1 I Yinni Gusunɔ siɑro.

I Yinni Gusunɔ siɑro sɑɑ wɔllun di.

I nùn siɑro sɑɑ wɔllun sɔɔ sɔɔn di.

2 Bɛɛ win ɡɔrɑdobɑ kpuro, i nùn siɑro.

Bɛɛ win tɑbu kowobu kpuro, i nùn siɑro.

3 Sɔ̃ɔ kɑ suru, i nùn siɑro.

Bɛɛ kperi kpuro, bɛɛ be i bɑllimɔ, i nùn siɑro.

4 Bɛɛ be i wɑ̃ɑ wɔllun sɔɔ sɔɔwɔ, i nùn siɑro.

Bɛɛ nim mɛ mu wɑ̃ɑ wɔllɔ, i nùn siɑro.

5 U woodɑ wɛ̃, ye kpuro yɑ koorɑ.

Ye kpuro yu nùn siɑro.

6 U ye tɑ̃sisiɑ sere kɑ bɑɑdommɑɔ.

U koo woodɑ yi, win tii kun mɑɑ ye sɑrɑmɔ.

7 Sɑɑ tem sɔɔn di, i Yinni Gusunɔ siɑro.

Bɛɛ nim wɔ̃ku kɑ nim bwee bɑkɑnu kɑ yɛɛ nɑnumɡii yi yi wɑ̃ɑ sɔɔ, i Yinni Gusunɔ siɑro.

8 Dɔ̃ɔ kɑ ɡuru kpenu kɑ ɡuri bɑkɑ kɑ bukɔ kɑ woo bɔkɔ,

bɛɛ be i win woodɑbɑ mɛm nɔɔwɑmmɛ, i Yinni Gusunɔ siɑro.

9 Bɛɛ ɡuunu kɑ ɡunɡunu kɑ dɑ̃ɑ ye yɑ rɑ mɑ kɑ sɛdurubɑ,

i Yinni Gusunɔ siɑro.

10 Gbeeku yɛɛ kɑ yɑɑ sɑbenu kpuro kɑ yɛɛ yi yi kɑbirimɔ kɑ ɡunɔsu,

i Yinni Gusunɔ siɑro.

11 Hɑnduniɑn sinɑmbu kɑ bwesenu kpuro kɑ sinɑ bibu kɑ hɑnduniɑn siri kowobu kpuro,

i Yinni Gusunɔ siɑro.

12 Aluwɑɑsibɑ kɑ wɔndiɑbɑ, tɔkɔnu kɑ bibu,

13 bɛɛ kpuro, i Yinni Gusunɔn yĩsiru bɛɛrɛ wɛ̃ɛyɔ.

Win yĩsirɑ kpɑ̃. Win ɡirimɑ yɑ wɔllu kɑ tem sɑre.

14 U win tɔmbu Isirelibɑ be, be bɑ nun nɑɑnɛ sɑ̃ɑ

bɑ wɑ̃ɑ win bɔkuɔ dɑm wesiɑ mɑ n kuɑ bɛɛrɛ bɑkɑ.

Yen sɔ̃, i Yinni Gusunɔ siɑro.