1Nugkak ashí Tuke Pujuunui,

nunú nugkanum ashí ayá duka,

nuwi batsamin aidaujai

ashí niinu ainawai.

2Wagki nugka tujig asatnunak nii umikui,

dutika nayantsanum,

namak aidaunum aatus

emetug idaisauwai.

3Tuke Pujuu mujaji etegkamua nuwish

¿yaki wakainta?

Apajuí jee pegkegma imannummash

¿yaki wayash pujusainta?

4Nunak aents pegkegchaun takachu,

anentai pegkeg,

dakumka najanamun emematchau,

umikchatnaitak tsanumak

Apajuí daajin adayas

dekas umiktatjai tuu wekaechau,

nuwig wayawagtinai.

5Nunú aentsnak

niina apuji Apajuíya nunú uwemtijatnai.

Tuja niinak Tuke Pujuu

pegkegnum yumigkig,

ayamjuk shiig pujutan susatnai.

6Tuke Pujuu, Jacopa Apajuíjiyah,

aents amina egapaidauk,

dutika yayaam agtinai.

Tuja amina segapaina nuna uchiji aidaushkam

dutiksaik yayaam agtinai.

7¡Jerusalégka waitijiya nunú ujaitajum!

¡Yaunchuk waitai aajakua

nunú ujai idaisatajum!

¡Apu pegkejam niina imanjin nayaimpinum,

nugkanmash inamna nunú wayattawai!

8Apu pegkejam niina imanjin nayaimpinum,

nugkanmash inamna dusha ¿yaita?

Duka dekas iina apuji

Tuke Pujuu niina shiwaajinash ishamchau,

wajiuwa nunuwai.

9¡Jerusalégka waitijiya nunú ujaitajum!

¡Yaunchuk waitai aajakua

duka ujai idaisatajum!

¡Apu pegkejam niina imanjin nayaimpinum,

nugkanmash inamna nunú wayattawai!

10¿Yaita nayaimpinum,

nugkanum inamna dusha?

¡Duka Israel aents aidaun Apujiyai!

¡Duka Tuke Pujuu ashí senchigtina nunuwai!

¡Niiyai dekas apu pegkejam,

niina imanjin nayaimpin, nugkan apujiya nunú!