1 യിസ്രായേൽ ഈജിപ്റ്റിൽനിന്നും

യാക്കോബിൻ ഗൃഹം ഇതരഭാഷയുള്ള ജനതയുടെ ഇടയിൽനിന്നും പുറപ്പെട്ടപ്പോൾ

2 യെഹൂദാ അവന്റെ വിശുദ്ധമന്ദിരവും

യിസ്രായേൽ അവന്റെ ആധിപത്യദേശവുമായിത്തീർന്നു.

3 സമുദ്രം അത് കണ്ട് ഓടിപ്പോയി; യോർദ്ദാൻ പിൻവാങ്ങി.

4 പർവ്വതങ്ങൾ മുട്ടാടുകളെപ്പോലെയും

കുന്നുകൾ കുഞ്ഞാടുകളെപ്പോലെയും തുള്ളി.

5 സമുദ്രമേ, നീ ഓടുന്നതെന്ത്?

യോർദ്ദാനേ, നീ പിൻവാങ്ങുന്നതെന്ത്?

6 പർവ്വതങ്ങളേ; നിങ്ങൾ മുട്ടാടുകളെപ്പോലെയും

കുന്നുകളേ, നിങ്ങൾ കുഞ്ഞാടുകളെപ്പോലെയും തുള്ളുന്നത് എന്ത്?.

7 ഭൂമിയേ, നീ കർത്താവിന്റെ സന്നിധിയിൽ,

യാക്കോബിന്റെ ദൈവത്തിന്റെ സന്നിധിയിൽ വിറയ്ക്കുക.

8 അവൻ പാറയെ ജലതടാകവും

തീക്കല്ലിനെ നീരുറവും ആക്കിയിരിക്കുന്നു.