1 Anantera 7ni'a zuompama 7ni'a ankero vahe'mo'za azerinazafinti magomo eno nagrikura anage hu'ne, amare ege'na tusi monko a'mo rama'a tintamimofo agofetu mni'nea a'mo'ma erisia knazana kaveri haneno hu'ne. 2 Ana a'ene maka mopafi kini vahe'mo'za, rama'a monko zmu'zmaza nehazageno, mopafima mni'naza vahe'mo'za, ana a'mofo havi avu'avazamofo waini ti neza neginagi hu'naze. 3 Anantetira ana ankeromo'a avamupi navreno vahe omni ka'ma mopafi vigena, nagra kogeno mago a'mo, koranke afi zgamofo agumpi mni'negeno, Anumzamofoma azanava kemahu agiramina ana afi zgamofo avufgare mevgaregeno, 7ni'a agenopa megeno ana agenopafina, 10ni'a pazivea me'ne. 4 Ana a'mo'a fitunke'ene koranke kukena nehuno, kolire'ene mrerisa havere'ene, perie (pearls) nehaza zanteti tro hu'naza avasasezana erinehankreno, azampina maka kasri avu'ava'amo'ene, monko avu'ava'amo avite'nea kolire kapu eri'ne. 5 Ana a'mofo kokovitera mago oku'a agi'a anage huno krente'neana, Babilonia tusi'a agatere kumare, monko a'nemokizmine, ama mopafi kasri avu'ava zantamimofo nezmarera'e huno krentene. 6 Hanki negogeno ana a'mo'a Anumzamofo nagamokizmi korane, Jisasi agi agenkema huamama nehza nagamokizmi korana ne'neno neginagi nehigena, negena nagra tusiza hu'na antri hu'noe. 7 Hagi ana ankeromo'a anage huno nasami'ne, nahigenka antria nehane? Ana a'ene, agofetu mni'no nevia afi zgagi, ana afi zgamofo 7ni'a agenopagi, 10ni'a pazive'ama me'neazamofo oku'a agu'agesa'a kasamigahue. 8 Ana afi zga kenanana, korapa mni'neana, menina omni'neankino, kofa'a knafi riga omne kerifinti hnatino, eama huteno haviza hugahie. Ama mopama tro'ma osu'negeno, mopafima mni'naza vahe'ma zmagima asimu eri avontafepima kreonte'nea vahe'mo'za, korapa mni'neana, menina omani'neankino, henkama eamama hanige'za kesnu'za antri hugahaze. 9 Asenifima knare antahintahizama me'nenia vahe'mo'a antahi ama hino, 7ni'a agenopa, e'i ana a'moma agofetu mni'nea 7ni'a agonamo'za 7ni'a kini vahetamine. 10 Ana 7ni'a kini vahepinti 5fu'amo'za evuramizageno, magomo menina mnigeno, magomo'a ome'neankino, esuno'a osi'a knafi kinia emanigahie. 11 Hanki afi zgama korapama mni'neama, menina omnineana, agra e'i nampa 8ti kinigino, 7ni'a kini vahepinti mago zmimokino, agra haviza hugahie. 12 Hagi 10ni'a pazivema agenopafima kenanana, 10ni'a kini vahekiza kuma kegvahu hanavea e'orinazanagi, zamagra afi zgane magoke auafi kinia manigahaze. 13 Ama ana kini vahe'mo'za magoke antahintahifine, mago zmarimpa hu'za hanave zmine hihamuzmia afi zgamofo amigahaze. 14 Ana kini vahe'mo'za Sipisipi Anentamofo ha' hunte'naku hugahazanagi, Sipisipi Anentamo'a zmaheno zmagateregahie. Na'ankure Agra ramokizmi, Ra mnineno, kini'mokizmi Kini manine. Agrama zamigi huno huhampri zmantege'za mni fatgo hu'namo'za, Agranena mnigahaze.

15 Hagi ankeromo'a anage huno nasamine, monko a'mo agofetu mni'negenka kenana tintamina, e'i zmagra mika nofi naga ene, zmageru ene, tusi'a vahe ene, kumatami huvame huno me'ne. 16 Hagi 10ni'a pazive'ene afi zganema kenanana, zamagra monko a'mofona zmavesra hunente'za kukena'a azeriza erivararo hanageno mago'zana avufarera omanetfahina, avufga avapa mni'nena avufga'a nene'za, tevefi kre fnane hugahaze. 17 Na'ankure Anumzamo Agri avesiza eri knare hnazegu, ana kini vahera antahintahi zamige'za magoke antahintahire'ene, magoke zmagu zmagesare zamagrama kegva hu'naza kumatamina afi zgamofo amizageno, Anumzamofo kemofona avufga'a fore hu'ne. 18 Hanki ana monko a'ma ke'nanana, e'i tusi'a kumamofo hu avame huno manineno, maka ama mopafi kini vahe'mokizmi kegva hunezmante hu'ne.