1Miniriwa dana naychichipeh no bōyot saw no Pilisteo a machigobat dyirad Israelitaw. Nakpeh saw Pilisteo do Sokoh do Joda, kan nagkampo sa do Epes-dammim do nagbaetanaw no Sokoh kan Aseka. 2Si Saulo kan siraw Israelitaw, ki naychipeh sa met, kan nagkampo sa do Payahosongan no Ela. Dawriw nagsaganāan da a machigobat a kontra dyirad Pilisteowaw. 3Siraw Pilisteowaw, ki nagpwisto sa do asa tokon. Nagpwisto sa met Israelitaw do asaw a tokon, as nagbaetan daw payahosonganaw.

4Sinpangan na, myan minohtot a yapo do kampo daw no Pilisteo saw a asa pangab-ābak da a mayngaran so Golayat a taga Gat. Nasorok a sasyam a kadapan so kakarang. 5Naytabahos so pachigobat a tombāga, kan naylaylay* so naparin do tombāga a dadima poho kan papito a kakīlo so karahmet. 6Siraw kokod naw, ki myan sarāpa da a tombāga. As myan paw chibot na a tombāga a sinadin na do pakoh naw. 7Iyaw paningalan naw no chibot naw, ki akmay aho. As iyaw dāwa naw, ki malābit papito a kakilo.

8Naytēnek si Golayat kan inngēngey na dyirad bōyot saw no Israelita a kāna, “Āngo pagpwisto nyo daw a machigobat? Pilisteo ako abawri, as kan pachirawatan nabawri inyo ni Saulo? Mamidi kamo so asa a gomchin daw, ta mangay dyaken! 9An kalabānen na yaken kan dimanen na yaken, ayket na, adīpenen nyo yamen. Ki an iyaw abāken ko kan dimanen ko, namna, parinen namen met inyo a adīpen namen kan pagsīrbyan nyo yamen.” 10Binata na pa no nya Pilisteo a kāna, “Changori a araw, karīten ko bōyot saya no Israelita. Manoboy kamo so asa a machilāban dyaken!” 11Do nakadngeyaw ni Saulo kan siraw Israelita saw so nyaya, ki taywara sa a nabakel kan namo do inbaheyaya no Pilisteowaya.

12Si Dabid, ki pōtot ni Jesse a yapo do partīdos dan kapoonan ni Eprata do idi a Betlehem do Joda. Si Jesse, ki myan wawaho a pōtot na a mahahakay. As do kapagāri naw ni Saulo, ki laklakayan dana do dāwri. 13Siraw tatdwaw a matotoneng a pōtot ni Jesse, ki nachangay sa di Saulo a may a machigobat. Siraw nyaya, ki si Eliyab a katotonngan, si Abinadab a somarono, kan iyaw chatatdo daw a si Sammah. 14Si Dabid, ki iyaw boridek. Siraw tatdwaw a matotoneng, ki minonot sa di Saulo. 15Ki si Dabid, ki maybibidi a yapo do yanan Saulo kan do Betlehem a may a manyideb siras karniro naw ni āmang na daw.

16Do irahem no apat a poho a karaw, kāda mabekas kan mahep a yay na sa karkarīten ni Golayat a Pilisteo.

17Do asa karaw, binata ni Jesse di Dabid a kāna, “Manghap ka so asa epah† do nakirogaya a byas, iyaw asaya poho a kamemeh a tināpay, as kan kalistwan mwa iyangay dyirad aākang mo saw do kampo. 18Mapanaybi ka pa so asa poho a keso a para do komanderaw. Chiban mo an māngo dana saw aākang mo saw. As anchan maybidi ka, mangyonot kanchi so pangsigorādo sya a narawat da.” 19Siraw kakakteh saw ni Dabid, ki myan sa di Saulo kan dyirad bōyot daw no Israelita do payahosonganaw no Ela a machigobat dyirad Pilisteo saw.

