1Mihem ten dangka kilaidohna aheuvin, chule iti kilhit theng ding ham ti aheuve. 2Leisetna konna thih kilaidohna ding mun aheuvin, songpi a konna sum eng sontwi je aheuve. 3Chule leiset a gambeh gamla pen pen jong akhol doh uvin, thih ahol nau muthim lah a khovah sah je aheuve. 4Mihem ho chenna a kon gamla tah a leiset a kokhuh avut un, khaovin akumsuh uvin anung leh ama ah akivol leuve. 5Neh le chah hi leiset chunga kitu ahin, ahinlah anoi langa leiset hi meiya kihal jun ji ahi. 6Hiche a songho lah a chu songval mantam tah um ahin, chuleh leivui lah a chu sana umah ahi. 7Hiche gou hohi chunga leng hingne hon jong amu theilou, chule vacha neo mit in jong amutheilou ahi. 8Hiche gou ho chunga hi gamsa ho jengin jong ajot khah louhel ahin, keipi bahkai jengin jong atin a akhoi khah louhel ahi. 9Mihem in songgel song keh soje aheuvin chuleh mol lekhup je jong aheuve. 10Amahon songpi lah a kohom avut un chuleh song mantam manlu tah tah ho chu aladoh uve. 11Valha chet chut a long luidung ating tan jiuvin chuleh akiselguh gou jouse khovah a ahin polut jiuve. 12Ahinlah mihem ten chihna hi hoiya kimudoh ding ham ti ahet uvem? Thilhet khen theina hi hoiya amu thei diuvem? 13Hoiya kimu ham ti koima chan ahepoi, ijeh inem itile hichehi mihing gamsunga kimulou ahi. 14Hiche ah aumpoi tin twikhanglen in aseijin Twipi thuhtah in jong keikomma aumpoi ati. 15Chihna chu sana a choh thei ahipon, dangka a choh thei jong ahipoi. 16Ophir am asana jouse sanga jong manlu jo ahin, manlu tah onyx leh songval sanga jong thupi jo nalai ahi. 17Chihna hi sana leh songval sanga mantam jo ahin, song mantam kijepna chung sana hoitah chonga jong choh thei hilou ahi. 18Chihna chohna dingin coral leh jesper songmantam teni jong hi phachom lou ahin, chihna man ding chu hiche song mantam sang sanga jong sangjo nalai ahi. 19Ethopia gam'a song mantam Peridot tojong lhet thei hilou ahin, sana theng pen pen sanga jong manlu jo ahi. 20Ahinlah mihem ten chihna hi hoiya konna kimuthei ding ham ti ahe thei diuvem? Thil hettheina hi hoiya amu diu ham? 21Mihem te mitmu a konin akisel tan chung leng vacha mit hat pen in jong amu doh joulou ahi. 22Manthah nale thinan asei lhonin keinin jong chihna hi hoiya kimu ding ham tithu kithang bou kaja lhone. 23Pathen ama changseh in bou chihna lampi hoiya kimu ding ham ti ahet ahi. 24Ijeh inem itile aman leiset chung hi apumpia avet ji ahin, vannoija thil umjouse hi amusoh kei ahi. 25Aman hui ichan hat a nunsah ding chule go ichan a juhsah ding ti agel lhuh sa ahi. 26Aman gojuh ding dan asempeh in chule kolphe vahna ding lampi asempeh e. 27Hiti chun aman chihna chu ana mun chule manlu tah ahi, ahin munkhat ah akoijin hoitah in akhol chiljin ahi. 28Chule aman mihem te jah a asei chu hiche hi ahi. Pakai gin kiti hi chihna chu ahin, thilse a konna kiheidoh kiti hi thil hetkhen theina chu ahi. ✡