1Er duidin bade Galil zilar Ḳanna gaut eḳ bia asil. Hozrot Isar ma ou biat asla. 2Ou biat Isa ar tan sahabi oḳoleo daot faisla. 3Biar onusṭano zebla anguror shorbot furai gelo, ou shomoe Isar maʼe Isare ḳoila, “Erar anguror shorbot shesh oigese.” 4Isae tan maʼre ḳoila, “Mai go, ita to amar bishoe nae. Oḳono amar shomoe oise na.” 5Oile tan maʼe ḳadimdar oḳolre ḳoila, “Oba, tain zeta ḳoin, otau ḳoro.”

6Ihudir shoriot mafik uzu ḳorar lagi hino fattoror soeṭa gamla asil. Ita ekoṭat onuman dui-tin mon fani dorto. 7Isae ḳadimdar oḳolre ḳoila, “Ou gamlainto fani boro.” Teu tara iguin ṭefe ṭefe bori dilo. 8Bade tain ḳoila, “On taki tuṛa fani nia fordan babursire deo.” Teu tara olau ḳorlo. 9Babursie ou fani ḳaia deḳla, ita to anguror shorbot. Oile i shorbot kuai taki ailo, ikan tain zanta na. Ḳali ḳadimdar oḳole zanto. Erlagi babursie biar noshare ḍakia ḳoila, 10“Foela hoḳoleu manshore ḳaṭi shorbot ḳaite dey. Manshe ichchamoto ḳaoar bade zebla shesh oizae, ou shomoe ze shorbot dey, ita foela taki kisu bezal taḳe. Oile tumi ḳaṭi shorbot oḳono raḳso.”

11Hozrot Isae Galil zilar Ḳanna gaut nishana hishabe ou foela keramoti deḳaia nizor mohima zair ḳorla. Ita dekia sahabi oḳole tan ufre iman anla.

12Erbade Isae tan ma, baiain ar sahabi oḳolre loia Kofornaum ṭauno gela, gia ḳoedin hono roila.

13Ihudir Azadi Id gonai gele Isa Zeruzalem ṭauno aila. 14Zeruzalemo aia tain deḳla, fobitro Baetul-Mukaddos kaba goror shimanat kurbanir goru, meṛa ar faro besa-kina soler, ar ṭeḳar baṭṭar ḳarbari oḳolo boi roisoin. 15Ita dekia tain doṛi dia eḳ sabuk banaila, ar sabuk dia hoḳol goru-meṛa ar manshore in tone ḳedai dila. Ar ṭeḳar baṭṭar ḳarbari oḳolor ṭeḳa-foesha sitraia, tarar kesh baksho ulṭaia falaila. 16Faro besra oḳolre Isae ḳoila, “In tone hokkolta horao. Amar bafor gorre bazar banaio na.” 17Ou shomoe pak kitabor ou ḳota sahabi oḳolor mono oigelo, “Tumar goror lagi amar ze mohobbot, ou mohobboteu amar dilor maze agunir laḳan zoler.”

18Isar i ḳamor lagi Ihudi neta oḳole tanre zikaila, “Ita ḳorar odikar ze tumar ase, tar forman hishabe tumi kun keramoti deḳaibae?” 19Tain zuaf dila, “Afnara ou kaba gor bangilaukka, ami tin dinor bitre hirbar tulmu.” 20Ikan hunia tara ḳoila, “I ebadot-ḳana banaite soesallish bosor lagsil, ar tumi kita tin dinor bitre banailibae ni?” 21Oile Isae ino Allar gor bolte nizor shorilor ḳotau ḳoisoin. 22Erlagi Isa mora taki zinda oar bade sahabi oḳolor mono oisil, tain ou ḳotau ḳoisla. Teu sahabi oḳole pak kitabor ḳota ar Isae zeta ḳoisla, ota ekin ḳorla.

23Azadi Idor shomoe Isae Zeruzalem roia zeta keramoti ḳam ḳorsila, ita dekia bout manshe tan ufre iman anlo. 24Oile Isae nizore tarar gese dora dila na, ḳaron tain hoḳol manshore sinta. 25Manshor befare tan kunu shakkir zorur asil na, tain erar dilor ḳobor zanta.