1Morara exiryke Izyraeu tõ emero tõximõse toto moemoẽkomo, Tã nonory poe inikahpoẽkomo te, Peresepa põkomo ikurenaẽkomo te, Kireate poe xixi tũtatoh wino exiketomo, enara. Tõximõse toto Mixipa pona, Ritonõpo ẽpataka, toiro imoihmãkõ samo. 2Izyraeu tõ tamuximãkõ moroto kynexine porehme Ritonõpo poetory tõ oximõtoh tao. 400 miume orutua kõ kynexine, ãtamorepatyamo etonatoh poko. 3Pẽjamĩ tõ tuaro toehse toto, imehnõ Izyraeu tõ emero oximõme ehtoh poko Mixipa po. Izyraeu tõ ekaropory se toh kynexine:

— Oty katohme sero popyra ehtoh toehse?

4Mame turuse toto rewita a, nohpo taorihmapose exikety niõpyry a. Ynara tykase ynororo:

— Toeporehkase ywy, ypyty maro Kipea pona, Pẽjamĩ tõ nonory pona nyhse. 5Morotona orutua kõ Kipea põkõ tooehse, tapyi tapurupose eya xine koko. Jetapary se toh nexiase, yrome ypyty poko tõmehse toto, mame norikyase ynororo. 6Morara exiryke ekepyry tapoise ya. Tyrakase ya apiakatohme zokonaka aropotohme Izyraeu tomo a, 12me oxiekyry tomo a. Mokaro a popyra ehtoh tyrise xihpyryme, Izyraeu tõ rãnao. 7Amarokõ emero Izyraeu tõme matose. Osenetupuhtoko, otara ãko sytatou?

8Mame imoihmãkõ, Izyraeu tõ emero towõse oximõme, ynara tykase toto:

— Ytopyra ropa sehtone tapyi taka emero porehme. 9Orutua kõ symenekatone etonatohme Kipea põkõ maro. 1010 miume ahtao toiro miume erohnõko mã toto soutatu tõ napyry riry poko. Imehnõ emero ytõko mã toto Kipea põkõ wãnohse toto nyrihpyry xihpyry emetakame.

11Morara exiryke Izyraeu tõ tõximõse toto Kipea põkõ maro etonatohme. 12Omi aronanõ tonyohse Izyraeu tomo a Pẽjamĩ nonory poro ynara kase:

— Popyra ehtoh xihpyry tyrise oya xine. 13Morara exiryke mokaro popyra exiketõ, Kipea põkõ enehpotoko xiaro, toto etapatohme kyya xine. Morara ahtao sero popyra ehtoh enahkãko sytatose Izyraeu tõ rãnao.

Yrome Pẽjamĩ tõ Izyraeu tõ omiry onetara toehse toto. 14Tutũtase toto typatarykõ poe emero, Kipea pona toytotohkõme etonatohme Izyraeu tõ maro. 15Moro ẽmepyry ae 26 miume soutatu tõ tonehpose eya xine. Moromeĩpo Kipea põkõ soutatu tõ tõximõse 700me roropa, inymenekatyamo, 16emese kure tomarykõ ke typozerykõ wino. Topu ematoh ke topu emary waro toh kynexine, onyetohpyra toh kynexine. 17Imehnõ Izyraeu tõ tõximõse 400 miume soutatu tomo, tamorepase aexityamo.

18Mame Izyraeu tõ toytose Ritonõpo eahmatoh pona, Peteu pona. Moroto tõturuse toto Ritonõpo a:

— Onokãkõ ytõko nah osemazuhme etonase Pẽjamĩ tõ maro? tykase toto.

— Juta tomo, tykase Ritonõpo eya xine.

19Yrokokoro Izyraeu tõ tõnuhse, osesarise pata Kipea pũtokoxi. 20Tutũtase toto etonatohme Pẽjamĩ tõ maro. Tosarykõ tymenekase toto a pata etonie tõsetapatohkõ eraximatohme. 21Mame Pẽjamĩ tõ soutatu tõ tooehse toto pata poe. Izyraeu tõ totapase eya xine 22 miume kohmãpyra ahtao ro. 22-23Mame Izyraeu tõ toytose ropa Ritonõpo eahmatoh pona. Ritonõpo ẽpataka tyxitase toto kohmamyry pona. Tõturupose toto Ritonõpo a:

— Yna ytory se ropa hma etonatohme yna ekyry tõ Pẽjamĩ tõ maro? tykase.

— Ỹ, tykase Ritonõpo.

Morara exiryke tyjamihtase ropa Izyraeu tomo. Soutatu tõ tyrise ropa eya xine tosarykõ pona, yrokokonie aehtopõpyrykõ saaro. 24Mame Izyraeu tõ soutatu tõ toytose ropa osetapase Pẽjamĩ tõ maro. 25Tutũtase ropa Pẽjamĩ soutatu tõ pata Kipea poe. Mame 18 miumãkõ totapase eya xine, Izyraeu tõ soutatu tomo, ãtamorepatyamo. 26Naeroro Peteu pona tõnuhse ropa Izyraeu tõ porehme xitase. Moroto tehme toh kynexine, Ritonõpo Tosẽkõ ẽpataka. Otuhpyra toh kynexine kohmamyry pona. Okyno tõ tyahkase eya xine tynekarorykõme Ritonõpo a. Osepeme ehtoh tokarose roropa eya xine, tynekarorykõme Ritonõpo a. 27Tõturupose ropa toto toiro Ritonõpo a. (Morara ahtao Ritonõpo omihpyry ẽ moroto kynexine Peteu po. 28Ipoko Pineia kynexine, Ereaza mũkuru, Arão pary, oturuketyme.) Ynara tõturupose toto Ritonõpo a:

— Yna aropory se ropa hma etonatohme yna ekyry tõ maro, Pẽjamĩ tõ maro? tykase toto.

