1 Anantera mago ra ageru antahugeno Anumzamofo ra mono nompinti, 7ni'a ankero vahekura anage hu'ne, vutma 7ni'a Anumzamofo rimpahe knazama me'nea zuompa mopafina omeri tagi atreho. 2 Hanki nampa 1ni ankeromo'a vuno Anumzamofo rimpahe zuompa mopa agofetu ome tagitregeno, afi zgamofo avame'za eri'ne'za amema'arema monoma hunentaza vahete haviza huno agotega namuzgamo fore hu'ne.

3 Anante nampa 2 ankeromo'a Anumzamofo rimpahe zompa'a hagerimpi tagitregeno, fri'nea vahe'mofo korankna higeno, maka zamasimu ante'za mni'naza zgamo'za hagerimpina fri vgare'naze.

4 Anantera nampa 3 ankeromo'a Anumzamofo rimpa he'zana zompafintira, ranra tiranpine osi ti tamimpinena eri tagi atregeno, maka timo'za koranke hu'naze. 5 Nagra nentahugeno tintamima kvama hu'nea ankeromo'a huno, Kagra fatgo hu'nane, korapara mni'nanankinka, menina mni'nane. Kagrake Ruotge hu'nane. Na'ankure Kagra ana maka'zana refko nehane. 6 Na'ankure zmagra Anumzamoka kagri nagaka'ane, kasnampa vaheka'amofo korama zmahe'za eri tagi atre'nagu, Kagra karimpa he'zamofo korantima zaminke'za, zamagra ana koranti nega nagaki'za ne'naze! 7 Anante nentahugeno kresramnavu itamo'a huno, ozo Hanaveka'ane Ra Anumzamoka, refako huzanka'amo'a, tamage huno fatgo hu'ne.

8 Anante nampa 4 ankeromo Anumzamofo rimpahe zompa zgemofonte eritagitregeno, zgemo'a tevemo'ma hiaza huno ana vahera zmavufgare rentege'za zmatagu hu'naze. 9 Zgemofo amuhomo'a tevemo'ma hiaza huno ana vahera zmavufgare rentege'za, zmatagu nehu'za ana knazama atregeno erami'nea Anumzamofo agi'a huhaviza hunente'za, zmagu'a rukrehe hu'za ra agi omi'naze.

10 Anantera nampa 5 ankeromo Anumzamofo rimpahe knaza me'nea zuompa afi zgamofo trate eritagitregeno, agrama kegva hu'nea kumamo'a hani higeno, ana kumapima mni'naza vahe'mo'za tusi'a zmatagu nehu'za zmagnefuna anitraga nehu'za, 11 monafi mni'nea Anumzamofona huhaviza hu'naze. Na'ankure zmatama kri'nea zanku'ene namuma zmare'nea zanku anara nehu'za, ana zmavu'zmavazankura zmagu'a rukrehe osu'naze.

12 Anantera nampa 6 ankeromo'a Anumzamofo rimpahe knaza me'nea zuompa tusi'a Yufretisi tirampi tagi atregeno, ana tiramo'a ho'mu huno, zage hanati kazigati esnaza kini vahe'tamimofo ka retro hu'ne. 13 Ana higena kogeno agaza hunte osifavene, afi zgamofo agipinti'ene, havige kasnampa ne'mofo agipintira, 3'a agru osu avamutamina hogakna hu'naza atirami'naze. 14 Na'ankure zmagra hankrotamimofo avamutamimo'za, avame'zana erifore nehu'za, maka ama mopafi kini vahete vu'za ome zmazeri atru nehu'za, tusi'a hihamu hanave'ane Anumzamo'ma vahe'ma refko hania knarema, ha'ma hanagu zmazeri retro hu'naze. 15  Antahio, Nagra kumzafa vahe eaza hu'na egahue, iza'o kukena'ama huno omase otino mni'nenimo'a, muse hugahie. Ana nehuno avufga avapara ovanigeno, vahe'mo'za agaze avufga onkegahaze. 16 Ana nehu'za havi avamumoza kini vahe'zmine, ha' vahe'zminena Hibru kefina Amakedonie nehaza kumate zmazeri atru hu'naze.

17 Anantera nampa 7ni ankeromo Anumzamofo rimpahezama me'nea zuompa zahopi eritagi atregeno, ra mono no agu'afi me'nea kini trateti magomofo agerumo ranke huno, havgare hu'ne. 18 Anante kopsina e'nerino, agasasa nerigeno, monage nehigeno, tusi'a imi eri'neana, vahema fore'ma huneregatira, e'inahu imina e'ori'neankna tusi'a iminkrefa eri'ne. 19 Babiloni rankumamo'a ruhantagino 3'afi fore higeno, mopafi ranra kumatamimo'za traka humase'naze. Babiloni kumamofo kefo avu'avazana, Anumzamo'a antahino keno hu'neankino rimpahe waini kapu tina amigeno ne'ne. 20 Ana higeno maka ti amunompi me'naza mopamo'za fnane hazageno, agonamoza tamiza agupo mopa se'naze. 21 Hagi tusi'a komopa ko monafinti aru'neana, mago mago aragana'amo'a 50ti'a kilonaza hu'nea komopa komo, vahete evuramino zmahe haviza hige'za, ana vahe'mo'za Anumzamofona huhaviza hunte'naze. Na'ankure Anumzamofo rimpahe knazamofo komopa kokino, ana komopamo'a tusi havizantfa hu'neakino, vahera zmahe haviza hu'ne.