Keujadian - Aceh Bible - Old Testament / The Book of Genesis, Chapter 24

Chapter 24

1 Nabi Ibrahim ka tuha lumpah na, dan gobnyan geubri beureukat lé TUHAN lam hai peue mantong.
2 Bak siuroe geupeugah kheueh lé Nabi Ibrahim ubak namiet gobnyan nyang paleng tuha, nyang peutimang hareuta beunda gobnyan, "Gata peuduek kheueh jaroe gata ateueh pha ulôn.
3 Gata meusumpah kheueh deumi TUHAN, Allah nyang kuasa langét bumoe, bahwa gata hana gata mita peurumoh keu Nabi Ishaq aneuëk lamkawan ureuëng-ureuëng nyang na di tanoh Kanaan nyoe.
4 Gata harôh gata gisa u nanggroe teumpat ulôn lahé keu gata mita inong lamkawan syedara lôn keupeurumoh Nabi Ishaq."
5 Dan jitanyong kheueh lé namiet nyan ubak Nabi Ibrahim, "Pakriban meunyoe aneuëk inong nyan hana jitem tinggai rumoh jih hana teuma jitem seutôt ulôn u nanggroe nyoe? Peu kheueh harôh ulôn ba aneuëk Amphon nyan u nanggroe asai Amphon?"
6 Geujaweueb lé Nabi Ibrahim, "Awaih! Bék sagai-sagai aneuëk ulôn nyan gata ba keudeh!
7 TUHAN, Allah nyang kuasa langét, ka geuba ulôn nibak rumoh ayah lôn dan nibak nanggroe waréh kawöm lón, dan Gobnyan ka geumeusumpah ubak ulôn bahwa Gobnyan teuma geubri nanggroe nyoe ubak keuturonan lôn. Meunan cit Gobnyan teuma geukirém malaikat Geuh keu jitulông gata, mangat gata hase gata teumé sidroe peurumoh nibak teumpat nyan keu aneuëk ulôn.
8 Teuma meunyoe aneuëk dara nyan hana jitem jak ngon gata, gata beubaih nibak sumpah nyoe. Pakriban cit teuma, bék gata ba aneuëk ulôn nyan keudeh."
9 Óh lheueh nyan dinamiet nyan pi laju jikeubah jaroe jih ateueh lhak pha Nabi Ibrahim amphon jih nyan, dan laju jimeusumpah keu jipeubuet peue nyang ka geupeugah lé Nabi Ibrahim nyan.
10 Namiet nyan laju jicok siploh boh unta meunan cit mubagoe rupa barang-barang nyang meuhái yuem jih atra amphon jih dan jijak laju ubanda teumpat tinggai Nahor yohmantong udeb gobnyan; teumpat jih siblaih utara Mesopotamia.
11 Óh ka trok namiet nyan keudeh, jipeupiôh laju banmandum unta-unta nyan bak binéh mon di luwa banda. Uroe ka seupôt, dan watée uroe seupôt nyan kheueh ureuëng-ureuëng inong jijak bakmon keu jijakcok ié.
12 Dan namiet nyan pih laju jimeudoá, "TUHAN, Allah amphon lôn Nabi Ibrahim, tulông kheueh, mangat tugaih lôn hase nibak uroe nyoe; beugét kheueh até Droeneueh keu amphon lôn Nabi Ibrahim.
13 Ngieng kheueh, ulôn dong bak binéh mon nyoe. Sikeujab teuk aneuëk-aneuëk dara nibak banda teuma jijak cok ié bak mon nyoe.
14 Ulôn teuma lôn peugah ubak sidroe ureuëng lamkawan aneuëk dara nyan, 'Tulông, peutreun kheueh pacök ié gata ulôn keuneuk jieb ié bacut.' Meunyoe jijaweueb, 'Bapak jieb kheueh, dan meunan cit ngon unta-unta Bapak teuma lôn bri cit ié jieb!' Nyan kheueh ureuëng nyang TUHAN piléh keu peurumoh hamba Droeneueh Nabi Ishaq. Meunyoe hainyan teujadi, ulôn teuma lôn teupeu bahwa TUHAN ka jroh até ubak amphon lôn Nabi Ibrahim."
