Keujadian - Aceh Bible - Old Testament / The Book of Genesis, Chapter 37

Chapter 37

1 Nabi Yakub tinggai teutab di nanggroe Kanaan, teumpat tinggai ayah gobnyan,
2 dan nyoe kheueh riwayat keuluwarga Nabi Yakub: Watée Nabi Yusuf, aneuëk Nabi Yakub meu-umu tujoh blah thon, gobnyan geu-useuha saboh kawan kaméng ngon bubiri meusajan-sajan ngon aduen-aduen gobnyan, na kheueh aneuëk-aneuëk Bilha dan Zilpa, mandua droe gundek ayah gobnyan. Nabi Yusuf sabe geulapor bak ayah geuh Nabi Yakub buet-buet nyang jeuhet nyang jipeubuet lé aduen-aduen geuh.
3 Nabi Yakub leubeh geugaséh keu Nabi Yusuf nibak aneuëk-aneuëk geuh nyang laén, sabab Nabi Yusuf lahé watée ayah gobnyan ka tuha. Bak siuroe Nabi Yakub geupeugét keu Nabi Yusuf bajée jubah nyang paleng lagak.
4 Watée jingieng lé aduen-aduen Nabi Yusuf bahwa ayah geuh nyan leubeh geugaséh ubak Nabi Yusuf nibak keu awaknyan, teuka kheueh banci awaknyan keu Nabi Yusuf, sampoe hana jitem peugah haba le nyang gét-gét ngon gobnyan.
5 Bak simalam Nabi Yusuf meulumpo, dan watée geupeugah lumpo geuh nyan ubak aduen-aduen geuh, awaknyan meutamah banci keu adoe jih nyan.
6 Nyoe kheueh nyang geupeugah lé Nabi Yusuf ubak aduen-aduen geuh nyan, "Cuba deungoe nyang ulôn peugah nyoe!
7 Ulôn meulumpo geutanyoe banmandum na di blang teungoh ta ikat gandom, dan gandom ulôn laju teudong óh cot. Dan gandom-gandom droeneueh banmandum jikeulileng gandom ulôn dan jisujut ubak gandom ulôn nyan."
8 "Gata pike gata jeuet keuraja dan gata kuasa ateueh kamoe?" kheun aduen-aduen gobnyan. Dan deungon na lagée nyan meutamah-tamah banci awaknyan keu Nabi Yusuf sabab lumpo-lumpo gobnyan dan peue nyang ka geupeugah ubak awaknyan.
9 Óh lheueh nyan Nabi Yusuf meulumpo lom, dan laju geupeugah ubak aduen-aduen geuh nyan, "Ulôn meulumpo lom, hei aduen meutuwah, ulôn ngieng mata uroe, buleuen dan siblaih boh bintang jisujut ubak ulôn."
10 Lumpo nyan geucalitra teuma ubak ayah geuh, dan lé ayah geuh laju geudhot gobnyan sira geupeugah lagéenyoe, "Peue lumpo nyan? Gata pike ulôn nyoe, meunan cit ngon ma gata dan syedara-syedara gata jiteuka sujut dan jiseumah gata?"
11 Aduen-aduen Nabi Yusuf bingiek até ubak gobnyan, teuma ayah gobnyan teutab geupike ubak lumpo nyan.
12 Nibak siuroe bak watée aduen-aduen Nabi Yusuf jijak u Sikhem keujijak rabe kawan kaméng ngon bubiri ayah jih,
13 geupeugah kheueh lé Nabi Yakub ubak Nabi Yusuf, "Gata jak kheueh laju u Sikhem, nibak teumpat aduen-aduen gata teungoh jimeurabe kaméng ngon bubiri tanyoe." Seuot Nabi Yusuf, "Gét, Ayah."
14 Kheun ayah geuh, "Ngieng kheueh, pakriban keuadaan aduen-aduen gata, meunan cit keuadaan kaméng ngon bubiri tanyoe, lheuehnyan woe kheueh laju keugata peugah ubak ulôn." Ngon lagéenyan geupeulheueh kheueh Nabi Yusuf geujak geutinggai Pantôn Hebron. Hana treb teuma óh lheuhnyan trok kheueh laju Nabi Yusuf u Sikhem.
15 Teungoh gobnyan geujak keudeh keunoe lam padang nyan, laju meurumpok gobnyan ngon sidroe ureuëng agam nyang laju jitanyong ubak gobnyan, "Peue nyang gata mita?"
16 "Aduen-aduen ulôn, awaknyan teungoh meurabe kaméng ngon bubiri," jaweueb Nabi Yusuf, "Peu kheueh Bapak neuteupeue dipat awaknyan?"
17 Seuot ureuëng nyan, "Awaknyan ka jibeurangkat nibak teumpat nyoe. Ulôn deungoe awaknyan na jipeugah bahwa awaknyan keuneukjak u Dotan." Ban geufeungoe haba nyan Nabi Yusuf pi laju geuseutôt aduen-aduen geuhnyan dan meurumpok laju awaknyan di Dotan.
