2
Kag Pagta-o it Ispirito Santo sa mga Nagsusunor kang Kristo sa Adlaw it Pentecostes
1 Pag-abot it Adlaw it Pentecostes,* 2:1 Kag gustong bisayahon it Adlaw it Pentecostes ay Pangsingkwentang Adlaw halin sa pagtuna it pag-ani. Ag kag tig-ani sa Hudeya ay pagkalipas sa Pista it Pagkaluwas it mga lahi it Hudyo sa Ehipto ag Pista it Tinapay nak Waya't Pangpaalsa. nagtinipon sinrang tanan nak nagsusunor kang Kristo sa usang bayay sa Herusalem. 2 Gulpi sinrang nakarungog it hagunghong halin sa langit tuyar sa pag-abot it makusog nak hangin. Ag napuno it kaling hagunghong kag bug-os nak bayay kung hariin sinra giiingkor. 3 Bag-o inggwa sinra it nakita nak pay mga rayab it kayado nak kurting rila, nak nagbuyag-buyag ag nagtungtong sa uyo it bawat usa sa inra. 4 Sinrang tanan ay napun-an it Ispirito Santo ag sinra ay nagbisaya it mga linggwahe nak waya ninra dating natun-i, kumporme sa gingpabisaya sa inra it Ispirito Santo.
5 Hagto ra sa Herusalem kag maramong mga matutom nak kalahing Hudyo halin sa iba't-ibang nasyon sa kalibutan. 6 Pagkarungog ninra sa hagunghong, nagrinagipon kag karuramong tawo. Nagkatingaya sinra dahil narunggan it bawat usa sa inra nak gingbibisaya it mga nagsusunor kang Kristo kag inra mga sariling linggwahe. 7 Sa inra rakong pagkatingaya, mansigpangutana sinra:
“Buko baga kaling mga tawo nak nagbibisaya ay puro mga taga-Galileya? 8 Asing narurunggan it bawat usa sa ato nak gingbibisaya ninra kag ato mga sariling linggwahe? 9 Inggwa rili sa ato it mga Partonhon, Medonhon ag Elamnon,† 2:9 Kaling mga bansa ay asa bandang subatan it Hudeya ag ngasing ay sakop it Iran. ag mga halin sa Mesopotamya, Hudeya ag Capadosya, Ponto ag Asya. 10 Inggwa ra it mga halin sa Prigiya, Pampilya,‡ 2:10a Kaling mga bansa ay asa bandang norte it Hudeya ag ngasing ay sakop it Turkey ag Iraq. ag Ehipto, ag mga taga-parti it Libya nak hampig sa Cirene.§ 2:10b Kaling mga bansa ay asa bandang sugbuhan it Hudeya ag ngasing ay sakop it Africa. Inggwa ra it mga bisita rili nak halin sa Roma.* 2:10c It kato kag Roma ay imaw kag Kapitolyo o Centro it inra kalibutan. Kali ay asa bandang sugbuhan pa-norte halin it Hudeya. 11 Kag iba ay matuor nak mga lahi it Hudyo ag kag iba ay nagsuyor yang sa ato relihiyon. Kag iba ra ay halin sa Isla it Creta† 2:11a Kali ay usang isla nak asa bandang sugbuhan it Hudeya. ag halin sa Arabya.‡ 2:11b Kaling bansa ay asa bandang subatan it Hudeya sa tabok it disyerto. Pero aber tuyar, bawat usa sa ato ay narurunggan nak kag ibang tawo ay nagbibisaya it ato sariling linggwahe sa inra pag-istorya tungor sa mga milagro nak inghuman it Dios.”
12 Sinrang tanan ay natitingaya ag nalilibugan, kada napasiling sinra sa usa'g-usa, “Ni-o kag gustong bisayahon it kali?”
13 Pero kag iba sa inra ay ginggugur-an kag mga nagsusunor kang Kristo ag nagsisiling, “Ah, mga yango yang kina!”
Kag Pagpamatuor ni Apostol Pedro sa mga lahi it Hudyo nak si Hesus nak Gador kag Kristo
14 Pero si Pedro, kaibahan nak nakatinrog it onseng apostoles, ay nagbisaya it makusog sa mga tawo:
“Mga tawo, mga kasimanwang Hudyo ag sa inrong tanan nak rahali ngasing sa Herusalem, inggwa ako it ipaayam sa inro, ag panimati-i ninro kali it maado. 15 Kaling mga tawo ay buko yango nak tuyar sa inro ging-iisip dahil alas nwebe pa yang it aga, 16 kundi imaw kali kag katuparan it gingsiling it kato pa ni Propeta Joel nak:”
17 “Siling it Dios, ‘Sa huling mga adlaw,
Ako iparaya kag Ako Ispirito sa tanang tawo.
