Mpitoroñe t’i Mosè, Anake t’Iesoà
1Ie amy zao ry longo noro’e, mpitraok’ amy fikoihan-dindìñeio, haraharao t’Iesoà, Sorotà naho Mpisorom-Bey itaroñan-tikañey, 2i nigahiñe amy nanendreañ’ azey hambañe amy figahiña’ i Mosè amy hene anjomba’eiy. 3F’ie vinolily hañeva àsiñe ambone’ i Mosè, hambañe ami’ty anaña’ ty mpandranjy traño àsiñe ambone’ i trañoy. 4Songa manañe ty mpandrafi’e ze anjomba, fa i Andrianañahare ty Mpamboatse ze he’e. 5Toe nigahiñe amy hene anjomba’ey t’i Mosè, ie nimpitoroñe nitaroñe o mbe ho tsaraeñeo. 6Fa Anake mifehe’ i Anjomba’ey i Norizañey; itikañe o añanjomba’eo naho tambozoren-tika ty fahasibehañe naho fatokisañe osihe’ i fitamañey,
Hatahata ami’ty Tsy Fatokisañe
7ie anoe’ i Arofo Masiñey ty hoe:
Anito, naho janji’ areo i fiarañanaña’ey,
8ko mampientetse arofo
manahake tamy fanigihañe
añ’andro fitsohañe an-dratraratra añey,
9ie nisombean-droae’ areoy, naho
namente vaho nahaisake o fitoloñako efa-polo taoñeo.
10Zay ty nibosehako ami’ty tariratse toy, le hoe raho,
Mandifik’ añ’arofo ao nainai’e iereo, mbore tsy fohi’ iareo o lalakoo,
11Aa le nifantàko an-keloke t’ie
tsy himoak’ amy fitofàkoy.
12Mitaoa ry longo, he te ho zoeñe ama’areo ty troke miola, mifañito aman’ Añahare veloñe. 13Aa le mifañosiha boak’ andro, ampara’ i atao ty hoe Anitoy, tsy mone ama’ areo ty hampientere’ ty famañahian-kakeo. 14Fa mpitrao-dova amy Norizañey tika naho vontitireñe i fifotoram-patokisañey ampara’ i hahenefañey, 15amy ho tsaraeñe ty hoe:
Anito, naho janji’ areo i fiarañanaña’ey
ko mampientents’ arofo
manahake tamy fanigihañey.
16Ty ila’e nahajanjiñe ro niola, fa tsy ze hene nampiavote’ Mose amy Egipte. 17Aa ia ty niviñera’e efa-polo taoñe? Tsy o nandilatseo hao? ie nihotrak’ an-dratraratra añe o lolo’ iareoo. 18Ia ka ty nifantà’e te tsy himoak’ amy fitofà’ey ao? toe o tsy niantokeo? 19Aa le onin-tika te i tsy fatokisañey ty tsy niziliha’ iareo.