1 Nabi Harun na geumeu aneuëk peuet droe aneuëk agam: Nadab, Abihu, Eleazer dan Itamar. Nadab dan Abihu meuninggai leubeh ilée nibak ureuëng syiek jih dan hana jitinggai aneuëk meusidroe pih. Lé sabab nyan Eleazer dan Itamar syedara gobnyan jeuet keu teungku imeum. Nabi Daud geubagi keuturonan Nabi Harun lam keulompok-keulompok nyang meunurot tugaih awaknyan. Lam hai meubuet meukeulompok nyan Nabi Daud geubantu lé Zadok keuturonan Eleazer dan lé Ahimelekh keuturonan Itamar. 4 Keuturonan Itamar teubagi teuma jeuet lapan boh keulompok, seudangkan keuturonan Eleazer jeuet nam blaih boh keulompok, sabab didalam keuluwarga Eleazer leubeh le keuturonan nyang agam jeuet keu ulée keuluwarga. 5 Bah kheueh didalam keuturonan Eleazer meunan cit didalam keuturonan Itamar na peujabat-peujabat Baét TUHAN dan peumimpén-peumimpén agama, lé sababnyan peubagian tugaih jipeugöt deungon cara teu-undi. 6 Keuturonan Eleazer dan keuturonan Itamar meugantoe-gantoe jitarek undi, dan nan-nan awaknyan laju jicetet lé sidroe seukeutareh nyang nan jih Semaya aneuëk Netaneel ureuëng Lewi. Banmandum nyan jipeubuet dikeue raja meusajan deungon peugawée-peugawée gobnyan, Teungku Imeum Zadok, Ahimelekh aneuëk Abyatar meunan cit deungon ulée-ulée keuluwarga geulongan imeum dan ulée-ulée keuluwarga golongan Lewi. 7 Nyoe kheueh lumboi meunurot gileran tugaih nyang meuteumé dan meunurot nyang teu-undi keu ban dua ploh boh keulompok nyan: 1. Yoyarib 2. Yedaya 3. Harim 4. Seorim 5. Malkia 6. Miyamin 7. Hakos 8. Abia 9. Yesua 10. Sekhanya 11. Elyasib 12. Yakim 13. Hupa 14. Yesebeab 15. Bilga 16. Imer 17. Hezir 18. Hapizes 19. Petahya 20. Yehezkiel 21. Yakhin 22. Gamul 23. Delaya 24. Maazya
19 Nan-nan ureuëng nyang ka teupeugah nyan teucetet meunurot gileran awaknyan keu jitamong u dalam Baét TUHAN dan jipeubuet tugaih iébadat nyang ka geupeuteutab lé Nabi Harun, indatu awaknyan, nyang paih lagée peurintah TUHAN, Allah Israel.
20 Seulaén nibak nyan lam keuturonan ureuëng Lewi mantong jitamong keunan ulée-ulée keuluwarga nyang teupeugah seulanjut jihnyoe: Yehdeya, keuturonan Amram nibak garéh keuturonan Subael; Yisia, keuturonan Rehabya; Yahat, keuturonan Yizhar nibak garéh keuturonan Selomot; Yeria, Amarya, Yahaziel dan Yekameam aneuëk-aneuëk Hebron meunurot urotan umu jih; Samir, keuturonan Uziel nibak garéh keuturonan Mikha; Zakharia, keuturonan Uziel nibak garéh keuturonan Yisia syedara Mikha; Mahli, Musi dan Yaazia, keuturonan Merari.
27 Yaazia na jimeu aneuëk lhée droe aneuëk agam: Syoham, Zakur dan Hibri.
28 Mahli na teuma jimeu aneuëk dua droe aneuëk agam nyang teuboh nan Eleazar dan Kish. Eleazar hana jimeu aneuëk nyang agam, teuma Kish na jimeu aneuëk sidroe aneuëk agam nyang teuboh nan Yerahmeel.
30 Aneuëk agam Musi na lhée droe: Mahli, Eder dan Yerimot. Nyan kheueh keuluwarga-keuluwarga lam sukée Lewi.
31 Keu gileran tugaih awaknyan, tieb-tieb ulée keuluwarga meusajan deungon adoe jih nyang agam jitarek undi lagée nyang ka jipeubuet lé waréh kawöm awaknyan, na kheueh lé teungku-teungku imeum nibak keuturonan Nabi Harun. Watée teutarek undi nyan jipeusaksi lé Raja Nabi Daud meusajan deungon Zadok, Ahimelekh meunan cit deungon ulée-ulée keuluwarga nibak gulongan teungku-teungku imeum dan nibak gulongan ureuëng Lewi.
