1 Tuja kuashat tsawan nagkaemakiu ai, trigo juut jegamunum Sansón niina nuwen ijagsatatus wegak chivo tsakatan juki weuwai. Nunik jegaa chichaak:

“Mina kanutaijui wayan mina duwagjai chichastajai” tusa wayatag titatman niina wegaji dakitjauwai. 2 Nunik chichajak:

“Wika dakitakus idaisayatai tibaijai. Tau asan amina kumpagmín nuwemnak sujukmaijai. Tujash tikich mina nawantug ekeu niina nagkaesau shigmauch puja nunú nuwatkata”, tiuwai.

3 Tusa tama Sansón ayaak:

“Yamai atum filisteo aidautigminak wi ijinattajime. Dutika ai wagka aikae tujutmainuk atsuttawai”, tiuwai.

4 Nuna tusa ukuak niina nuwe sujutkamunum iikmaktatus, trescientos amich nuwa aidaun achika ijumjauwai. Dutika apa apatuk ujuknum jigkakui. Dutika jimag amich apatka jigkakbaunum nuna ujuken ekematain anug jigkakui. 5 Dutika nuna ekemak amichan atia filisteo aidau ajaji aidaunum ishiakui. Nunú shimak trigo juuka ijumjamu aidaun eke juukchamu aidaujai ashí apekui. Dutikak nuigtushkam uva ajakbaun, olivo* “Olivo”: Juka makichik ajakai. Nuna nejeshkam olivo tutayai. Untsu nunú juuka painkamu aceituna tutayai. ajakbaujai ashí apeka ijinauwai.

6 Dutika ijituam filisteo aidauk: ¿Yaki aikae? tusa inimainak yujakma: Auk Sansógka wegaji niina nuwen atanki, niina kumpajinig sujutkam, nuna iikmak aikae tabaun dekawajui. Nunik dekawag nuna shimutuk nunú nuwanak apajijai apeawag maawajui. 7 Dutikawagmatai Sansón chichaak:

“Atum aniau asagmin, nuna iikmakun makichkish idaitsuk ashí amuktatjime. ¡Nunak dekas wi umiktinjun tajai!” tiuwai. 8 Tusa senchi kajeku asa filisteo aidaun jeteka shiig kuashat ijinauwai. Dutika ukuak Etamnum kaya múun waa au asamtai, nuwi uumak pujustatus weuwai.

9 Nunik weu ai filisteo aidaushkam Sansógkan egainak Judá nugken shiyakajui. Nunikag jegawag nuwi nagkamas batsamak nugka Lehi† “Lehi” tawa duka hebreo chichamnumak “kuntinu jagken” taku tawai. tutaiya imanui jegantajui. 10 Imanikagmatai Judá wegantu aidau ditan iniinak:

“¿Wagka jutijai maaniatasagmesh atumesh kaunaugme?” tuidau.

Tusa tama dita aimainak:

“Sansón iina pegkegchau awagtamkau asamtai, achika juki iishkam dutiksaik iikami tusa yujaji”, tuidau.

11 Tusa tiagmatai nuna antukag, tres mil aents Judá wegantu aidau Etamnum kaya múun waa aunum nuwi Sansón pujau asamtai shimutkauwai. Nunik jegawag nuwi pujuttaman wainkag chichajuinak:

“¿Amek dekatsmek filisteo aents aidau iina nagkaetamsau senchigtin aina duka? ¿Wagka jutikamesh utugchatash itagkagtuaume?” tuidau.

Tusa tama Sansón ditan ayaak:

“Wika dita pegkegchau takasbaujin dutiksanuk iikamjai”, tiuwai.

12 Tusa timatai dita chichajuinak:

“Iik ame achika juki filisteo aidaunum sujukmi tusa kaunaji”, tuidau.

Tusa tama Sansón ayaak:

“Atum mantuashtinaitkugmek, dekas mashtatjame tusa tujuttajum”, tiuwai.

13 Tusa tutai dita ainak:

“Atsa, ii aidautik mashtatjame, ayatak achika juki filisteo aidau susami tusa taji”, tuidau. Aatus tusag jimag soga yamagmai jigkajajui. Dutikawag uumak pujaun jiikiag jukiajui.

14 Dutikawag we wenakua Lehin nugkanum jegawajui. Nunikagmatai filisteo aidauk shiig aneenak untsumkiag jiintujajui. Dutikiagtai Apajuí Wakani Sansógkan senchimtikauwai. Dutikam sogayai niina kuntujin, uwejen jigkagbaunak hilo lino najanamu apeamu tsujinmaina numamtuk tsujiajui.

15 Dutika nuadui burro jagke eke shiig sakamchau atatman juki, duwi awatug mil filisteo aidaun kajegkui. 16 Dutika chichaak:

17 Nuna tusa burro jagke takakbaun nagkima ajapauwai. Nuadui nunú nugka daajig Ramat-lehi‡ “Ramat-lehi” tawa duka hebreo chichamnumak “jagke nain” taku tawai. adaikamui.

18 Tuja Sansón senchi kitaag Tuke Pujuun segaak: “¡Ame minak shiwag shiig kuashat aina nuna depetkati tusam yainkaume! Nuadui ¡yumi umumain atsutai juju aents amina umigtamchau batsata nuwi kitakai jakati, nunikmatai niina iyashin dushikjatnume tusamek idaitumaitsume!” tiuwai.

19 Tusa timatai Apajuí yumi initkanmayan jiikiuwai. Dutikamtai Sansón nuna uwajui. Nuna uwag ataktu wajiu wajasui. Nuadui nunú yumi pukuni jiinkiuwa nuna daajin adaikauwai En-acore.§ “En-acore” tawa duka hebreo chichamnumak: “entsa segabau” taku tawai. Duka yamaikish nugka Lehin tutainum awai.

20 Sansógkak veinte mijan Israel aents aidaun yaigkui. Nunak filisteo aidau nunú tsawantin Israel aents aidaun ashí depetuk waitkajaku aina nunú tsawantin niig takasui.