15 Teungoh gobnyan meudoá nyan, na sidroe aneuëk dara nyang nan jih Ribka, ureuëng jih lagak lagoena dan mantong peurawan, laju trok bak mon nyan sira jigulam pacök ié nibak bahô. Sidara nyan aneuëk Betuel, dan ureuëng syiek Betuel na kheueh Nahor dan Milka; Nahor nyan na kheueh aduen Nabi Ibrahim. Ribka laju jijak bak mon nyan óh trok keunan laju jipaso pacök ié jihnyan, óh lheueh nyan laju jiwoe.
17 Namiet Nabi Ibrahim nyan laju jiplueng sira jipeurab ubak aneuëk dara nyan dan jipeugah laju, "Tulông neuëk, gata bri kheueh ulôn jieb ié nyang na lam pacök gata nyan."
18 Jijaweueb lé aneuëk dara nyan, "Neujieb kheueh pak," dan bagaih-bagaih pacök nyan jipeutreun nibak bahô jih, dan sira jimat pacök nyan laju jibri ié jieb ubak namiet nyan.
19 Óh ka lheueh seuleusoe namiet nyan jijieb ié; jipeugah kheueh lé aneuëk dara nyan, "Ulôn keuneuk jak timok ié lom keu unta-unta Bapak, mangat banmandum beulatang nyan jeuet jijieb ié sipuih-puih jih."
20 Óh lheueh nyan bagaih-bagaih ié nyang na lam pacök nyan jiro lam teumpat ié unta, dan óh lheueh nyan jiplueng lom bak mon jijak cok ié leubeh le lom sampoe banmandum unta nyan habéh jiteumé jieb ié.
21 Namiet Nabi Ibrahim teutab geungieng mantong hainyan dan hana geumeututoe meusikrak haba. Gobnyan geukeuneuk kalon peu kheueh TUHAN geubri hase useuha geuh nyan atawa hana.
22 Óh ka lheueh jijieb ié unta nyan banmandum samoe puih sipuih-puih jih, namiet Nabi Ibrahim laju geucok piasan méuh nyang paleng meuyuem, dan laju geupeungui bak idong aneuëk dara nyan. Bak jaroe aneuëk nyan geupeungui teuma sipasang gleueng méuh.
23 Dan geupeugah laju lé namiet nyan, "Ci gata peugah soe ayah gata. Peu kheueh na teumpat éh dirumoh gobnyan keu ulôn dan rakan-rakan lôn?"
24 "Ayah ulôn Betuel bin Nahor dan Milka," jaweueb sidara nyan.
25 "Dirumoh kamoe na teumpat éh keu Bapak dan dirumoh pi jai that jerami keu eumpeuen beulatang."
26 Dan jisujut kheueh namiet nyan jiseumah TUHAN.
27 Sira jipeugah, "Pujoe kheueh TUHAN, Allah amphon ulôn Nabi Ibrahim. TUHAN rupari seutia dan get até ubak amphon ulôn Nabi Ibrahim. Gobnyan ka geupimpén ulôn langsong ubak waréh kawöm geuh."
28 Óh lheueh nyan aneuëk dara nyan laju jiplueng urumoh mak jih dan jipeugah laju banmandum peue nyang ban lheueh jialami.
29 Ribka na sidroe aduen nyang nan jih Laban. Jihnyan jideungoe mandum peue nyang ka jicalitra lé adoe jih keuhai peue nyang jipeugah lé namiet nyan. Dan jikalon teuma na piasan bak idong ngon gleung méuh bak jaroe adoe jih nyan. Dan jiplueng kheueh Laban uluwa rumoh jijak meurumpok ngon namiet Nabi Ibrahim nyan nyang mantong teudong ngon unta-unta jih bak binéh mon nyan.
31 Laju jipeugah lé Laban, "Bapak ureuëng nyang geubri beureukat lé TUHAN! Bék bapak tinggai diluwa lagée nyoe. Jak urumoh kamoe. Kamoe ka peusiab kama keu Bapak dan meunan cit keuteumpat unta-unta Bapak."
32 Dan jijak kheueh namiet nyan sira jitamong lam rumoh. Laban laju jipeutreun banmandum barang-barang nyang na ateueh unta-unta nyan, óh lheueh nyan laju jibri jerami dan eumpeuen-eumpeuen keu mandum unta nyan. Óh lheueh nyan laju jijakcok ié rhah gaki namiet nyan dan keu ureuëng-ureuëng laén rakan-rakan namiet nyan.