18 Phon nibak jiôh awaknyan ka jikalon Nabi Yusuf, dan sigohlom gobnyan trok ubak awaknyan, awaknyan ka sipakat jikeuneuk poh maté Nabi Yusuf nyan.
19 Kheun awaknyan sidroe ubak nyang laén, "Ngieng, tukang meulumpo nyan ka jijak keunoe.
20 Jak tapoh maté jihnyan dan tatiek manyét jihnyan lam mon nyang tho. Takheun ubak ayah bahwa jihnyan ka jiteugom lé beulatang juah. Dan ngon nyan teuma jeuet takalon teuma pakriban jeuet jih ngon lumpo-lumpo jihnyan."
21 Ruben jideungoe reuncana brok awaknyan, laju ji-useuha keuneuk peuseulamat Nabi Yusuf. "Bék tapoh maté jihnyan," kheun geuhnyan.
22 "Tatiek mantong lam mon nyang na lam padang pasi nyoe, teuma bék tapoh atawa tapeuluka jih nyan." Hainyan geupeugah sabab geuhnyan keuneuk peuseulamat Nabi Yusuf dan geuyue woe gobnyan u rumoh.
23 Watée Nabi Yusuf ka trok ubak aduen-aduen geuh, ngon buet nyang gasa that awaknyan laju jisuet bajée jubah Nabi Yusuf nyang lagak nyan.
24 Laju awaknyan jihila gobnyan dan jirhom laju Nabi Yusuf nyan lam mon nyang tho.
25 Bak watée awaknyan teungoh jimakheun, laju deuh jikalon lé awaknyan saboh kafipilah ureuëng Ismail nyang teungoh geujak nibak Gilead u nanggroe Meusé. Ateueh unta-unta awaknyan peunoh ngon meubagoe reumpah dan kismis.
26 Laju jikheun lé Yehuda ubak banmandum syedara-syedara geuh nyan, "Keupeue guna jih tapoh maté adoe geutanyoe dan tasom rahsia nyan?
27 Jak tapeubloe jih nyan ubak ureuëng Ismail nyan. Bék tapeusakét jihnyan. Pakriban kheueh mantong jihnyan na kheueh adoe geutanyoe keudroe." Banmandum syedara jihnyan laén situju,
28 dan bak watée na meupadub droe saudaga Midian teuka, Nabi Yusuf laju jipeuteubiet lé aduen geuh lam mon nyan dan laju jipeubloe ubak ureuëng-ureuëng Ismail nyan ngon yuem dua ploh leumpeng péng pirak. Óh lheuehnyan gobnyan laju jiba lé saudaga-saudaga nyan u nanggroe Meusé.
29 Watée Ruben geugisa ubak mon nyan dan geukalon ka hana le Nabi Yusuf lam mon nyan, laju jipriek-priek peukayan nyang na bak tuboh jih sabab seudeh that.
30 Gobnyan laju geugisa ubak syedara-syedara geuh sira geupeugah lagée nyoe, "Aneuëk nyan ka hana le lam mon nyan, peue nyang harôh lôn pubuet jinoenyoe?"
31 Laju awaknyan jisie saboh kaméng dan laju jiceulob bajée jubah Nabi Yusuf lam darah kaméng nyan.
32 Óh lheuehnyan bajée jubah nyan jiyue lé awaknyan mangat ji-intat ubak ayah jih ngon peusan lagée nyoe, "Bajée jubah nyoe kamoe teumé, peu kheueh nyoe atra aneuëk ayah?"
33 Nabi Yakub geuturi keu jubah nyan, laju geupeugah, "Beutôi, nyoe jubah aneuëk ulôn! Ka pasti aneuëk nyoe ka jiteugom lé beulatang juah. Keubiet seudeh aneuëk ulôn ka maté jipriek-priek lé beulatang juah nyan!"
34 Nabi Yakub geupriek peukayan geuh sabab seudeh that laju geungui peukayan meukabông meu-uroe-uroe treb jih gobnyan geupeuratok keu aneuëk geuh nyang geusayang nyan.
35 Banmandum aneuëk-aneuëk gobnyan, bah nyang agam meunan cit nyang inong jiteuka jijak peumangat até gobnyan, teuma gobnyan teutab hana jitem mangat até. Kheun gobnyan, "Sampoe án maté ulôn teutab lôn peuba-e aneuëk ulôn nyan." Meunan kheueh jeuet jih gobnyan sabe lam keuadaan meukabông sabab Nabi Yusuf aneuëk geuhnyan.
36 Nibak watéenyan, di nanggroe Meusé, lé ureuëng-ureuëng Midian laju jipeubloe Nabi Yusuf ubak Potifar, sidroe panglima nyang jabatan geuh sibagoe keumandan peungawai meuligoe.