14
Paƴi Yéesú ɓëyí lahaˈ jér hufil bisa na hílsúu rë
1 Bisa na hílsúu yëwúɗɗë rë ín, Yéesú dëekúté ñam faam ow di kélfë yí fariseŋŋa. Ɓëewë húmú në rë yípúté íllí wë sun fi na olsuu ri. 2 Ɓëyí lahaˈ jér hufil húmú në. 3 Yéesú won yëeddëh yí kootii Mëyíis a fariseŋŋa tih : « Kootii yen onaˈte ow paƴ jéríɗ bisa na hílsúu rë ëe onaay ? » 4 Ndaa wa kaaˈuute lofi. Tígí daaha, ɗi tíkké jérdë yaˈ paƴce ri, wonte ri saañ faam. 5 Ɗi antee won ɓëewë tih : « Ow di ɗon na lah koy mbée fanfi keen filiɓ yéem koon, wuti hena bisa na hílsúu rëe, ɗi ii rii yíppí nís ë ? » 6 Wa lahuy yii wonun wa di yee meel ri wa baa ra.
Líkínëˈí yuliɗ ndaje
7 Yéesú otte biti haneella tansuu tíkkë këllëh rë, ɗi na líkín wë won wa tih : 8 « Ow gap ro ndaje raa, ngana pay fu tooke tíkkë këllëh rë. Mín lah ɓëyí luk roo gaan dëekúté, 9 yíkíi ndaje ma anti ac won ro tih : “Kolee fu on ɓëyí bee took.” Fay sopoh tígí daaha fu koloh, fu saañ tooke níi tíkkë míllëˈ rë. 10 Ngana hen ɗah ! Fu gapu ndaje raa, lah tooke tíkkë míllëˈ rë ; ɗaaha, yíkíi ndaje ma ac raa mín rëe won tih : “Leɓee dee kooja, fu took tíkkë këllëh rë.” Hen ɗaaha raa, ɓëewë ɗoni wa tooku ra ɓéeɓ ay roo habaˈ ow gaan. 11 Yúhí biti ɓëyí ɓéyíɗ afi ɓéeɓ ay cépírú, te ɓëyí cépíɗ afi ɓéeɓ ay ɓéyrú. »
12 Yéesú antee won yíkíi ndaje ma tih : « Fu ƴahti gapaˈ ndaje raa, ngana gap kooƴƴu, mbée koy-yaayyu, mbée mboko yu, mbée yíkëe yí alalla ɗoni wa dékú rë ; ndée wa fi ƴaaha mínú rëe dëek ñam ɓal, te bín fë rëe, ɗeef wa yínlú rë yee pagiɗ fu wa ra. 13 Fu ƴahti gapaˈ ndaje raa, lah dëeké manti ñëkíɗɗë nen, ɓëewë cérrí wë mitay ra, lëfëñíɗɗë mbée búumíɗɗë. 14 Fu paŋ yii baa raa, keeñu ay naa sos ; wa míníh rëe yíníl, Koope nay roo yínlé yiin nay rii këllé ɓëewë júɓú rë ɓúudé. »
Anili ɓëewë gapu ndaje ma ra
(Saame Maccëe 22.1-10)
15 Ow di haneella kelaˈ ri unni ƴaa ra, won Yéesú tih : « Ɓëeˈ nay maasee ñam Nguur ki Koope ra, keeña ay sos. » 16 Yéesú ñeyaˈte ri léehí beh won ɗi tih : « Lahte ɓëyí cëgíɗté ndaje, gappe ow caak ñama. 17 Tígë në waaƴaˈ ñama woc ra, ɗi wolte súrgíi woni ɓëewë gapu ra biti ñama nonte. 18 Ndaa ɓëyí rí pay ɗii na ɓéeɓ, ɓëeˈ won ɗi biti ɗi ii mín ac. Ɓëeˈ ɗéɓ ɗë won ɗi tih : “Lah wone ri baal soˈ ! Mi liiltee lom meey te mi waɗtee pay kénsëhí.” 19 Ow kay won ɗi tih : “Lah wone ri baal soˈ ! Mi lom fana loˈ sabboo te mi saañ étɗí wë lín ɗee koon.” 20 Ow kay wonil tih : “Lah wone ri manti ɗúhëˈ kooɗ daa tah mii mín ac.”
21 « Súrgëe nimilte kélfëe në, léhínté rí iña wonu ri ra. Keeñ kélfëe haayte, ɗi won súrgëe tih : “Yípée pay këemmë a waalla gina, fu kúɗ ñëkíɗɗë deh, ɓëewë cérrí wë mitay ra, búumíɗɗë a lëfëñíɗɗë.”
22 « Hompe níi súrgëe acce, won tih : “Ɓahaa, mi paŋke yee nah fu soˈ ra ndaa tíkkë líssí tas.” 23 Kélfëe won súrgíi tígí daaha tih : “Tawee waalla luufa, fu cagoh ɓëewë ɗoni wa nay teeˈee ra, wa ac haal nda faam soˈ líif. 24 Mee ron won ra ee : yaˈ ow yínë sah di ɓëewë ɗéɓúu gapu ra ii haal looni soˈ.” »
Ɗee waɗti ñéerúun a Yéesú rë
(Saame Maccëe 5.13 ; 10.37-38 ; Marka 9.50)
25 Lahte bis, Yéesú na saañ, ow caak ñéerúuté a ri. Ɗi yíssëhté waa na, won wa tih : 26 « Ɓëyí ac soo na te ri lukki pokoh boffi na, yaafi, ɓeleɓi, koyyi, koy-yaayyi, mbée ɗi fi afi na raa sah, ɗi mínéh hen taalibeyi soˈ. 27 Ɓëyí enaay kurwahi ñee tal soˈ, mínéh hen taalibeyi soˈ.
28 « Ow fahaˈ taɓah taahi utte raa, ɗi ii took paaƴ olsoh iña waɗ naa haal ra, ɗi yúh nda ɗi ay lah hélsí ay mín lúsíɗ taaha a ? 29 Henay bah, ɗi dal taɓah anti mínéh lúsíɗ rëe, ɓëewë nay ole yii baaha ra ɓéeɓ ay rii ñaawal 30 wone tih : “Ëlí ɓëyée dal taɓah bee te mínéh lúsíɗ rë !”
31 « Te buur koloh haaˈ a buur kay raa, ɗi waray took paaƴ olsoh nda ɓëewí júnní sabboo (10.000) ya lahaˈ ri ra, ɗi ay naa mín haaˈ a buura na yejoh ɗii na a ɓëewí lecsuu ƴii ana ra a ? 32 Hena biti ɗi mínéh rí rëe, ɗi ay wol i ow buuri yínëe në balaa ri koloh, wa ɗaŋ ri nda wa mín júɓëˈ. 33 Ti ɗaaha nen, ow yínë di ɗon na mínéh hen taalibeyi soˈ, hém ri takaay a iña lahaˈ ri ra ɓéeɓ.
34 « Ɗon yúhúté biti miraa yin wun, ndaa wa lahlilay cafka raa, wa ay nimiliruu cafkii wa ɗíh ? 35 Ɗi lahay njiriñ tígí daaha, ɗi wuneh sah tohaa ; ɗi ay yúfú sénín. Ɓëyí lah nuf kelaa, kelaan na ! »