1Mame morara ahtao Papironia tuisary, Merotake-Paratã, Paratã mũkuru zuaro toehse Ezekia kure pyra ehtopõpyry poko, yrome seromaroro kure ropa toehse. Naeroro tynymerohpyry tonehpose eya Ezekia neneryme, tynekarory maro. 2Mokaro omi enehnanõ toahmase Ezekia a tytapyĩ taka toto omõtohme. Mame eya xine tykyryry tõ kurã emero tonepose eya, parata te, uuru roropa, tonahsã kurãkõ roropa, ixtaratu te, typyre tõkehko etonatoh mõkomory. Emero tykyryry tõ, mõkomo kurãkatoh tao, imehnõ tapyĩ tao roropa tonepose eya xine. 3Morarame urutõ Izaja toytose tuisa Ezekia a ekaropose, ynara tykase:

— Otokoino tooehse mokaro nahe? Otara nykã toh oya? tõturupose Izaja Ezekia a.

— Moe nono poe tooehse toh nexiase, Papironia poe, tykase Ezekia.

4— Oty tonese eya xine atapyĩ konõto tao? tykase, tõturupose Izaja.

— Tonese emero porehme, tykase Ezekia. — Emero enepoase eya xine mõkomo kurãkatoh tao.

5Mame ynara tykase Izaja tuisa a:

— Ynara ãko Ritonõpo Jamihmehxo Exikety oya: 6“Imeĩpo ynara exĩko mana, omõkomory emero atapyĩ konõto tao exiketõ, atamuru tõ nukurãkatyã, emero tarosẽme exĩko Papironia pona. Arypyra exĩko mana. 7Toitoine opoenomo, apakõ roropa tarosẽme exĩko mã toto namotome, mame tomukase toto ahtao erohnõko mã toto Papironia tuisary tapyĩ tao.”

8Morara kary etaryke tyya, tuisa Ezekia ynara tõsenetupuhse, etonara exĩko isene ro jahtao, jorikyry ponãmero. Naeroro tozuhse ynororo, ynara tykase:

— Ritonõpo nekarohpyry oya jurutohme kure mana.