1Mɑ wɛ kɛ́ ɩsɩɩ Sɑlɔŋ tɛtɛkǝlɛ yɑɑye.

Mɑɣɑlɛ tɛtʋ ɩhǝntɑʋ tɑɑ hɛtʋ.

2Ɩsɩɩ yɑɑye wɛʋ sɔwɑ hɛkʋ tɔ,

ḿpʋ́ɣʋ́ mɑ kʋsɔɔlɑɣɑ nyɑ́ n wɛ pɛɛlɑɑ lɛlɑɑ tɑɑ.

3Ɩsɩɩ tʋɣʋ kʋtɔtɔɣɔʋ wɛʋ hɔtʋɣʋ tɩɩŋ tɑɑ tɔ,

ḿpʋ́ɣʋ́ mɑ kʋsɔɔlʋ nyɑ́ n wɛ ɩfepiyɑ lɛlɑɑ tɑɑ.

Nyɑ́ ɩsotom tɑɑ kɛ́ mɑ nyɩɩlɑ cɑɣɑʋ.

Nyɑ́ pee wɛ leleŋ kɛ mɑ nɔɣɔ tɑɑ kɛ́.

4Acimɑ tɑɑ kɛ́ n ponɑ-m nyɑ́ tɛ.

Nyɑ́ tuutɑ wei n kpɑɑsɑ mɑ nyʋɣʋ tɑɑ tɔɣɔlɛ sɔɔlʋɣʋ.

5N cɛlɑ-m tʋɣʋ ŋku pɑ yɑɑ sɩ lɛsɛŋ tɔ kʋ pee

kɑkɑlɑsɩ nɑ mɑ́ tɔɣɔ nɑ pǝ́ sǝnɑ-m.

N hɑ-m tʋɣʋ pee nɑ mɑ́ mʋʋ nɑ pǝ́ hɑ-m tomɑ.

Mpi tɔ, sɔɔlʋɣʋ kʋtɔŋ kpɑ-m kɛ́.

6Te mɑ nyʋɣʋ nɑ nyɑ́ niŋ mpǝtǝŋ.

Kpɛkǝnɑ-m nɑ nyɑ́ ntɔɣɔŋ.

7Hɑɩ, Yosɑlɛm pɛɛlɑɑ mɛ,

mɑ tuukinɑ nɑmǝŋ nɑ nɑsɛŋ sɩ:

Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.

8Ɩ́ nɩɩ mɑ kʋsɔɔlʋ nɔɣɔ.

Ɩ ŋmɑɑkǝnɑ ntɛɣɛ pɔɔŋ nɑ pulɑsɩ tɔɔ nɑ ɩ́ kɔŋ.

9Mɑ kʋsɔɔlʋ nǝɣǝsǝnɑ kɛ́ ɩsɩɩ nɑsɛm

yɑɑ kɑpǝlǝŋɑ kʋfɑlɑɣɑ.

Hɑlɩ ɩnǝɣǝlɛ tɑ́ koluŋɑ wɑɑlɩ nɑ ɩ́ nyǝnǝɣǝnɑ pǝtote.

10Ɩ yɑɑkɩ-m sɩ: Mɑ kʋsɔɔlɑɣɑ nyɑ́.

Kʋlɩ nɑ ń kɔɔ.

11Mpi tɔ, yolumɑ tɛmɑ.

Tɛʋ tɛmɑ, kʋ sɩɩ tǝnɑɣɑ.

12Tɑwɑ tɑɑ kʋtɔɣɔŋ tʋ hɛtʋ kɛ tɛtʋ tɑɑ.

Yoŋkpɑɑmɑ wɑɑtʋ tɑpɑɣɑlɛ.

Ɩhokɑɣɑ wiiwɑ tɑ́ tɛtʋ tɑɑ.

13Tɩɩŋ wei pɑ yɑɑ sɩ fikinɑɑ kɑncɑɑlɑɣɑ nyǝŋ tɔŋɑ lʋlʋɣʋ,

nɑ tʋɣʋ ŋku pɑ yɑɑ sɩ lɛsɛŋ tɔ kʋ hɛtʋ sɔɔsʋŋ nɑ́ɑ́ nyɑlɑɑ.

Kʋlɩ nɑ ń kɔɔ, mɑ kʋsɔɔlɑɣɑ kʋpɑŋkɑ.

14Mɑ kʋpɑŋkɑ nyɑ́ɣɑ́ kʋkpɑmǝŋ pɔɔŋ tɑɑ.

Nyɑ́ wei n wɛ ɩpilisɑʋ tɑɑ timpi wɛ kɑtɛ tɔ.

Hʋlʋ-m nyɑ́ ɩsɛntɑɑ,

yele nɑ mɑ́ nɩɩ nyɑ́ nɔɣɔ.

Nyɑ́ ɩsɛntɑɑ tewɑɣɑ nɑ nyɑ́ yɔɣɔtɑɣɑ wɛ leleŋ.

15Ɩ́ kpɑ tɑɑlɛ wontu sǝkpetu nti tǝ wɑkǝlǝɣɩ tɑ lɛsɛŋnɑɑ tɔ.

Pǝ tɑɣɑ pʋlʋ, pɑ tʋ hɛtʋ.

16Mɑ tǝnnɑ mɑ luɣu tɛɛ kʋsɔɔlʋ.

Nɑ ɩ́lɛ́ ɩ tǝnnɑ mɑ́.

Yɑɑyenɑɑ tɑɑ kɛ́ ɩ tiikiɣi ɩ kɑlǝkǝŋ.

17Mɑ luɣu tɛɛ kʋsɔɔlʋ nyɑ́, tɔ pulɑsɩ tɔɔ,

nɑ ń kɔɔ ɩsɩɩ nɑsɛm yɑɑ kɑpǝlǝŋɑ kʋfɑlɑɣɑ,

nɑ pǝ́cɔ́ ɑhoo yu nɑ nikɑɣɑ kpɑ.