1 Menina Jekopu'a agri nefa, mani'neno hu'nea mopare Kenani mopare mani'ne. 2 Amai Jekopu naga nofimofo naneke. Josefe, 17tini'a zgegfu nehuno, nehaza ne' mani'neno nefu'zane afutmi kegvagrine, Bilhane, Zilpagizni nefa a'tremokizini mofavre'mozane kegva hu'naze. Josefe nefu'za haviza hza kea erino nezmafa ome asmi'ne. 3 Menina Israeli'a (Jekopu'a) mika ne'mofavre afintira, Josefenku avesintene, na'ankure agra ravusefinka ante'ne, agra avasese'ane kena tro huno antanite'ne. 4 Josefe nefu'za, kazana nezmafa rama'a agri avesinentege'za, zamagra avesi onte'za knare fru keaga huomi'naze.

5 Anante Josefe'a avana keteno, afuhe'mokizmi ana avana ke nezmasmige'za, zamagra mago'ene tusiza huza zamarimpa hente'na'ze. 6 Josefe amanage huno zamasmi'ne, Muse (plis) hurmantoanki ava'nama ke'noa kea antahiho, 7 avanama ke'noana hozafi witi ananekunkeno nagri witimo'a oti fatgo higeno, tamagri witimo'za regagiza, nagri witire zamarena reza kepri hu'naze. 8 Anante nefu'za amanage hu'za antahige'naze, Kagra, tagri tgaterenka rankva (kini) mani'za nehano. Tamage hunka kegva hurante'za nehano. Anage nehu'za mago'ene zamasigu hunente'za, agri avana gene, ke'anena ontahi'naze.

9 Anante mago'ene ava'na keteno afuhei zamasmino amanage hu'ne, Antahiho, mago'ene ava'nagoana, zgene, ikane, 11ni'a ofumo'za nagrite kepri hunante'naze. 10 Josefe anage huno nefane, afuhei nezmasmigeno, nfa'amo kesuno amanage hu'ne, Kagra nankna avana negane? Nagrane, negrera'ene negfu'zanena tmage huta mopafi trena kagrite regahuno? 11 Agri afuhe'za amefia ke hunte'nazanagi, nefa'a hakare'a nanekea antahi antahifi atre'ne.

12 Mago'zupa agri nefu'za, nezmafa afutmi avre'za traza nehogu Sekemu vu'naze. 13 Israeli'a, amanage huno Josefena asmi'ne, Negafu'za afuzga zamavre'za Sekemu traza me'nerega ome zamantenarega ege'na, huganta nenkenka zamagritega vuo. Josefe amanage huno kenona hu'ne, Nagra vugahue. 14 Nefa amanage huno Josefe asmi'ne, Menina vunka negfuzane, afuzganena knare hu'za mani'nafi ome ketenka, ete enka kea eme nasmio. Anage nehuno huntegeno Hibroni agupofinti vuno Sekemu uhnatine. 15 Hakeno vano nehigeno, mago ne'mo keteno azerino antahige'ne, Na'anku kagra nehakrane? 16 Josefe anage hu'ne, Nagra nafuhemokizmigu nehakroe, muse (plis) hugantoanki inantega afu'zmi kegva huza mani'nafi nasmio. 17 Anante ana ne'mo asmi'ne, Amafinti atre'za vunaku nehu'za, Dotani vanune nehzagena antahinoe, higeno Josefe'a zamage zamavririno vuno afuhe'ina Dontani ome zamage fore hu'ne.

18 Josefe afete ne-eno eravao osunege'za nege'za, ahe frigahune hu'za ke retro hu'naze. 19 Zamagra osmi asmi huza, Ava'na kege nera antu e! 20 Hanki menina, enketa aheta keri kampi mate'vuta nevzita, amanage hugahune. Afi zgamo aheno ne'ne, nehuta avana ke'amo nankna hugahifi kesune. 21 Ana hianagi Rubeni'a ana naneke nentahino, zamazampinti aza hunaku anage hu'ne, atrenketa asimu'a e'orisune. 22 Rubeni'a mago'ene amanage huno zamagri zamasmi'ne, Korana eri oragi'sune. Hanki amima ka'ma kopi me'nea kerifi oheta atre'sune, ana hnage'no agra aza huno avreno nefa ome amisigu hu'ne. 23 Hanki Josefe'ma eno afuhe'inte'ma ehnatige'za, zamagra azeriza, knare avasese ane zaza kena nefama antaninte'nea zafi netre'za, 24 zamagra azeriza ti keri kampi matevu atre'naze. Ana kerifina tina omnene.

25 Ana hute'za, zamagra mani'neza ne'za nenaku nehu'za, kesga huza zamu kazana, avazu hunteza Ismaeli vahe'mo'za Giliatiti ne-eza, kemori'zmifi gamune, (fukinkna masve), tusa masve kregefe'neane (bam) mna'nentakeza mere'ne eri'za Isipi vunaku e'naze. 26 Juda'a amanage huno nezmafunku hu'ne, Nankna miza erigahune nergnama aheta korama'a refitesuta? 27 Enketa tagra mizante Ismaeli vahete Josefena atramneno, tagra agrira ohesune, agra tagri kora manine. Nefu'za ana naneke antahi'naze.

28 Anante mago'a Midiani vahe'mo'za, feno omi ami nehu'za miza nesaza vahe'mo'za anante neazageno, zamagra Josefena kerifinti avazuhu naga'atre'za Ismaeli vahete 20 sekel silva zgore atre'naze. Ana hazage'za Josefena avre'za Isipi vu'naze.

29 Rubeni'a keri avazare eno keana Josefe kerifi omni'negeno! kukena'a sgane sagnu hu'ne. 30 Aganaheinte agra uhnatino amanage hu'ne, Ana mofavre'a omni'ne, hanki nagra inantega vugahue? 31 Hige'za zamagra Josefe avasese kena eri'za, ve meme ahe'za ana zaza kena'a korama'afi re'za tiza hute'za, 32 anante ana avasese ma'ane zaza kena, mago'amo'za eri'za nezmafante uhnatiza anage hu'naze. Amama kefore'ma huna kena, muse (plis) hugantonanki kagri negamofo zaza kenafi ko. 33 Anante keteno amanage hu'ne, amai nagri ne'mofavremofo zaza kene. Afi zgagfamo aheno ne'ne, tmage huno Josefena amprino anitraga trogo hutre'negahie! 34 Anage nehuno Jekopu'a kukena'a braro bruru huno tanefa kateno kukena'are* toza kukena huno mani'ne. nefreno zaza kna ne'mofonkura zavira ate'ne. 35 Ana hige'za mika ne'mofa amo'za, otiza azeri avavasenaku hu'nazanagi, azeri vava sezankura ave osine. Nehuno agra amanage hu'ne, Nenamofonku zvi netena frina fri vahe kumapi umanigahue. Nehuno nefa'a zvi ate'ne.

36 Ana hige'za Midiani vahe'mo'za Josefena, mizante atrazageno, Isipi ne' Fero avate kva nemo Potifa miza se'ne.