57
Ngweti ngatakira Rurema
1 Imwoꞌmwimangizi waꞌbimbi. Izaburi ya Dahudi, ku kyanya akapuumuka Sahuli halinde mu lwala. Luli mu yimbwa ngoꞌlwimbo «Utakizi shereeza».
2 E Rurema, si ngola mu libuuka bweneene!
Aaho! Unyuvwirwe indengeerwa.
Buno ngweti ngatibitira imwawe, mu kimbehwa kyeꞌbyubi byawe,
halinde yago malibu gatee lenga.
3 Ngweti ngatakira Rurema, bwo ali hiꞌgulu lya byoshi.
Ee ma! Ngiisi byo ashungisiri, agabingirira.
4 Agweti agandabaala ukulyoka mwiꞌgulu, anangize.
Ali mu ba anguuziri, mu kuyemeerana.
Si abagoma baani boohe, ikyanya bagweti bagandambiriza,
Rurema ali mu kizi bayogogoza.
5 Yabo bagoma bagweti baganzokanana nga ndare,
gira balonge ukunjanganula.
Amiino gaabo galyagagi muugi,
nga matumu, na ngeꞌmyambi.
Ikyanya bali mu deta,
amagambo gaabo gali mu tumitana nga ngooti.
6 E Rurema, ukizi huuzibwa áhali hiꞌgulu lya mwiꞌgulu.
Ubulangashane bwawe bukizi tanguula mu kihugo kyoshi.
7 Balya bagoma bakoli yinisiri imibashu, mbu lyo bangwasa.
Kyo kitumiri ngoli shengusiri bweneene.
Banali mu humba ubuhya, gira nyiji butibukira mwo.
Kundu kwokwo, bulya buhya, bali mu buyihongoleka mwo boonyene.
8 E Rurema, umutima gwani gusikamiri.
Ee! Gukoli sikamiri ngana-ngana.
Kwokwo, ngakizi kuyimbira, mu kukuyivuga.
9 E mutima gwani, uvyukage! Kiri neꞌnzeeze neꞌnanga, muvyuke.
Ngavyula umukyo noꞌlwimbo lwani.
10 E Nahano, ngakizi kuyivuga imbere lyaꞌbandu booshi.
Na ngizi kuyimbira inyimbo zoꞌkukuhuuza mu binyamahanga.
11 Mukuba, urukundo lwawe luhisiri halinde mwiꞌgulu.
Noꞌbwemeera bwawe buhisiri mu bibungu.
12 E Rurema, ukizi huuzibwa mwiꞌgulu.
Ubulangashane bwawe, bukwirage hooshi mu kihugo.