33 Watée peunajoh ka jihidang, namiet nyan laju jipeugah haba, "Ulôn hana lôn pajoh bu sigohlom lôn peusampoe peusan nyang ulôn ba." Jijaweueb Laban, "Hana peue, ci gata peugah."
34 Dan jipeuphon kheueh peugah haba lé namiet Nabi Ibrahim nyan, kheun gobnyan, "Ulôn nyoe namiet Nabi Ibrahim.
35 TUHAN geugaséh that-that keu amphon lôn nyan dan geupeujeuet gobnyan sidroe ureuëng nyang kaya lumpah na. TUHAN ka geubri ubak gobnyan saboh kawan bubiri, kaméng, leumô, unta, keledée, pirak, méuh, dan namiet agam ngon namiet inong.
36 Watée umu ka tuha that, Sara, peurumoh amphon lôn nyan ka geupeulahé sidroe aneuëk agam, dan amphon ulôn nyan ka geupeutreun hak waréh banmandum hareuta beunda ateueh aneuëk geuh nyan.
37 Gobnyan ka geuyue ubak ulôn mangat lôn meujanji ngon meusumpah beulôn taát peue nyang geupeurintah, meunoe kheun gobnyan ubak ulôn, 'Bék kheueh gata piléh peurumoh keu aneuëk ulôn dara-dara nyang na di nanggroe Kanaan nyoe,
38 keucuali gata mita aneuëk dara nibak waréh kawöm ayah ulôn. Dan gata jak kheueh keudeh deungoe sigra.'
39 Laju ulôn tanyong ubak gobnyan, 'Pakriban meunyoe aneuëk dara nyan hana jitem seutôt ngon ulôn?'
40 Laju geujaweueb lé gobnyan, 'TUHAN nyang sabe ulôn taát, teuma geukirém malaikat gobnyan keu geujak tulông mangat tugaih gata na hase. Gata teuma meuteumé gata mita peurumoh keu aneuëk ulôn nyang na lam kawöm lôn keudroe, jihnyan na kheueh nibak waréh kawöm ayah lôn.
41 Teuma meunyoe awaknyan jitulak gata, gata pih leupaih nibak sumpah.'
42 Dan watée ulôn katrok bak mon bunoe, laju lôn meudoá lam até, 'TUHAN, Allah amphon lôn Nabi Ibrahim, bah kheueh TUHAN neupeujeuet tugaih ulôn nyoe na hase.
43 Ulôn teuma teutab lôn dong bak binéh mon nyoe. Meunyoe na sidroe dara jijak cok ié, teuma lôn lakée bak jihnyan mangat keu ulôn jitem bri ié jieb.
44 Meunyoe aneuëk dara nyan jitem bri ié nyang ulôn lakée nyan, dan jilakée cit mangat jibri ié jieb keu unta-unta lôn, lôn yakén nyan kheueh ureuëng nyang ka TUHAN piléh jeuet keupeurumoh aneuëk amphon lôn nyan.'
45 Gohlom seuleusoe ulôn kheun doá nyan lam até, teuka kheueh Ribka jiba pacök ié ateueh bahô jih dan laju jicok ié lam mon nyan. Óh lheueh nyan ulôn peugah ubak jihnyan, 'Tulông kheueh ulôn jieb ié, ulôn grah that.'
46 Bagaih that aneuëk dara nyan jipeutreun pacök nyan nibak bahô jih sira jipeugah, 'Jieb kheueh, dan unta-unta Bapak teuma lôn bri cit jijieb ié.'
47 Óh lheueh nyan laju lôn tanyong, 'Soe kheueh ayah gata hai aneuëk meutuah?' Dan laju jijaweueb, 'Ayah ulôn nan geuh Betuel, bin Nahor dan Milka.' Laju ulôn peungui piasan méuh nibak idong meunan cit gléung méuh nibak jaroe jih.
48 Laju ulôn sujut lôn seumah dan lôn pujoe TUHAN, Allah amphon ulôn Nabi Ibrahim. Gobnyan ka geupimpén ulôn langsong bak teumpat nyoe, ubak waréh kawöm amphon ulôn, sampoe ulôn hase meurumpok ngon aneuëk dara nyoe keu aneuëk amphon lôn.
