini.
4 Bosong musti tau ator bosong pung diri sandiri, ko idop barisi, sampe orang dong hormat sang bosong.
5 Jang idop iko bosong pung hawa nafsu, sama ke orang yang sonde kanál sang Tuhan Allah.
6 Jang ada orang yang mau ame ontong, deng mau maen serong deng orang yang sama-sama parcaya sang Tuhan Allah. Te Tuhan tu, Bos yang nanti balas samua yang jahat bagitu. Ini samua botong su kasi tau sang bosong ulang-ulang, deng su kasi inga memang dari dolu.
7 Te Tuhan Allah su pange ame sang kotong, ko jadi Dia pung orang. Dia pung maksud tu, kotong musti idop barisi, bukan idop kamomos, sama ke tukang hohongge dong. Bukan bagitu!
8 Tagal itu, orang yang sonde mau iko ini ajaran, dia bukan cuma tola sang botong sa, ma dia ju tola sang Tuhan Allah, yang su kasi datang Dia pung Roh yang Barisi sang bosong.
9 Beta rasa beta sonde usa tulis ulang lai kasi bosong so'al basayang sodara deng sodara, tagal Tuhan Allah sandiri su ajar, bilang, bosong musti basayang satu deng satu.
10 Botong su dapa dengar bosong sayang deng samua sodara yang ada di propinsi Makedonia situ. Ma sodara dong, é! Sakarang botong minta ko bosong lebe sayang lai sang orang laen.
11 Usaha ko bosong bisa idop deng tanáng. Jang tasosok deng orang laen dong pung urusan, ma satu-satu urus dia pung urusan sandiri. Bosong musti karjá ko cari makan deng tangan sandiri. Jang baharap deng orang laen. Ini botong su kasi inga memang sang bosong dari dolu.
12 Kalo bosong idop bagitu, bosong su sonde bekin barát orang laen. Nanti orang yang sonde parcaya sang Kristus dapa lia bosong pung idop bagitu, dong pasti bilang, “We! Memang itu orang yang iko sang Tuhan Yesus tu, dong idop lurus batúl, ó!”
So'al Tuhan Yesus pung datang kambali
13 Naa! Sakarang, sodara samua, beta mau kasi tau satu hal, ko biar bosong tau batúl-batúl so'al orang mati. Kotong tau, bilang, orang mati dong nanti idop kambali. Jadi, kalo ada dari Tuhan Yesus pung orang yang mati, na, bosong jang bekin diri susa, sama ke orang laen dong yang sonde mangarti itu hal.
14 Te kotong su tau, bilang, Yesus mati, abis Tuhan Allah kasi idop kambali sang Dia. Naa! Kalo bagitu, tantu Tuhan Allah ju kasi idop kambali samua orang mati yang su parcaya, deng kumpul ame sang dong sama-sama deng Tuhan Yesus.
15-17 Te kalo Tuhan Yesus datang kambali, Dia mau turun dari sorga datang di bumi, nanti ada suara parenta yang karás. Ais ana bua di sorga dong pung kapala kasi parenta ko tiop tarompet. Tarús Tuhan pung orang yang su mati dong idop kambali. Ais dong, deng kotong yang masi idop ni, ta'angka nae pi di awan ko sama-sama sambut Tuhan Yesus pung datang. Abis kotong samua idop tarús deng Dia.
Bosong dengar bae-bae, te apa yang botong kasi tau ni, Tuhan sandiri yang omong.
18 Deng bagitu, bosong musti pake ini ajaran ni, ko kasi kuat bosong satu deng satu pung hati.