Hɑɩ, Tɑcɑɑ ke ŋkpɑŋʋɣʋ nɑ mɑ tɔɔ nɑ ń cɔ-m.

Mpi tɔ, mɑ kɛ́ kʋnyɔntʋ kɛ́ nɑ wɑhɑlɑ tʋ.

2 Mɑ kɛ́ kʋpɑŋ kɛ́, kenti mɑ tɔɔ.

Mɑ Ɩsɔ, mɑ kɛ́ nyɑ́ təmlɛ tʋ kɛ́,

mɑ pɛtɑ-ŋ mɑ tɩ, wɑɑsɩ-m.

3 Tɑcɑɑ nyənɩ mɑ pətɔɔtəlɛ.

Nyɑɣɑ mɑ wiikinɑ pɑɑ ɩfemle nte.

4 Nyɑ́ tɔɔ kɛ́ mɑ kɛɛsənɑɑ.

Ɩlɛ hɛɛsɩ nyɑ́ təmlɛ tʋ mɑ, mɑ lɑŋlɛ.

5 Tɑcɑɑ, n kɛ́ kʋpɑŋ kɛ́,

nɑ ń hʋləɣɩ suulu.

Nyɑ́ kʋpɑntʋ tɔɔwɑ mpɑ pɑ yɑɑkɩ-ŋ tɔ pɑ tɔɔ.

6 Tɑcɑɑ ke ŋkpɑŋʋɣʋ nɑ mɑ kʋsələmʋtʋ

nɩɩ mɑ wiinɑʋ.

7 Mɑ yɑɑkɩ-ŋ mɑ lɑŋwɑkəllɛ kʋyɛɛŋ tɑɑ kɛ́.

Mpi tɔ, n nɩɩkɩ mɑ nɔɣɔ.

8 Hɑɩ, Tɑcɑɑ, Ɩkɔntɛ nɑtəlɩ tə tɑ nəɣəsənɑ-ŋ,

pəyele nɔɣɔlʋ ɩɩ pəsəɣɩ nɑ ɩ́ lɑ nyɑ́ təmlɛ nɑtəlɩ.

9 Piitimnɑɑ mpɑ pɑ tənɑ n ŋmɑwɑ tɔ,

pɑɑ kɔɔ nɑ pɑ́ həntɩ-ŋ ɑtɛ,

nɑ pɑ́ tʋ nyɑ́ hətɛ kɛ teeli.

10 N kɛ́ sɔsɔ kɛ́, nɑ n lɑkɩ kɔkɔlɔ nyəm,

nyɑ́ tike ntɛ́ tɑmpɑnɑ Ɩsɔ.

11 Hɑɩ, Tɑcɑɑ hʋlɩ-m nyɑ́ mpɑɑŋ,

mɑɑ tɔ nyɑ́ tɑmpɑnɑ tɑɑ.

Tʋ mɑ tɑɑ nɑ mɑ́ wɛɛnɑ nyɑ́ sɔɣɔntʋ.

12 Tɑcɑɑ, mɑ Ɩsɔ mɑɑ sɑ-ŋ nɑ lotu kʋlʋmtʋ,

nɑ mɑ́ tʋɣɩ nyɑ́ hətɛ kɛ teeli kɛ tɑm tɔɔ.

13 Nyɑ́ kʋpɑntʋ tɔɔwɑ mɑ tɔɔ kɛ́,

nɑ ń yɑkɩ mɑ ləsɑɣɑ kɛ ɑtɛtəlɛ lumɑŋ tɑɑ.

14 Hɑɩ, Ɩsɔ, kɑlɑmpɑɑnɩ nyə́mɑ kʋlɑ mɑ tɔɔ,

mʋsʋntʋnɑɑ kpekəle cɑɑkɩ mɑ weesuɣu ləsʋɣʋ.

15 Amɑ Tɑcɑɑ, nyɑ́ kɛ́ suulu tʋ kɛ́,

nɑ ń wɛnɑ pətɔɔtəlɛ.

Nn mʋɣɩ pɑ́ɑ́nɑ́ kɛ lɔŋ,

nyɑ́ kʋpɑntʋ tɔɔwɑ,

nɑ n lɑkɩ ɩsənɑ n sɩɩwɑ tɔ.

16 Nyənɩ mɑ pətɔɔtəlɛ nɑ ń kɛɛsənɑ mɑ tɔɔ,

hɑ nyɑ́ təmlɛ tʋ mɑɣɑ toŋ.

Mɑ kɛ́ nyɑ́ nyəŋ kɛ́ wɑɑsɩ-m.

17 Lɑ-m mpi pə hʋləɣɩ nyɑ́ kʋpɑntʋ tɔ,

mɑ kolontunɑɑ ɩ́ nɑ́ nɑ pə tʋ-wɛɣɛ fɛɛlɛ.

Mpi tɔ, nyɑ́ wɑɑsəɣənɑ-m nɑ ń hɛɛsəɣɩ mɑ lɑŋlɛ.