1 Hanki Aisaki'a ke higeno Jekopu egeno asomu hunenteno, hanvenentake ke asmino, kagra mago Kenani vahe'mokizmi mofara e'origahane. 2 Otinka Padan-aram (Mesopotemia), Betuel nontega vuo, e'i negrerana nefa'e, anantegati a' ka'a erisanana Labani negrera nesaro mofanefinti mago mofa a'ra erio! 3 Ana'ma hanankeno Hanvenentake Anumzamo asomu huganteno, kazeri hakare nehuno, kazeri hakare hugante'na tusi'a vahe fore hunka manigahane. 4 Nagri'ma navesiana Anumzamo Abrahamu hunte'neaza huno kagri'ene, mofavreka'ane asomu hugantesnie, ama vanoma nehana mopa, Anumzamo Abrahamu ami'nea mopa eri nafa'a hugahane. 5 Aisaki'a Jekopuna huntegeno Padan-aram (Mesopotemia) Labanintega vu'ne. Betueli Aramia nemofo mofavre, Rebeka nesaro, Jekopune Iso gizni neznarera'e.

6 Iso'ma antahigeno, Aisaki'ma Jekopu asomu hunenteno Padan-aramuti a' erinogu huntegeno nevigeno, hanvenentake ke asmino amanage hu'ne, kagra Kenani vahe'mokizmi mofa'nefintira ara e'oriogahane. 7 Higeno Jekopu'a nefane nerera ke erizafa huno Padan-aram vu'ne. 8 Isoma keana nefa Aisaki'a Kenani mofanegura musena osu'ne. 9 Ana higeno Iso'a Ismaelintega vu'no a'nema zamante'nefi aru mago'ene a' omeri'ne, Ismaeli mofa agi'a Mahalati'e, Ismaeli'a Abrahamu nemofo'e. Mahalati'a Nebaioti nenunkna'e.

10 Jekopu'a Bersiba atreno Harani kaziga vu'ne. 11 Nevigeno kantega zge ufreno hani ome higeno, have fita erinteno mse'ne. 12 Anante mseneno ava'na ke'ne, ana avanafima keana mago ratamo'a eramino, agafamo'a mopare regrigeno, amuzamo'a anagamu monafinka mreri'negeno ke'ne. Anantema keana Anumzamofo ankeromo'za mareri'za tamiza anante nehzageno ke'ne. 13 Ana huno nezmagegeno Ra Anumzamo anante ontino mani'neno asmi'ne, Nagra Ra Anumzane, negageho Abrahamune, negfa Aisakigizni Anumzane, Menima mase'nana mopa kagri'ene, kagehe'ine tamigahue. 14 Kagripinti'ma fore hnaza vahe'mo'za kasepakna hu'za fore huhakare hu'za manigahaze. Zge fre kazigane, zge hanati kazigane, ruga raga agentega vu'za e'za hu'za mani titipa hu'za manigahaze. Kagri ene kagehe'impinti ama mopafi vahe'mo'za asomura erigahaze. 15 Hanki antahio Nagra, kagrane mani'nena, inantega vanoma hananana, kva hunegante'na, ete kavre'na ama ana mopare egahue. Hanige'na Nagra onkatre'na, kema huvempa hugante'noa kea eri knare huvgaregahue.

16 Jekopu'a avu msenereti otino anage hu'ne, Tmage huno Ra Anumzana amafi mani'negena nagra ontahi'noane. 17 Agra amnogu nehuno amanage hu'ne. Ama mopa ruotge huno me'ne! Ra Anumzamo mani'nea nompi e'noe. Hankino ama mona kafa me'ne. 18 Jekopu'a nanterame otino, fitaruno mse'nea havea erisga huno retru renteteno, masve tagino agofetu frente'ne. 19 Agra ana nonkura Beteli'e huno agia antemi'ne. * Anumzamofo none, huno agra kefi Betel huno ante'ne. Korapa ana kumamofo agi'a Lusi'e huno me'neane.

20 Jekopu'a amanage huno huvempa hu'ne, Afete kama nevnugeno Anumzamo nagrane nevuno nagu'vazino ne'za ni'ane kukena'ni'ane naza nehanigena, 21 mago knazamo navate osanige'nama nafa'nimofo kumate ete rukrahe hu'na uhanati su'na, Ra Anumzana, nagri Anumzane hugahue. 22 Ama have eri retruroana, Anumzamofo no mesie. Mika'zama nami'sankeno'ma 10ni'ama fore'ma hanige'na, anampintira refko huna magoke kevua kamitere hugahue.