Kag inro mga anak nak kayake ag kabade ay mabisaya it mga mensahe nak Ako ita-o sa inra,
makakakita kag inro mga kabataan it mga pangitaon halin sa Ako,
ag mapananamgo kag inro mga maguyang it mga langitnong pananamgo.
18 Matuor, sa mga adlaw nak kato,
iparaya Nako kag Ako Ispirito sa Ako mga suguon nak kayake ag kabade,
ag sinra ay mabisaya it mga mensahe nak Ako ita-o sa inra.
19 Ag mapakita Ako it mga katitingayang bagay sa langit,
ag mga tanra rili sa duta,
rugo, kayado, ag maramoy nak aso.
20 Maruyom kag adlaw,
ag mapuya it tuyar sa rugo kag hadag it buyan
bag-o mag-abot kag adlaw it Gino-o,
katong rako ag kapapangidlis nak adlaw it Ida paghusgar.
21 Ag matatabo pa nak aber sin-o kag maayaba sa Gino-o
ay maluluwas.’ ”§ 2:21 Joel 2:28-32.
22 “Mga kasimanwa nakong Israelinhon, panimati-i ninro kali. Si Hesus nak taga-Nazaret ay gingpamatuuran it Dios nak Sida ay Ida ingsugo. Gingpamatuuran Nida kali parayan sa mga milagro ag katitingayang buhat ag tanra nak Ida inghuman sa inro tunga parayan kang Hesus. Ayam nak gador ninro kali dahil hali mismo sa inro kali natabo. 23 Kaling si Hesus nak ingtraidor kumporme sa kabubut-on ag dating kaayaman it Dios, ay inro gingpalansang sa krus ag ingpamatay sa mga tawo nak waya't pagtahor sa Kasuguan it Dios. 24 Pero Sida ay gingbanhaw it Dios, pagkatapos nak bay-on Sida sa gahom it kamatayon, dahil indi Sida puyding punggan it kamatayon. 25 Siling ni David tungor sa Ida:”
“ ‘Ayam nako nak permi nakong kaibahan kag Gino-o,
perming hali Sida sa ako tupar,
kada indi ako matanrog.
26 Ag dahil dili, nasasadyahan kag ako tagipusuon,
ag ako ay napapakanta sa pagdayaw,
ag aber kag ako yawas ay mamatay,
inggwa gihapon ako it ing-aasahan nak kabuhi,
27 kumo indi Nimo gipabad-an kag Ako kalag nak
hagto yangey sa ingpapagtuan it mga minatay.* 2:27 Kali sa bisayang Griyego ay “Hades.” Basaha ra sa Glosaryo kag tungor sa “Hades.”
Imaw ra, indi Nimo gitugutan nak
kag Imo Balaan nak Suguon ay mayunot sa yuyubngan.
28 Gingtudlo Nimo sa Ako kag rayan papagto sa kabuhi,
kada Ako ay masasadyahan dahil Ikaw ay permi Nakong kaibahan.’ ”† 2:28 Sal. 16:8-11.
29 Nagpadayon pa si Pedro, “Mga Hali nakong Israelinhon, masisiling nako sa inro it waya't pangruha-ruha nak katong ato Lolo nak si David ay namatay ag gingyubong, ag hasta ngasing hali pa kag ida yuyubngan. 30 Kumo sida ay propeta, ayam nida nak nagsumpa sa ida kag Dios nak usa sa ida mga inanak ay ibutang Nida sa trono it ida paghari.
31 “Ag dahil naayamaney nida kag ahimuon it Dios, ay iday gingsiling kag nahanungor sa pagkabanhaw it ingpromisang Kristo. Kada ngani si Kristo ay iday gingpauna it siling sa ida mga bisaya nak indi Sida gipabad-an nak hagto yangey sa ingpapagtuan it mga minatay ag indi gitugutan nak kag Ida yawas ay mayunot sa yuyubngan. 32 Kaling si Hesus ay gingbanhaw it Dios, ag kaming tanan ay makakapamatuor rili.
33 “Sida ay gingtaas sa tu-o it Dios nak Tatay, ag ingtaoy sa Ida kag karapatan nak ita-o kag ingpromisang Ispirito Santo sa Ida mga manugsunor. Kaling inro nakikita ag narurunggan sa ngasing ay imawey kina kag katuparan it tanan.
34 “Inggwa pa it ibang ingsiling si David tungor sa usa nak gingtaas sa langit. Ag kali ay buko tungor sa ida sarili dahil waya sida giray-a pa-langit, kundi kali kag ida ingsiling:
“Siling it Gino-o sa ako Gino-o,
‘Ingkor rili sa Ako tu-o,
35 hastang humanon Nako nak tungtungan it Imo mga siki
kag Imo mga kaaway.’‡ 2:35 Sal. 110:1.