20Do kamabekasanaw, minhep a nayokay si Dabid, kan intalek na saw karnirwaw do asaw a mangay-aywan, as nakakaro narana a nanghap so bahon saw a akmas inbilin naw ni Jesse a āmang na. Do nakapakarapit naw do kampo, kosto sa a maychahohtot bōyot saw a mangay do pagpwistwan daw a machigobat, as inngēngengey daw īto a gobat. 21Siraw Israelitaw kan siraw Pilisteowaw, ki nagpwisto dana saw bōyot da saw a naysinsasalap. 22Tod dana intalek ni Dabid bahonaw do magbantayaw so warawara, as nakapayyayo na nangay do nagpwistwan daw a mangkablāaw siras aākang na saw. 23Do kapachisarsarīta naw dyirad aākang na saw, naypantad si Golayat a Pilisteo a pangab-ābak da a taga Gat do nagpwistwan daw no Pilisteo. As nakaingēngengey na so akmas sīgodaw a inbaheybahey na dyira, ki nadngey ni Dabid. 24Do nakaboya daw no Israelita saw so mahakayaw, ki naychapayyapayyayo sa a tabo do taywara a kāmo da.

25Binata dan Israelita saw a kon da, “Maboya nyoriw nwanaw a mahakay a kararaw a mangkārit so Israel? Manoroh kono si āri so rakoh a tangdan no makadiman sya. As itoroh na panchiw balāsang naw a kabahayen na, as kan libryen nanchiw pamilya ni āmang na a magbwis do Israel.”

26Inyahes ni Dabid dyirad soldādwaw a maytēnek do masngenaw dya a kāna, “Āngo mahap no makadiman so nya Pilisteo kan makaponas so pakasnesneskan no Israel? On, sino nwanaw a dya nakōgit a Pilisteo a mangkārit so bōyot saya no sibibyay a Dyos?”

27Siraw soldādo saw, ki mayeyengay initbay da a kon da, “Komwan anchiw maparin do tawowaw a makadiman sya.”

28Do nakadngeyaw sya ni Eliyab a iyaw katotonnganaw a kakteh ni Dabid a machisarsarīta dyirad soldādwaw, ki taywara a nakasoli kan inyahes na a kāna, “Āngo nangayan mo dya? Sino nanokosan mo siras papere saw lang a karniro do let-ang? Chapatak ko kakospag mwaw kan karahet do pōso mo, ta nawriw nangayan mo dya iyaw kapagbōya mo so gobat.”

29Inyahes ni Dabid a kāna, “Ta āngo pinarin kos changori? Maparin ko abawriw maychirin?” 30Nayweswes a nangay do matarek, as nakapanahahes na, ki iya-iyaw atbay da dya. 31Siraw inchirinaw ni Dabid, ki nadngey da no kadwan kan naipadāmag di Saulo. As do dāwri, ki tinawagan iya no āryaw.

32Inbahey ni Dabid di Saulo a kāna, “Abo pakono iyaw magtatakrot maynamot do dyaya a Pilisteo. Yaken a pachirawatan mo, mangay a manglāban sya.”

33Ki tinbay ni Saulo a kāna, “Awan! Bāgay kaba manglāban so nya Pilisteo ah. Barīto ka paya. As kan iya, ki naglaklakayan naranayaw gobat.”

34Inbahey dana ni Dabid di Saulo a kāna, “Mo āpo, iyaw nya pachirawatan mo, ki mangay-aywan so karniro ni āmang na. An mangay lion mana oso a mangipayyayo so asa karniro do arban, 35lakatan ko sa a dimanen, as kahap ko so karnirwaw do dangoy daw. An sarangen na yaken, kamten ko minyin naw, as kamalo kan kadiman ko sya. 36Iyaw nya pachirawatan mo, ki nangdiman danas lion kan oso. Dawa, iyaw nya dya nakōgit a Pilisteo, ki akma met asa dyira, ta kariten na sayaw bōyot saya no sibibyay a Dyos. 37Iyaw no ĀPO a nangisalākan dyaken do koko naw no lion kan oso, ki isalākan nanchi yaken do kakamay na no nya Pilisteo.”

Tinbay ni Saulo si Dabid a kāna, “Na, makatoneng ka ah. Si ĀPO danaw myan dyimo.”

38Do dāwri, linaylayan ni Saulo si Dabid so laylay naw a pachigobat. Pinatabahos naw tombāgaw do oho naw kan linaylayan na so tombāga. 39Sinohot ni Dabid ispāda naw a pinakatayhapot do laylay naw a pachigobat, as nakaipādas nas mayam, ki kaya naba, ta nakaywaman naba.

Ki inbahey ni Dabid di Saulo a kāna, “Awan! Maiyayam ko sabaw nyaya, ta nakaywaman ko sabaya.” Dawa, binahas na sa. 40Basbāli a inhap naw paysaysarokod naw, as nakapamidi nas dadima mapīno a bolinawen do oksongaw, as nakaposek na syad bayon naw. As sinahabit naw palsiit naw, kan naypasngen a minsalap so Pilisteowaw.

