Matyur
dwandfamo gutnius mrokfot
Barkof kfo nuhas mrokfot
Ndart Matyur wandfamo gutnius mrokfom yorhwa gonbornget. Gutnius mrokfom yorhwa gonborngm, 4-pela gonborngm gutnius mrokfom korhm. Ndar gonborngm Jisasr ndar bbinysoft nia tohmo yuharoh kfo tndh mrokfom korhm. Ndar Matyur wandfamo gutnius gonborngtn nyingako myorhekwot. Ndar barkof gonborngt yorhwa mrokfom Jisasr Mariat hiyaumo yuhat yo Jisasr nohmo yuhati ee ror tfit sinyahato hefenr muhmo yuhathu kfo nuhas mrokfom korhmt ndar Matyu gonborngt.
Bingot Bro Nkifrarhu profetm kfomo mrokfom nkifram yakitohmoa gonborngtn hta bugamomm. Kfo hna memoum, “Kto Isrerroh Bro Nkifrarpno yiyuk yihotat wom yimar nieruharn tfit yak htakhirahrm.” Nd rom kfo htamo mrokfot nhai furarmomt. Yafothett rhumott. Nd rom kfo memo yimar nierahr, to Jisas Kraisr niamor. Nd Jisas Kraisr niahato ror hingrnamo hingrnefm ndar Matyu gonborngtn hti hik bugarahnm. Nd Bro Nkifrarhu profetm kfo pthamo mrokfom, yafothet bugam rhumom. Wahtitwanm nd mrokfom korhm Matyu 1.22-23, yo 2.4-6 yo 2.14-15 yo 2.23 yo 4.13-16 yo 8.16-17 yo 12.15-21 yo 13.34-35 yo 21.2-5 yo 21.16 yo 26.24 yo 26.31 yo 26.54 yo 27.6-10.
Yo wom mrokfot Matyur dkfomot, Bro Nkifrarhu kingdomkfot kfo pthamor. Bro Nkifrar kangr, “Ndar bbinysof thof bugam atohukatohkahann tuhan yindar bugam nanrpayanhu dukefrpar hikrahm.” Ndnettn Jisas Kraisr fak marnyamort yimaroh Bro Nkifrarpno yiyuk yihotat.
Matyu gonborngt yorhwa mrokfom, Jisasr pthamoam, nmbuha nmbuha rhu hanitm. Barkof mrokfo nmbuhat htirahnt sapta 5 pthaknimortn sapta 7 mptha tmbhomort (5-7). Nd saptaroh mrokfom Jisasr yura wom kminysoft tohhato dkfo pthamo mrokfomn korhm. Bok met yindarim yi wany yakitohmotm yirmoh mrokfom hemorm. Yo wom mrokfo nmbuhat sapta 10 korht. Nd saptakfote, disaiperm yak hta hanyhato rom hingrnayuk hingrnefm, rom yakyuk krhopam, o rom finji finji tohkfot, ndm kfo ptha nuhasmorm.
Yo wom mrokfo nmbuhat sapta 13 korht. Nd saptakfot kfo nhombra mrokforpam korhmt. Bro Nkifrarhu kingdomkfot Jisasr kfo pthamohat, mimn, wit yukhamn, yispamn, kipr bebtn, nd ndmn kfo nhombramor. Yo wom mrokfo nmbuhat sapta 18 korht. Nd saptakfot Jisasrhu tu disaiper mif rhunefthu mrokfom tu Jisasr kfomorm. Wuroh mrokfo nmbuhat sapta 24-25 korhm. Nd saptafhu mrokfom wuroh yihar rhuruha nefm Jisasr kfo pthamor.
Ndar buk Matyukfot wandfayuk yimarhu yufat nhai htarmomt. Be kfo kangmt “Matyur Wandfayuk Gutnius Mrokfom”. Ka nd sapta 9.9-13 kfo pthamo takis yakmoa yima Matyur dukahato, ror kfo memom, rorn wandfamort. Ndt be wom yimaroh dukefet. Tu nd Matyu gonborngt wandfa mifyuk yimarhu yufat nhai frhikakrmomt.
Jisasr niamo yuhat
1
(Sapta 1.1–4.16)
Jisas Kraisrhu frikef yuhathu nkifraroh yufam
(Luk 3.23-38)
1 Ndarm Jisas Kraisrhu nkifraroh yufayem. Jisasr Defit frikef yuhat niamor, tfit Defitrn Abrahamrhu frika yuhat niamor.* Bingot Bro Nkifrar wom bro mrokfot Abrahamrpno fak dbkafmor. Tfit kto wom bro mrokfot fak dbkafmor Defitrpno.
2 Abrahamrn nasakmorr Aisakr. Tfit Aisakr nasakmorr Jekofr. Jekofr nasakmorm Judari rorhu wom nmemrom. 3 Judar nasakmorf Peres Serarof. Rofhu mmemt Tamat. Tfit Peresrn nasakmorr Hesronr. Yo Hesronrn nasakmorr Ramr. 4 Yo Ramrn nasakmorr Aminadafr. Aminadafrn nasakmorr Nasonr. Yo Nasonrn nasakmorr Salmonr. 5 Salmonr nasakmorr Boasr. Rorhu mmemt Rahaft. Boasrn nasakmorr Obetr. Rorhu mmemt Rutt. Tfit Obetrn nasakmorr Jesir. 6 Jesirn nasakmorr King Defitr.