36 “Kada ngani kitang mga Israelinhon ay kinahangyan nak magpatey nak kaling Hesus nak inro gingpalansang sa krus ay imaw nak gador kag ingbutang it Dios nak Gino-o ag Kristo.”
37 Pagkarungog ninra it kali, nakunsensya sinra, kada nagpangutana sinra kang Pedro ag sa ibang mga apostoles, “Mga hali, ni-o kag amo ahumanon?”
38 Nagsabat si Pedro:
“Maghinuysoy kamong tanan ag magpabawtismo kamo sa pangayan ni Hesu-Kristo, pramas kamo ay patawaron sa inro mga sala ag mapapasa-inro kag Ispirito Santo. 39 Dahil kali kag ingpromisa it Dios para sa inro ag sa inro mga anak, ag para sa tanang tawo ruto sa mayado ra, para sa tanan nak atawagon it ato Ginoong Dios nak magpayungot sa Ida.”
40 Maramo pa kag gingsiling ni Pedro sa pagpamatuor sa inra, ag ginglaygayan nida sinra sa pagsiling, “Payaduan kag inro sarili sa mayaing inghihimo it mga makasal-anan pramas indi kamo makaibahan pag sinra ay aparusahan.” 41 Ngani, maramo kag nagtu-o sa ida ingbisaya ag nagpabawtismo. Sa adlaw nak kato kag bilang it mga tawong narugang sa mga nagsusunor kang Kristo ay mga tatlong libo.
42 Nagtutom sinra sa pagsunor sa mga gingtudlo it mga apostoles, sa pagpakig-usa sa mga nagsusunor sa Ginoong Hesu-Kristo, sa pagkaon it binika-biká nak tinapay bilang pagrumrom sa kamatayon ni Kristo,§ 2:42 o “pagbika-biká it tinapay.” Kali kag inra unang tawag sa sagradong paninghapon. ag sa pagpangamuyo.
43 Maramo rang katitingayang milagro ag tanra kag ginghuman it mga apostoles, kada nagkainggwa it kahadlok sa Dios kag tanan. 44 Kag tanang nagtutu-o kang Kristo ay nagkausa, ag inra ingpipisan kag tanan ninrang ari-arian ag ingpaparti sa tanan kumporme sa kinahangyan. 45 Inabaligya ninra kag inra mga propriyedad ag kagamitan ag ingpapana-o kag binta ruto sa nagkikinahangyan sa inra mga kaibahan. 46 Adlaw-adlaw, sinra ay nagtitipon ag nagrurungan sa pagdayaw sa rayaag it Templo. Sinra ay magkaibahan nak nagkakaon it paninghapon ag binika-biká nak tinapay sa inra mga bayay bilang pagrumrom sa kamatayon ni Kristo, nak inggwa't kasadya ag sinseridad sa inra mga tagipusuon. 47 Permi sinrang nagdadayaw sa Dios ag namumut-an sinra it mga tawo. Adlaw-adlaw gingrurugang sa inra it Gino-o kag mga naluluwas.
*2:1 2:1 Kag gustong bisayahon it Adlaw it Pentecostes ay Pangsingkwentang Adlaw halin sa pagtuna it pag-ani. Ag kag tig-ani sa Hudeya ay pagkalipas sa Pista it Pagkaluwas it mga lahi it Hudyo sa Ehipto ag Pista it Tinapay nak Waya't Pangpaalsa.
†2:9 2:9 Kaling mga bansa ay asa bandang subatan it Hudeya ag ngasing ay sakop it Iran.
‡2:10 2:10a Kaling mga bansa ay asa bandang norte it Hudeya ag ngasing ay sakop it Turkey ag Iraq.
§2:10 2:10b Kaling mga bansa ay asa bandang sugbuhan it Hudeya ag ngasing ay sakop it Africa.
*2:10 2:10c It kato kag Roma ay imaw kag Kapitolyo o Centro it inra kalibutan. Kali ay asa bandang sugbuhan pa-norte halin it Hudeya.
†2:11 2:11a Kali ay usang isla nak asa bandang sugbuhan it Hudeya.
‡2:11 2:11b Kaling bansa ay asa bandang subatan it Hudeya sa tabok it disyerto.
§2:21 2:21 Joel 2:28-32.
*2:27 2:27 Kali sa bisayang Griyego ay “Hades.” Basaha ra sa Glosaryo kag tungor sa “Hades.”
†2:28 2:28 Sal. 16:8-11.
‡2:35 2:35 Sal. 110:1.
§2:42 2:42 o “pagbika-biká it tinapay.” Kali kag inra unang tawag sa sagradong paninghapon.