31
31-küy •••• Bésim astida
1 Neghmichilerning béshigha tapshurulup oqulsun dep, Dawut yazghan küy: —
Sen Perwerdigarni, men bashpanah qildim;
Méni héchqachan yerge qaritip qoymighaysen;
Öz heqqaniyliqing bilen méni azad qilip qutquzghaysen;■ Zeb. 22:4-5; 25:2, 3; 71:1, 2; Yesh. 49:23
2 Manga qulaq salghaysen, méni tézrek qutquzuwalghaysen;
Manga qoram tash,
Özümni qoghdaydighan qorghanliq qel’e bolghaysen.
3 Chünki Sen méning uyultéshim, méning qorghinimdursen;
Shunga Öz naming üchün méni yétekligeysen, méni bashlighaysen.
4 Manga yoshurun sélin’ghan tuzaqtin qedemlirimni tartqaysen;
Chünki Sen méning bashpanahimdursen.
5 Men rohimni qolunggha tapshurdum;
Sen manga nijatliq qilip hörlükke chiqarghansen, i Perwerdigar, heq Tengri.■ Luqa 23:46
6 Yalghan ilahlargha choqunidighanlardin yirginip keldim;
Men bolsam Perwerdigargha étiqad qilimen.
7 Özgermes muhebbiting bilen xushal bolup shadlinimen;
Chünki méning xarliqimni kördüngsen;
Jénimning azap-oqubetliridin xewer tapting.
8 Méni düshmenlirimning qoligha chüshürmiding,
Belki putlirimni kengri jaygha turghuzdung.
9 I Perwerdigar, manga rehim-shepqet körsetkeysen,
Chünki béshimgha külpet chüshti;
Derd-elemdin közüm tügüshey dep qaldi,
Jénim, wujudummu shundaq.□ «...Jénim, wujudummu shundaq» — yaki «Jénim, ichimmu shundaq».
10 Hayatim qayghu-hesret bilen,
Yillirim ghem-ghusse bilen uprawatidu.
Gunahim tüpeylidin maghdurum kétey dep qaldi,
Ustixanlirim sizip ketti.
11 Men reqiblirimning iza-ahanitige qaldim,
Yéqinlirim aldida téximu shundaq;
Tonushlirimghimu bir wehime boldum;
Kochida méni körgenlermu mendin dajip qachidu. ■ Ayup 19:13; Zeb. 38:11
12 Hemmeylen méni ölgen ademdek, könglidin chiqirip tashlashti;
Puchuq chinidek bolup qaldim.
13 Chünki nurghunlarning töhmetlirini anglidim,
Wehime terep-tereplerde turidu;
Ular manga hujum qilishqa meslihetlishiwatidu,
Jénimni élishqa qest qilishiwatidu.
14 Biraq men Sanga tayinimen, i Perwerdigar;
«Sen méning Xudayim!» — dédim.
15 Méning künlirim Séning qolungdidur;
Méni düshmenlirimning qolidin hem manga ziyankeshlik qilghuchilardin qutquzghaysen.
16 Qulunggha didaringning jilwisini chüshürgeysen;
Özgermes muhebbiting bilen manga nijatliq ata qilghaysen.
17 I Perwerdigar, méni yerge qaritip qoymighaysen;
Chünki men Sanga iltija qildim;
Reziller yerge qarap qalsun;
Ularning tehtisarada zuwani tutulsun;
18 Yalghan lewler zuwandin qalsun!
Ular heqqaniylarni xalighanche mazaq qilip tekebburluq bilen sözlimekte!
19 Özüngni bashpanah qilghanlar üchün insan balilirining köz aldida körsetken iltipatliring,
Yeni Özüngdin qorqidighanlar üchün, saqlighan iltipat-németliring neqeder moldur!■ Yesh. 64:3; 1Kor. 2:9
20 Sen ularni insanlarning suyiqestliridin Öz huzurungdiki yoshurun dalda jaygha alisen;
Sen ularni til-ahanetlerdin sayiwiningde yoshurup qoyisen.
21 Perwerdigargha teshekkür-medhiyiler yollansun!
Chünki U özgermes muhebbitini zulmetlik bir sheherde ajayib nimayen qildi! □ «Chünki U özgermes muhebbitini zulmetlik bir sheherde ajayib nimayen qildi! » — ayetning bashqa birnechche xil terjimiliri bar, mesilen «zulmetlik bir sheherde» dégenning birnechche terjimiliri bar. Bizningche Dawut Saul padishahning ziyankeshlikidin qachqanda, yat yurtlarda musapir bolghan waqitlirini eslewatidu. Mesilen, «1Sam.» 21-, 27-babni körüng.
22 Chünki men dekke-dükkide hoduqup: —
Séni, méni közidin chiqirip qoydimikin, dep qorqqanidim;
Halbuki, men nale kötürüp yélin’ghinimda, peryadimgha qulaq salding.
23 Perwerdigarni söyünglar, i Uning barliq mömin bendiliri!
Perwerdigar Özige sadiqlarni qoghdaydu,
Hem tekebburluq bilen ish qilghuchilarning qilmishlirini öz béshigha hessilep qayturidu!
24 I Perwerdigarni telmürüp kütkenler,
Jigerlik bol, qelbing merdane qilinsun!■ Zeb. 27:14
■31:1 Zeb. 22:4-5; 25:2, 3; 71:1, 2; Yesh. 49:23
□31:9 «...Jénim, wujudummu shundaq» — yaki «Jénim, ichimmu shundaq».
□31:21 «Chünki U özgermes muhebbitini zulmetlik bir sheherde ajayib nimayen qildi! » — ayetning bashqa birnechche xil terjimiliri bar, mesilen «zulmetlik bir sheherde» dégenning birnechche terjimiliri bar. Bizningche Dawut Saul padishahning ziyankeshlikidin qachqanda, yat yurtlarda musapir bolghan waqitlirini eslewatidu. Mesilen, «1Sam.» 21-, 27-babni körüng.