49 Jinoenyoe, meunyoe awaknyoe neutem peusaneut amphon ulôn deungon jroh dan neupeupeunoh tanggong jaweueb droeneuh sibagoe syedara gobnyan, beuneutem kheueh peugah ubak ulôn, teuma meunyoe hán neutem, neupeugah cit teuma, mangat jeuet lôn teupeu peue nyang harôh ulôn peubuet."
50 Laban dan Betuel laju geujaweueb, "Sabab peue nyang teujadi nyoe asai jih nibak TUHAN, kamoe hana patot kamoe bri keuputosan.
51 Nyoe Ribka; bah kheueh jihnyoe jijak ngon Bapak dan beujeuet keupeurumoh aneuëk amphon Bapak, lagée nyang ka geupeugah lé TUHAN keudroe."
52 Watée namiet Nabi Ibrahim nyan jideungoe haba awaknyan, laju jisujut jiseumah TUHAN.
53 Óh lheueh nyan jipeuteubiet laju peukayan, piasan pirak dan méuh, banmandum nyan laju geubri ubak Ribka. Meunan cit ubak aduen gobnyan ngon ma geuh jibri hadiah nyang meuhái-meuhái.
54 Óh lheueh nyan namiet Nabi Ibrahim meunan cit ngon rakan-rakan gobnyan nyang laén laju geumakheun meusajan teuma, dan bak malam nyan awaknyan geumudom disinan. Óh ka lheueh awaknyan jibeudôh óh singoh beungoh, namiet nyan laju jipeugah, "Neupeu idhin kheueh ulôn keuneuk jakwoe ubak amphon lôn"
55 Teuma aduen dan mak Ribka geutanyong, "Bah kheueh Ribka tinggai ngon kamoe tujoh atawa siploh uroe teuk, óh lheueh nyan barô kheueh jeuet jijak."
56 Teuma namiet nyan jijaweueb, "Bék neupeuteun ulôn. TUHAN ka geupeujeuet ulôn jak keunoe na hase; neupeu idhin kheueh ulôn woe ubak amphon lôn."
57 Jaweueb awaknyan, "Jak tajak hôi Ribka sira tatanyong pakriban kheun jih."
58 Laju awaknyan geutawök Ribka dan laju geutanyong, "Peu kheueh gatatem seutôt ureuëng nyoe?" Jaweueb aneuëk dara nyan, "Nyoe, ulôn tem."
59 Teuma awaknyan laju geubri idhin ubak Ribka ngon dendayang jiseutôt namiet Nabi Ibrahim dan rakan-rakan gobnyan. Laju awaknyan geubri beureukat ubak Ribka ngon tutoe haba lagée nyoe, "Seumoga gata Ribka, jeuet keu mak meujuta-juta manusia! Seumoga keuturonan gata jipeutaklok bubena banda musoh-musoh jih!"
61 Óh lheueh nyan meukeumah-keumah kheueh Ribka meusajan ngon inong-inong muda nyang jeuet keu dendayang gobnyan, óh seuleusoe nyan laju geuék unta dan geujak kheueh laju meusajan ngon namiet Nabi Ibrahim nyan.
62 Watée nyan Nabi Ishaq ka trok geuteuka nibak padang pasi, trok laju bak mon nyang teupeunan "Gobnyan Nyang Kalon Ulôn" dan tinggai bak bagian seulatan nanggroe Kanaan.
63 Bak siuroe watée óh seupôt, gobnyan laju geuteubiet nibak lam khimah keuneuk jak-jak lam ladang geuh, dan deuh laju geukalon unta-unta teungoh jijak.
64 Watée Ribka geukalon Nabi Ishaq, laju geutreun ateueh unta,
65 dan geutanyong laju ubak namiet Nabi Ibrahim nyan, "Soe ureuëng agam nyang na lam ladang nyan teungoh jijak ubak geutanyoe?" "Gobnyan amphon ulôn," jaweueb namiet nyan. Ban geudeungoe lagée nyan Ribka laju geucok ija seulendang geutob laju muka gobnyan.
66 Óh lheueh nyan namiet nyan laju jicalitra ubak Nabi Ishaq peue-peue nyang ka geupeubuet.
67 Óh lheueh nyan Nabi Ishaq laju geucok Ribka geupeutamong lam khimah ma gobnyan, Sara, dan Nabi Ishaq laju geumeukawen ngon Ribka. Nabi Ishaq geucinta that-that ubak Ribka; dan teuhibur kheueh até Nabi Ishaq nyang seudeh sabab ka hana le ma geuh.