Yo Defitrn nasakmorr Solomonr. Solomonrhu mmemtn Uriarhu mett rhumot. 7 Solomonr nasakmorr Rehoboamr. Rehoboamrn nasakmorr Abiyar. Yo Abiyarn nasakmorr Asar. 8 Asarn nasakmorr Jehosafatr. Tfit Jehosafatrn nasakmorr Jehoramr. Jehoramrn nasakmorr Usiar. 9 Usiar nasakmorr Jotamr. Jotamr nasakmorr Ahasr. Yo Ahasrn nasakmorr Hesekiar. 10 Hesekiar nasakmorr Manaser. Yo Manaser nasakmorr Emonr. Emonrn nasakmorr Josaiar. 11 Josaiar nasakmorr Jehoiakinri rorhu nmemrom. Nd yihar Isrerm Babilonko kalabus yi tohmom.
12 Isrerm Babilonko kalabus bi htanyetmn Jehoiakinr nasakmorr Sealtierr. Yo Sealtierrn nasakmorr Serubaberr. 13 Serubaberrn nasakmorr Abiutr. Abiutrn nasakmorr Eliakimr. Eliakimrn nasakmorr Asorr. 14 Asorrn nasakmorr Sadokr. Yo Sadokrn nasakmorr Akimr. Akimrn nasakmorr Eliutr. 15 Eliutrn nasakmorr Eleasarr. Eleasarrn nasakmorr Matanr. Matanrn nasakmorr Jekofr. 16 Jekofr nasakmorr Josefr.
Josefr tohhato Mariat fakmor. Mariat rotn hiyaumotr Jisasr. Jisasr tor nd yimam yutiwa Kraiser. Tor nd yimar Bro Nkifrar bi kfo htamor turhu met yindariroh minrfa htiyakyukr.
17 Nd na kfo hawihne nkifraroh yufam Abrahamrpno ritohakmom bi 14-pela nkifram tohmom Defitrpno mthomna tmbhomohat. Tfit Defitrpno thomnakni Babilonko kalabus yinyeftpno mthomna tmbhomohat, tfit wom 14-pela nkifram tohmom. Tfit ndha thomnakni nd hbhakyuk Kraisrpno mthomna tmbhomohat wom 14-pela nkifram tohmom.
Jisasr nurmo yuhathu kfo nuhas mrokfot
(Luk 2.1-7)
18 Jisasrhu niayuk yuhathu kfo nuhas mrokfot inji korht. Rorhu mmem Mariat, bi kfo nanf hanymomt Josefrpno. Be yuhre nakfo nanf hanyetfn tfit htimomt Mariat yon fanett rhumot. Nd yon fant Bro Nkifrarhu Yafothat kfomott Mariat yon fanett rhumot. 19 Mariathu kfo nanf yima Josefr dborioh yimarn, nd Mariat yon fanet rhumohat ror nhai marimor, “Rikfo akforuhant.” Nhai. Rorhu dukeft duka memor, “Rikfo akfo yiruhant yak yimtnaruhant. Be nann nhowi fnahhato frtrohruhant.” 20 Josefrhu yima yuhur inji rhu hanyetrn Bro Nkifrarhu mounmotr twenano niahato kfo memorr, “Josef, Defitrhu tangishofe, mirahn Mariathu yakneft wom bok dukefm ayaka. Wawanyn, nd Mariathu yon fant Bro Nkifrarhu Yafothat kfomott yon fanett korht. 21 Nd rot hiyauruha yonrhu yufat wayutatwanr Jisasr. Rorn nrfa rafakrahrm tuhan yindarirm Bro Nkifrar finji naneft. Ndnettn nd Jisas yufat wahmbritwanr.”
22 Nd nefm namohat bi Bror profetmpno kfo htamo mrokfo yuhatn inji rhu hikmom. Profetr inji kfo memor,
23 “Wom mett tafi ram duhatt yon fanett rhuruhatn wom yon yindarir hiyaurahtrn yufat yutarahmr Emanuerr.” Ais 7.14
Nd yufathu yimbu yuhat inji, “Bro Nkifrar nompno tohwor.”
24 Be Josefr sinyamohat nd Brorhu mounmotr kfoyuk mrokfo yuhatn yak hikhato Mariat fakmiyakmort. 25 To nhai rpat rpa rika bukt hwe inji narmof. Be inji nndo tohhany tohhany Mariat hiyaumotr yon yindarir. Yonr nurnimotr Josefr yufat futamor Jisasr.
*1:1: Bingot Bro Nkifrar wom bro mrokfot Abrahamrpno fak dbkafmor. Tfit kto wom bro mrokfot fak dbkafmor Defitrpno.