1 Watée kateuka musém seumi lom, bak watée raja-raja lazem jih geujak u mideuen prang, Yoab laju jikrah sipa-i jih dan laju jireubot nanggroe Amon. Bak watéenyan Raja Nabi Daud teutab tinggai di Yerusalem, dan gobnyan hana röh sajan. Yoab dan sipa-i gobnyan laju geukeupong banda Raba, dan laju geuseurang dan geupeuhanco banda nyan. 2 Óh ka lheuehnyan Nabi Daud laju geuteuka dan geucok laju hareuta rampasan prang nyang lumpah le di banda nyan. Lamkawan barang-barang nyang geureupah nyan na mahkota raja Amon. Mahkotanyan brat jih na kira-kira 34 kilogram dan meutahta saboh peumata. Nabi Daud laju geucok peumata nyan dan geupasang laju nibak mahkota gobnyan. 3 Óh lheuehnyan Nabi Daud laju geuangkat peunduduek banda Raba dan geupaksa ureuëng nyan jimeukeureuja deungon jipeuguna gogajo, cangkoi dan pato. Hai nyan geupeubuet cit u ateueh banda-banda Amon nyang laén. Óh lheuehnyan Nabi Daud dan banmandum tantra gobnyan laju geugisa u Yerusalem. 4 Hana padubna treb teuma óh lheuehnyan teujadi prang lom deungon ureuëng Filistin di Gezer. Nibak saboh teumpat muprang nyan Sibkhai ureuëng Husa jiteumé poh maté sidroe ureuëng raya lagée gogasi nyang nanjih Sipa-i. Dan ureuëng Filistin pih laju taloe. 5 Nibak muprang nyang laén watée teulawan ureuëng Filistin, Elhanan aneuëk Yair jipoh maté sidroe ureuëng nyang nanjih Lahmi syedara Goliat ureuëng Gat. Go kapak Lahmi nyan na bube kayée tumpeun ija. 6 Meunan cit nibak muprang nyang laén nyang teujadi di Gat na sidroe ureuëng gogasi nyang aneuk jaroe nam neuk nibak tieb-tieb jaroe dan gaki jihnyan. Ureuëng nyan keuturonan rayeuk-rayeuk lagée gogasi jamén ilée. 7 Ureuëng nyan jipeuhina ureuëng Israel, lé sabab nyan ureuëng nyan geupoh maté lé Yonatan, aneuëk Simea aduen Nabi Daud. 8 Ban lhée droe ureuëng nyang geupoh maté lé Nabi Daud dan pasokan gobnyan na kheueh keuturonan gogasi di Gat.
