7
Isirayilaa hakɛna
1 N to wa Isirayila bɔnsɔnna rakɛndɛya feni,
Efirami bɔnsɔnna hakɛn mɔn yi keli.
Samari a ɲaxun yi mini kɛnɛnni.
Bayo e darixi yanfan soɛ.
Muɲadene soma,
mafu tiine yi lu tandeni.
2 E mi e mirima
fa fala n xaxili e ɲaxuyane birin xɔn.
Iki e kɛwanle e rabilinxi,
e hakɛne n yɛtagi waxatin birin.
Yanfan Mangan ma
3 Itoe rafan mangan ma,
koni e ɲaxu!
E wulene rafan kuntigine ma.
4 E birin yalunde.
E kui feene wolonxi alo buru gandena.
A na wolon,
buru ganna mi fa a tɛɛn nafɛ
keli burun bɔnbɔ waxatini han a yi te.
5 Na kiini, mangana ɲaxaɲaxan lɔxɔni,
kuntigine xunne yi keli dɔlɔn na.
Mangan yi magele tiini itoe rasɛnɛ.
6 E xaɲɛ alo sulun tɛɛna,* Sulun tɛɛn mɔn falama yirena nde yi fa fala “Furu tɛɛna.”
e maso mangan na, e xa yanfan so a ma.
E bɔɲɛ teen dɛgɛma nɛn kɔɛna ngaan na,
xɔtɔnni a keli alo wonson tɛɛna.
7 Isirayila kaane xaɲɛ alo sulun tɛɛna,
e e kuntigine raxɔrima,
e e mangane birin faxa.
Anu, na sese mi n maxandima.
8 Efirami bɔnsɔnna basanma siyane ra.
Efirami bɔnsɔnna findixi buru xunna ra
naxan fɔxɔ keden ganxi
bode fɔxɔ mi ganxi.
9 Xɔɲɛne a sɛnbɛn kalama
koni a mi sikɛma.
Foriyana a suxuma,
koni a mi a rakɔrɔsima.
10 Isirayilaa wason sereyaan bama a xili ma.
Koni na birin kui,
a mi xɛtɛma Alatala ma, a Ala,
a yi a fen.
11 Efirami bɔnsɔnna luxi nɛn
alo ganba xaxilitarena
naxan madaxuma sinma!
A Misiran bɔxɔn xilima waxatina nde yi,
a fa bira Asiriya mangane fɔxɔ ra.
12 Xa e siga,
n yalaan wolima nɛn e fari,
n yi e rabira alo xɔlina.
N yi e yulubine saran e ra,
alo e rakolonxi kii naxan yi e malanni.
13 Gbalona e xa,
amasɔtɔ e e gima n ma!
Fitina na e xa,
amasɔtɔ e murutɛxi n ma.
N yi waxi e xunba feni,
koni e wulene falama n xun ma.
14 E mi n maxandima e bɔɲɛne yi,
koni e wugama e sadene nan ma.
E kunfama donseen nun dɔlɔn fɔxɔ ra,
koni e e masiga n tan na.
15 N tan nan e maxaranxi,
n yi sɛnbɛn fi e ma,
koni e fe ɲaxine mirima n xili ma.
16 Naxan kore,
e mi xɛtɛma na ma,
e yanfan tima
alo xali yidɔxina.
Nanara, e kuntigine faxama nɛn silanfanna ra,
e dɛ ɲaxune fe ra.
Misiran kaane yi e magele na ra.