1 Ɛ xɔtani tɔn,

yaxun godoma nɛn Alatala banxin ma alo singbinna.

Amasɔtɔ yamaan bata n ma layirin kala,

e yi murutɛ n ma sariyan ma.

2 E sɔnxɔma n xinla ra:

“Nxɔ Ala, nxu i kolon,

nxu tan, Isirayila!”

3 Koni, naxan fan,

Isirayila bata a mɛ na ra,

nanara yaxun birama nɛn a fɔxɔ ra.

4 E bata mangane ti n ma

yamarin mi naxan na,

e bata kuntigine ti

e mi n maxɔdin.

E bata suxurene rafala e gbetine nun e xɛmane ra,

nanara e raxɔrima nɛn.

5 Ala bata i ya ɲinge dii suxuren nawoli ayi,

Samari kaane!

N ma xɔlɔn bata keli e xili ma han!

Han waxatin mundun yi

e tondɛ e rasariɲanɲɛ?

6 A kelixi ɛ tan nan yii,

ɛ tan Isirayila kaane.

Walikɛna nde nan a rafalaxi,

Ala mi a ra!

Nanara, Samari a ɲinge dii suxuren kalama nɛn fefe!

7 Naxan na fe ɲaxin nakeli,

gbalon nan xɛtɛma a ma.

Nanara, hali murutun tɔnsɔn keden,

e mi a sɔtɔma xɛɛn ma.

Xa na nde mini,

na mi murutu fuɲi raminɛ.

Hali na nde yi na nun,

xɔɲɛne nan yi a donma.

8 Isirayila bata kala!

E tɔnɔn mi fa na siyane yɛ.

9 E bata siga Asiriya yi,

alo burunna sofanla

naxan sa tima a danna.

Nayi, Efirami bɔnsɔnna bata a yɛtɛ sara a suxurene ma.

10 Hali e bata kantan tiine sara siyane tagi,

iki n na e birin malanma nɛn,

alogo e xa sa tɔrɔ ndedi Manga Gbeena goronne bun ma.

11 Efirami bɔnsɔnna bata yulubi xafari saraxa gandene rawuya ayi,

koni ne bata findi yulubi tongoden na.

12 N bata n ma sariyane birin sɛbɛ e xa,

koni e a toxi alo se xɔɲɛna.

13 E saraxane ba,

e kiseene rali,

e a suben don.

Koni ne mi rafan Alatala ma.

Iki, Alatala xaxili e hakɛne xɔn,

a e yulubine saranma e ra nɛn.

E xɛtɛ Misiran bɔxɔn ma.

14 Naxan Isirayila daxi

e bata ɲinan na xɔn,

e sa manga banxine ti.

Yuda bata a taa ratangaxine rawuya ayi,

koni n tɛɛn nafama nɛn e taane yi,

a yi e yinne gan.