Balʉa na bini
gba Polo pɨ omabhuka na gʉdhʉ na
Tesalonike
Eli na kalanʉ
Tesalonike ne ’ngbé gʉdhʉ ngámá gba okpála na Loma na Makedonia-o. Polo aꞌo nanɨ Dadjua gba Ebhe oo pɨta nayie ka anɨ bhʉ́ Filipoi-o. Má gala kolo me-e, omaYuda adʉ ne botolo u atsia adʉ agʉ anɨ. Padhá de, anga engʉ́ gba Kilisito ɨnde lɨ Polo adʉ akpokpo e adʉ anʉ bha ne kalanʉ bhʉ́ ká okpála ɨnde ne omaYuda ade ɨnde azɨba engʉ́ na Ebhe gba omaYuda-o. Kaka-a, Polo ayie bhʉ́ gʉdhʉ na Tesalonike anɨ akodho ’kpɨ́ bhʉ́ gʉdhʉ na Beloya. Pɨta anɨ akolo lɨe bhʉ́ gʉdhʉ na Kolito-o, Polo asia ngali ka kilí e Timoté ɨnde u adʉ amene kulu ne e-e, pɨndjɨ mʉkobho na Dadjua gba Ebhe ɨnde abhʉ́ gʉdhʉ na Tesalonike-o.
Polo aye balʉa na kalanʉ pɨ omabhuka na Tesalonike ngʉ́ nato masi di ngʉ́ nakɵ bua omakilisito kuto. Polo atsia asia nedhɨnga bhomʉ ngʉ́ napa pɨ uo me u dʉ bha namene kulu me u nde aꞌo bua o kuto me u nde ne ’to o ’to nago gba Kilisito-o.
Ongbengbe ongʉ́ ɨnde bhʉ́ bhuku ɨnde-e ngae ɨnde:
Eli na kalanʉ 1:1
Nagie heni ne natoko 1:2 – 3:13
Lɨ́lɨ ngʉ́ mʉkobho gba makilisito 4:1-12
Olɨ́lɨ pɨndjɨ nago gba Kilisito 4:13 – 5:11
Nato masi na soso 5:12-22
Eli na soso 5:23-28
1
Polo ne obɨ e yi omabhuka na gʉdhʉ na Tesalonike mayi
1 Ngayi omabhuka na Dadjua gba ’Dyɨ nɨ́ Ebhe, di ne Ngámá gba nɨ́ Yesu Kilisito na gʉdhʉ na Tesalonike-e, ya yi yi mayi. Ma aye balʉa ɨnde-e ngama Polo bhʉ́ dabɨlɨ bini ne Silivano di ne Timoté. A ayo me bádha bhʉ́ ’bu ne guo ’ngʉ́ gba ’Dyɨ nɨ́ Ebhe di ne Ngámá gba nɨ́ Yesu Kilisito-o dʉ ne yi bhʉ́ dabɨlɨ bini.
Mʉkobho di ne nabhuka gba okpála na Tesalonike
2 Ya ngagie heni pɨ Ebhe pɨko ngʉbula ndʉ yi hana. Ya la di ngabhʉ ’lɨ yi ndʉ nedhɨnga hana ya ngayo Ebhe lɨe-o. 3 Nedhɨnga ya ngayo Ebhe lɨe, ya ngagie heni pɨ Ebhe ’Dyɨ nɨ́ ndʉ nedhɨnga hana lɨ ongʉ́ ɨnde: yi ngamene kulu pɨ Ebhe anga yi abhuka Yesu, yi ngateteke okpála anga yi ne mʉkʉnda pɨ uo, yi alʉ kpekpeke bhʉ́ nabhuka gba yi nedhɨnga u ngato mbolo lɨ yi lɨe, anga yi ngabhuka me Ngámá gba nɨ́ Yesu Kilisito agíe lɨe magie.
4 Ondaise ya, ya di ngagie heni pɨ Ebhe, anga ya ambɨla ndjɨndjɨ me Ebhe akʉnda yi, anɨ atsia abhʉ di yi ngʉ́ nadʉ piga gba e makpe. 5 Padhá de, anga nedhɨnga ya adʉ lɨe agba yi-e, ya kpokpo bha bini Bádha Ngali pɨ yi ne ’li ya de, engʉ́ bini, ya akpokpo Bádha Ngali ango-o bhʉ́ dabɨlɨ bini ne angu di ne Bu Bhobua . Ya adʉ ambɨla di ndjɨndjɨ me engʉ́ ɨnde ya adʉ apa e adʉ kʉkʉlʉ ’ngʉ́. Yi mbɨla ndjɨndjɨ lele maka ya adʉ nadʉ lɨe bhʉ́ ká yi ngʉbula me yi dʉ ndjɨndjɨ-o.
6 Ngayi-e, yi asia Eli gba Ebhe-e ne djalɨ ɨnde ngayie ka Bu Bhobua, abana u adʉ ato mbolo lɨ yi lɨe-o. Abhomʉ-o, yi amene ’ngʉ́ maka ya amene lɨe di ne maka lɨ Ngámá gba nɨ́ Yesu Kilisito amene lɨe-o. 7 Kaka-a, yi akolo pɨ ndʉ omabhuka hana na ndu doto na Makedonia di ne Akai okpála ɨnde lɨ okpála koko ngakpata nganda o.
8 Mbɨa ɨnde-e, Eli gba Ngámá-a yangba bha bini nayie agba yi bhʉ́ ndu doto na Makedonia ne Akai de, engʉ́ bini, ngali pɨndjɨ nabhuka gba yi bhʉ́ Ebhe-e ayangba di ne ndʉ bɨlɨ hana. Kaka-a, ya matá ne gʉmʉ napa ’ngʉ́ gba yi-e pɨ okpála ade. 9 Padhá de, anga ndʉ uo hana ngakpokpo ’ngʉ́ pɨndjɨ maka yi asia ya lɨe nedhɨnga ya akolo lɨe agba yi-o. U di ngakpokpo maka yi aꞌo nakpata oebhe na eu lɨe ngʉbula naha lɨyi pɨ Ebhe na kʉkʉlʉ ɨnde na mʉkobho-o. Mbɨa ɨnde-e, yi ngamene kulu lɨyi pɨ anɨ. 10 U di ngakpokpo me yi ngadjeke me Yesu, Ndɨlɨ gba Ebhe-e yie abhʉ́lá, go pɨ́la doto. A ko kpála ɨnde lɨ Ebhe azuku e bhʉ́ ká okpála ɨnde amu, anɨ ngagbegbe nɨ́ bhʉ́ mangɨmbo lɨ Ebhe akódho ’ngʉ́ lɨe-o. Ekpɨ́ nakodho ’ngʉ́ ango-o akolo masɨkpe.