2“Jo, jerehnõko mase;

torẽtyke jexiryke axĩ oezuhnõko ase.

3Jupokaryke oya jyhxirõko mase,

yrome oezukuru waro ase zae ehtoh ke.

4“Ynara zuaro mase, moino ro nexiase,

ahno exipitotopõpyry poe sero nono po etyorõmara mana:

5Popyra exiketõ axĩtao rokẽ tãkye exĩko mã toto.

Okynã pyra tãkye toto ehtoh enahnõko ropa mana.

6Tõnuhse ynororo ahtao kakoxi, kapu aka samo, zupuhpyry akurũ aka,

7jũme tonahkasẽme exĩko mana oruno samo.

Mokyro waro exiketõ ipoko zuaro pyra exĩko mã toto.

‘Otara toehse mokyro?’ ãko.

8Osenehto sã osenepyra exĩko ropa mana, koko osenehtopõpo sã, jũme onenepyra ehtohme.

9Popyra exikety onenepyra exĩko imehnõ mana,

esary po exĩko.

10Imõkomohpyry ekarõko ropa imũkuru tõ mana

tymõkomokãkara a, inematonanopyhpyry,

inapoihpyry imehnõ enekunohtopõpyry ke.

11Zokokõ nuaseme aexihpyry, jamihme roropa,

okynã pyra nonome exĩko mana.

12“Popyra exikety a, popyra ehtoh anusasame mana.

Tunuru zopino moro zonẽnõko mana.

13Tỹtary ao ikurãkãko mana, tomepore mana, emepory jamaro exiryke.

14Yrome imeĩpo zuakuru ao zehnãko mana.

Itũ exĩko, opi orihmatõ itunety samo.

15Mokyro popyra exikety enarutãko mana, mõkomo kurã tomatonanohse ahtao eya;

morohne oũko Ritonõpo mana zuakuru ae.

16Okoi epity ẽtoh samo;

moro opi mokyro orihmãko mana.

17Iporiry tõ azeite ke pehme onenepyra

ekurehnõko popyra exikety mana, suhsu onẽpyra,

ano zeni onenahpyra roropa mana.

18Emero tymõkomory rumekãko mana.

Toerohtamitu nomõko mana.

Tytinerũ poko ehsaromepyra exĩko mana, enara.

19Tymõkomokãkara tyrohmanohpose eya,

mame tuenikehse ynororo toto poko,

imepỹ tapyĩ tapoise eya esẽ winoino tytapyĩme,

yrome tytapyĩ onyripyra tokurehse ynororo.

20Tãkye nymyry pyra mana tymõkomory poko;

itamurumehxo ise ro exikehpyra mana.

21Emero rokẽ apoiry kuhnõko mana,

yrome imõkomory enahnõko mana.

22Imehxo toehse ynororo ahtao popyra ehtoh epona epukãko mana;

totapase sã exĩko mana toetuarimaryke.

23“Ah notuhno tuesapare ehtohme!

Mokyro zehno toehtoh ke mokyro wãnohnõko Ritonõpo mana;

konopo sã mokyro zehno Ritonõpo ehtoh oehnõko mana epona.

24Epanohtao tapema kurimene risẽ wino

osepynanohtohme, pyrou ke tuosẽme exĩko mana ipotyry metau risẽ ke.

25Moro pyrou oũko mã toto ĩpary wino, tũtãko

mana zemime imunuru ke. Mame enaroxitapãnõko mana.

26Imõkomory emero inapoityã tonahkasẽme

exĩko mana. Apoto ke, ahno onyripyra aexihpyry

ke, tyahkasẽme exĩko mana itapyĩ taõkõ maro.

27“Popyra exiketõ rypyry enepõko kapu mana,

sero nono owõnõko mana toto hxirotohme.

28Moro ẽmepyry ae zehno Ritonõpo ehtoh tukuãse ahtao epona xine,

itinerũ imõkomory roropa tonahkasẽme exĩko mana, emero porehme.

29Senohne rĩko Ritonõpo mana popyra exiketõ pona;

moro kurãkãko mana, epehpyryme popyra exiketõ epehmatohme.”