1Yesu na walanguswa wa heye nawafika kuli isi ya Wagelasi, mwambu ya ilamba lya Galilaya. 2Baho du Yesu vyoyalawile muli itumbwi nakating'hana na munhu yali yochikala kuwele na vilaga. Ayo munhu yali na chijeni chihile. 3Yali yochikala mvilaga, kwali kuduhu munhu yojeza kumhejelela yamibate yojeza kumkowela na minyololo. 4Mala nyinji nawajeza kumkowela minyololo moko na magulu, nakadumulaga na kusa lyuma lyo wamkowele nalyo. Ayu munhu yali na mong'ho ng'hatu na kwali kuduhu munhu wa kumibata. 5Nemisi na nechilo yali yochikala mvilaga mchidunda yotowa iyowe na kitemangatemanga kwa maganga.

6Loyamuwene Yesu kwa kutali, kambilimila, kenamiza. 7Kalonga kwa lizi likulu, “Kuna choni na heni, hegwe Yesu Mwana wa Nguluwi yali kuchanya? Kwa itagwa lya Nguluwi ndangukulanda uleche kungaza!” 8Nakalonga ahyo kwa vila Yesu yali yamlonjele, “Chijeni chihile mlawe munhu ayu.”

9Yesu kamuuza, “Itagwa lyako kwaani?” Na heye kedichila, “Itagwa lyangu chilundo cha wamizi, mina hetwe twa wenji.” 10Vijeni vimdedeza Yesu yaleche kuviwinga avyo vijeni mli isi ila.

11Kwali na lung'hongola lukulu lwa migubi jidimigwa hali chidunda. 12Ahyo, vila vijeni vimlanda, “Utugale kuli ajo migubi, tujinjile.” 13Yesu kavikundiza, avyo vijeni vihile, vijinjila jila migubi. Lung'hongola lweng'ha lwa migubi jifichile elufu mbili najifiduka mnyenje ya chidunda kwinjila milamba, jibagama.

14Wadimi wa ajo migubi nawabilima, wadamla mbuli azo kuli miji na kumigunda. Wanhu nawoya kulola galawile. 15Awala wanhu vyo wamlutile Yesu, wamona ayula munhu yawele na chijeni yekale hanyi, Yawele na luhala lwake na yavalile ivalo, na wala wanhu nawadumba. 16Awala wanhu vyowagawene agala gogalawile kwa munhu yawele na chijeni na ajila migubi, 17wamlonjela Yesu yoche kuli isi ya hewo.

18Yesu vyoyali yokwinjila mu itumbwi, yula munhu yosigwe vijeni nakamlanda yamkundize kulutasa. 19Yesu nakalema, kamlonjela, “Ulute kaye kwako, kawalonjele wang'holozo mbuli zeng'ha Mkulu zo yakuditile na vyoyakonele isungu.” 20Ayula munhu kaluta, kaluka kudamla kuli Mji wa Dekapoli mbuli zeng'ha Yesu zoyamditile, wanhu nawekala wekagahale.

21Yesu nakaloka kahi mwambu iyage ya ilamba kwa itumbwi. Lung'hongola lwa wanhu nalwikungajiza kumwando hake, na heye yali yemile hafungo mwa ilamba. 22Aho Jailo yawele chilongozi wa sinagogi nakoya, loyamuwene Yesu nakafugama hali magulu ga Yesu. 23Yali yolonga yolanda, “Mhinza wa heni mdodo kangutamika behi kubagama. Dedede ndangulanda tuche kaye ukamuwichile moko yaloholigwe yawe mkomu.” 24Yesu nakoka hamwe na Jailo. Wanhu wenji nawamuwinza nakummemelela chila nzingo.

25Kwali na mdala, yali na utamwa kwa kulawa danda mihela kumi na mili. 26Mdala ayu nakagazika lukami, na kalaguligwa na wateleka mikwandi wenji ne kuloholigwa hebu. Nakataga sendi nyinji ne ulohozi kuduhu, ila nakalutilila kugazika. 27Na vyoyahuliche goyodita Yesu, ndo kaluta na ahyo nakafyela lung'hongola lwa wanhu walihamwe na Yesu na kudoliza nguwo ya heye. 28Nakadita ahyo, mina yali yolonga yaliyeka, “Wone ndibate nguwo ya heye, ndowa mkomu.”

29Kebata nguwo ya Yesu, na danda yali ilawa bahala du kona naileka kulawa. Na heye nakehulika mlukuli lwake kawa mkomu. 30Yesu nakavizela, nakona mong'ho wa heye uwa udo, kahinduka kauza kalonga, “Whaani yebate nguwo ya heni?” 31Walanguswa wamwidichila walonga, “Ulole wanhu vyo wamemile, lekachoni kwanguuza whaani yakibate?” 32Ila Yesu kalutilila kulola yamone ayo yaditile hino. 33Aho yula mdala yavizelele choni chimlawile, kaluta yokakama kuno yodumba, nakafugamila mmagulu ga Yesu, kamlonjela yokomya gose galawile. 34Yesu nakamlonjela, “Mhinza, makundo ga hegwe gakulohola. Ulute goya, uwe mkomu ulawe ng'hatu utamwa wa hegwe.”

35Yesu vyoyali yang'ali yolonga, wanhu nawoya kulawa hakaye kwa Jailo chilongozi wa ng'handa ya kusalila, wamlonjela kota, “Mina mhinza wa hegwe nakabagama. Uleche kuzakumgaza Mlangusa.” 36Ila Yesu nekulola chowalonjile kamlomjela Jailo chilongozi wa sinagogi, “Uleche kudumba, ukunde hela.” 37Yesu hamkundize munhu yoneche kulutasa, ila Petili na Yakubu na Yohani mng'holoze Yakobo. 38Nawafika kaye kwa Jailo chilongozi wa sinagogi, Yesu nakawona wanhu wapunganiche nakahulika kuwemba, chililo na kulomboleza kwinji. 39Yesu nakenjila mng'handa kawalonjela wanhu, “Lekachoni mwangupunganika? Lekachoni mwangulila? Mwana habagame kawasa hela.”

40Wanhu nawamseka Yesu, ahyo nakawalavya wose kunze, nakawahola mhaza na mayake mhinza yula, na wala walanguswa wa heye wadatu, nawenjila kuchihengo kowawichile lukuli lwa mhinza. 41Yesu kambata moko, nakamlonjela ayula mhinza yabagame kalonga, “Talita, kumi,” Mina, “Muhinza ndangukulonjela, ulilimche!” 42Baho mhinza kalilimka, nakaluka kujendajenda, nayali na miyaka kumi na mili, aga logalawile, wanhu weng'ha nawekala wabubuwala lukami. 43Yesu nakawalemeza wanhu waleche kumlonjela munhu. Hamba nakawalonjela, “Wamgalile chilyo ayula mhinza yalilimche yalye.”