41Iyaw Pilisteowaw kan iyaw taga-sahabit naw so armas a manmanma kan iya, ki naypaypasngen sa di Dabid. 42Do kachidechideb naw no Pilisteowaya si Dabid, inchichipa na iya, ta barīto lang, makababāya so pisnyi, kan magwapo pa. 43Binata na di Dabid a kāna, “Chito akori a yangayan mo so babāot?” As do ngaran dan dyos na saw no nya Pilisteo, inabay na si Dabid. 44Inngēngey na a kāna, “May ka dya, ta ipakan ko asi mwaya dyirad manomanok saya kan dyirad bolaw saw a animal!”

45Tinbay ni Dabid Pilisteowaw a kāna, “Nangay ka dya a myan so asa a manyid kan asa a manaro a chibot kan siiispāda do salapen ko. Ki yaken, nangay ako dyimo do ngaran ni ĀPO a Manakabalin do Tābo a Dyos dan bōyot saw no Israel a karkarīten mo. 46Sicharaw, iparawat nanchi imo ni ĀPO dyaken. Potohan konchi imo a dimanen. On, sicharaw, itoroh konchiw bangkay saw no bōyot no Pilisteo dyirad manomanok saya kan dyirad bolaw saw a animal do tanaya tan mapatakan danchi no tabo a myan Dyos no Israel. 47Tabo no naychichipeh saya dya, ki mapatakan danchi a iyabaw ispāda mana chibot iyaw pangisalākan ni ĀPO. Ta no lāban, ki dyira ni ĀPO, kan iparawat nanchi inyo dyamen!”

48Do nakapaypaypasngen naw no Pilisteowaw a mangdarop sya, nakalyalisto si Dabid a nayyayo a lomnongo do nagpwistwan daw a machigobat a nangbayat sya. 49Kinalawas naw bayon naw, kan napahtot so asa a bolinawen. Winerwer naw palsiit naw, kan nanaho naw moyen naw no Pilisteowaw. Nachilabeng bolinawenaw do moyen naw, kan nalba a naysasakeb do tana.

50Dawa, nagballīgi si Dabid do Pilisteowaw do palsiit naw kan bolinawenaw. Nanaho kan diniman na iya. Abaw ispāda a inigpet na.

51Nayyayo si Dabid a naytēnek do bītaw no Pilisteowaw. Inhap naw ispādaw ni Golayat, as nakaāsot na sya kan diniman na. Sinpangan na, pinotohan na.

Do nakaboya daw no Pilisteo saw a nadiman iyaw pangab-ābak daw, ki nayyayo sa. 52Do dāwri, siraw bōyot saw no Israel kan Joda, ki nangngēngey sa a nanglakat siras Pilisteowaw nandad ayamanaw a mangay do Gat kan manda do rowanganaw no Ekron. Naychaharaharag nadiman saw a Pilisteo a yapo do Saarim a mangay do Gat kan Ekron. 53Do nakapaybidi daw no Israelita saw a yapo do nakalakat daw siras Pilisteowaw, nagsamsam sa do nagkampwan daw no Pilisteo. 54Inhap ni Dabid oho naw no Pilisteowaw, kan ikwan nanchi do Jerosalem. Ki siraw armas saw no Pilisteowaw, ki kinapya na sa do bōkod naw a tolda.

55Do nakaboybōya naw ni Saulo si Dabid do kangay na paw a mangbayat so Pilisteowaw, inyahes na di Abner a iyaw komander dan bōyot naw a kāna, “Sino akin pōtot so nya barīto?”

Tinbay ni Abner a kāna, “Isapata ko a akmas kasigorādo no kasibibyay mo, mo Āri, chapatak kwabaya.”

56Binata no āryaw a kāna, “Ngay, yay mo pa doktalan an sino iya.”

57Apāman a nakapaybidi si Dabid a yapo a nangdiman so Pilisteowaw, inhap ni Abner si Dabid a myan na pa a sahabiten ohwaw no Pilisteowaw, as kinayrayay na a inikwan di Saulo.

58Inyahes ni Saulo dya a kāna, “Sino akin pōtot dyimo?”

“Yakenaw pōtot naw ni Jesse a pachirawatan mo a taga Betlehem,” atbay ni Dabid.