58
Rurema ye mutwi weꞌmaaja
1 Imwoꞌmwimangizi waꞌbimbi. Izaburi ya Dahudi. Luli mu yimbwa ngoꞌlwimbo «Utakizi shereeza.»
2 E batwali, ka muli mu deta ukuli? Nanga, maashi!
Si mugweti mugatwira abandu imaaja ku njira za kundi-kundi!
3 Mu mitima yinyu, mushungisiri íbitali nga byo.
Munagweti mugakizi shereeza hooshi mu kihugo.
4 Banangora-mabi bali mu butwa bali bihabusiri mu mabi gaabo.
Bakoli teeresiri, banali mu deta-deta ibibeesha naaho.
5 Amagambo gaabo gagweti gagakizi yitana nga manjoka-njoka.
Banali banduuvwa, nga hinakirindi.
6 Ee ma! Kundu abafumu bagweti bagaalasa inyimbo nyija bweneene,
hitaziyuvwiti.
7 E Nahano Rurema, yabo bandu, ubakuulage amiino.
Ee! Bweꞌmihenga yabo iri nga yeꞌndare, ugihoohole.
8 Imyambi yabo ikizi vunika-vunika.
Bakizi nyerera, nga miiji ágali mu lenga mu mushenyu.
9 Ee! Banyerere nga kweꞌkishongo kiri mu nyerera mwiꞌzuuba.
Banabe ngiꞌbunda íryashalamuka, buzira kubona izuuba.
10 Rurema agayami baminika duba-duba,
ukuhima kweꞌnyungu ziri mu longa ukuduuta ku muliro gweꞌshaali.
11 Balya banangora-mabi, ikyanya bagaahanwa,
lyaꞌbandu boꞌkuli bagashambaala,
iri banakizi fina mu muko gwabo.
12 Kwokwo, abandu banadete:
Rurema agweti agatwira abandu ulubaaja ku njira íkwaniini,
halinde abandu biija bakizi longa ukuhembwa.