— Ỹ ytotoko, osetapatatoko. Kokoro toto poremãkapõko ase oya xine, tykase, Ritonõpo a tozuhse ynaroro.

29Mame Izyraeu tomo a soutatu tõ tonẽpose pata Kipea zomye. 30Ẽmepyry oseruaõ po toytose toto osetapase ropa Pẽjamĩ tõ maro. Soutatu tõ tosaka xine toytose toto tõsetapatohkõ eraximase Kipea etonie apitoryme toehtopõpyrykõ saaro. 31Pẽjamĩ soutatu tõ tutũtase osetapase. Amekehxo toehse toh kynexine pata a. Apitoryme sã ahno totapapitose eya xine Peteu esema tao te, Kipea esemary ae te, ona po roropa. Izyraeu tõ totapase eya xine, otarame 30me. 32Ynara tykase toto:

— Mokaro poremãkãko sytatose apitoryme kuehtopõpyrykõ samo.

Yrome ynara tykase Izyraeu tomo:

— Sepatone aporo, kuekahmapotohkõme eya xine osema tõ pona.

33Naeroro Izyraeu soutatu tõ, imoihmãkõ toesyryhmase moro poe oximõtohme ropa Paau-Tamara pona. Yrome mokaro aotonẽtyã pata zomye exiketõ, tutũtase toto, axiny tõtonẽtopõpyrykõ poe jakuraramã rãnaka. 3410 miume Izyraeu soutatu tõ, orẽpyra exiketõ toytose osetapase Kipea põkõ maro. Yronymyryme tõsetapase toto. Tuaro pyra Pẽjamĩ toh kynexine typoremãkaporykõ poko eya xine. 35Ritonõpo a Pẽjamĩ soutatu tõ typoremãkapose Izyraeu tomo a 25.100me soutatu tõ totapase eya xine. 36Mame tonetupuhse Pẽjamĩ tomo a typoremãkatopõpyrykõ poko.

Izyraeu tõ toepase sã Pẽjamĩ tõ poe aporo, osetaparyhtao toto maro, orẽpyra tope tõ, Kipea zomye aotonẽtyã tokarose eya xine. 37Mame tutũtase toto axiny, toytotohkõme Kipea pona. Sapararahme toytose toto, pata põkõ totapase eya xine, emero porehme. 38Osemazuhme tõturuse toto otonẽpyra ro toto ahtao, ynara tykase toto:

— Zuaro exĩko matose, orexĩto eneryhtao oya xine akurũ sã konõto onuhnõko pata poe, 39Izyraeu tõ, jarao exiketõ, ameke awahtao xine ro, eramatoko etonatohme mokaro maro, tykase toto. Moro pona 30me Izyraeu tõ totapase Pẽjamĩ tomo a, ynara tykase mokaro etapahpõkomo:

— Aõ, typoremãkase ropa toto, kokonie ehtopõpyry samo, mokokonie ehtopõpyry sã roropa, tykase toh repe. 40Mame orexĩto tonese akuru sã konõto onuhpitõko pata poe. Tỹkakoxi xine tõsenuhmase Pẽjamĩ tõ ahtao, tõserehse toto, pata tytororo zatyry eneryke tyya xine. 41Naeroro Izyraeu orutua kõ toeramase toto, mame tonaroxitapãse Pẽjamĩ tomo tonatyrykõ eneryke tyya xine. 42Toepase toto ona pona, ahno esaka pyra repe. Yrome osewomasaromepyra toh kynexine. Tomyehmase toto Izyraeu soutatu tomo a. Imehnõ roropa pata zahkaxĩpo tutũtase ropa mokaro ekahmase roropa, tonahkase toto emero. 43Topetõkara tomyehmase Izyraeu tomo a, tapurupose toto. Toto ekahmaryme totapase toto Kipea poe xixi tũtatoh wino, totatotapase toto eya xine osema ae. 4418 miume soutatu tõ totapase eya xine, emese kure exiketomo, Pẽjamĩ tomo. 45Imehnõ toepase ona pona topu Rimõ pona. Yrome 5 miumãkõ totapase osema takuroko. Imehnõ tokahmase Izyraeu tomo a, Kitõ pona. 2 miume orutua kõ totapase eya xine moroto. 46Atapona 25 miume Pẽjamĩ tõ totapase moro ẽmepyry ae, orẽpyra exiketomo.

47Yrome 600mãkõ toepase toto ona poro topu Rimõ pona. Moroto 4me nuno taropose eya xine. 48Imehnõ Pẽjamĩ tõ totapase Izyraeu tomo a toto patary tõ po ahno totapase porehme okyno tõ roropa tapyi tõkehko tonahkase eya xine. Ipatarykõ tyahkase eya xine toto nonory po porehme.