1 गो नेल्‍ल तचा ङा पा राप्‍शा बाक्‍नुङ। गो गारो ङोइश्‍शा कोव़नुङ। मिनु परमप्रभु यावेमी आं कली मार देंबा, मेको नेल्‍ल तशा नेंशा बाक्‍नुङ। आं कली मारेइ लोव़ लेप्‍बा कों, दे रिम्‍नुङ। यसैया २१:८ 2 मिनु नोले परमप्रभु यावेमी आं कली “गे इ तशो नेंशो ब्रेक्‍तो। रिम्‍शो पा रुप्‍चा ङा पा फुल्‍लु तार ब्रेक्‍तो। मिनु सु मेकेर लाइबा, मेकोम रीब पा पढेने चाप्‍ब। यसैया ३०:८; प्रकाश १:११,१९ 3 मारदे हना इ त‍शो आं देंशो नाक्‍ती जाक्‍ब। मेको दीसा नित्‍थी मदुम्‍त हना यो, मेको कली रिम्‍शा बाक्‍को। मेको थमा पा दुम्‍ब। देश मपाइब। इजीकीएल १२:२३; २ पत्रुस ३:९ 4 गे ठेयब लेश्‍शो कली कोव़ङो। मेको आ थुं मरिम्‍शो बाक्‍ब। तन्‍न ठीक पाइब आं कली थमा सुइश्‍शा ब्रोंइब। 5 मिनु शुश शोंप कली थमा सुइक्‍चा दूली बाक्‍ब। ठेयब लेश्‍शो मुर मलीब। मेको आ शोव़ तुरस खोदेंशो पा पाक्‍शा बाक्‍ब। बेक्‍पाइक्‍ब खोदेंशो पा गेनायो मरूब। रागी रागी ङा मुर नेल्‍ल आन कली खुप्‍शा आंम के सेल्‍ब” देंत।

6 मिनु “मुर नेल्‍लेमी मोदेंशो मुर आ पर्बम मुने तोक्‍चा ङा लोव़ पाइनीम। मेको आ पर्बम शुक्‍शी लोव़ पा, आबी आबी, गे अरु मुर आन शोंप आंम कली तेल्‍तीवी। गे गेना सम्‍म अरु मुरुमी इ कली गेशो क्‍येट आंम कली वोइक्‍नेवे? 7 मार, इ कली जेर गेबपुकी कालेमीन मबोक्‍नीमी ङा? मेकोपुकी सेंसीशा इ कली महिंपाइक्‍नीमी ङा? मेना गे श्‍येत जाइब दुम्‍नेवे। 8 मारदे हना गे रागी रागी ङा शुश मुर आन शोंप रोइक्‍ताक्‍नी। मुल चहिं इ साइक्‍तीक रे ब्रोंइशोपुकीमी इ के बाक्‍शो नेल्‍ल रोइक्‍नीम। गे मुर आन कली हुश ख्राक्‍श पोक्‍तीवी। गे रागी, सहरपुकी नु मेकेर बाक्‍ब मुर नेल्‍ल आन कली खतम सेल्‍तीवी” देंत। हबकुक २:१७

9 “आबी आबी, गे मरिम्‍शो पा क्‍येट चेम्‍नेवे। मोपा इ खिं ङा मुर आन कली खतम सेल्‍नेवे। तन्‍न गे ‘श्‍येत मजाइनुङ’ दे इ खिं इर सेल्‍तीवी। 10 गेम शुश जात जात ङा मुर साइक्‍तीके, इ खिं ङा मुर आन कली मुने तोक्‍शा, साइक्‍चा पुंइसीनेवे। 11 गारो ङा फु‍ल्‍लुमी इ पर्बम ‘वारच पने’ दे ग्रीनीम। मिनु थाम आ तार ङा शीमी मेको कली लोव़ लेप्‍ब” देंत। लूका १९:४०

12 “आबी आबी, गे हुश ख्राक्‍श पोक्‍तीकेमी, सहर का सेल्‍तीवी। गे ठीक मपतीकेमी सहर आ जग वोइक्‍ब बाक्‍नेवे। येरमीया २२:१३; मीका ३:१० 13 जात जात ङा मुर आन गेय नेल्‍ल मी कली ला दुम्‍ब। रागी रागी ङा मुरपुकी मली‍चा ङा गेय पचा कली सोम्‍सीनीमी, दे मुर नेल्‍ल आन परमप्रभु यावे आ देंशो मबाक्‍बा ङा? येरमीया ५१:५८ 14 तन्‍न रागी नेल्‍ल परमप्रभु यावे आ सक्ति ङा तुइक्‍तीकेम ब्रीशो बाक्‍ब। ब्‍वाक्‍कुमी समुन्‍द्र ब्रीशो खोदेंशो पा ब्रीशो बाक्‍ब” देंत। यसैया ११:९

15 “आबी आबी, गे इ नेक्‍था बाक्‍ब मुर आन कली मुने तोक्‍चा कली इ दुक्‍तीक थोव़क तुंइशा दुक्‍पाइक्‍नेवे। 16 गे ठेयब दुम्‍चा क्‍येङा शुश मुने दोक्‍नेवे। मुल इ पालो जाक्‍त। गे यो तूशा, दुक्‍शा दाइल पांइसो। परमप्रभु यावेमी आ ग्‍युरा गुइ ङा कचौरा इ कली गे‍ब। मिनु इ ठेयब दुम्‍तीके मुने दोक्‍ब। येरमीया २५:१५,२६ 17 गे लेबानोन ङा ठेयब रवा नेल्‍ल तिम्‍तीवी। मेकेर ङा ब्‍वाकी ङा जन्‍तु नेल्‍ल आन कली मरिम्‍शो पाप्‍तीवी। मेको इ मरिम्‍शो पतीके क्‍येक्‍क लेत्‍चा पुंइसीब दुम्‍नेवे। मारदे हना गे मुर आन कली हुश ख्राक्‍श पोक्‍तीवी। मिनु रागी, सहरपुकी नु मेकेर बाक्‍ब मुर नेल्‍ल आन कली खतम सेल्‍तीवी” देंत।

18 मिनु “मूर्तिम मार गेय पने चाप्‍बा ङा? मुर आ चेम्‍शो मूर्ति जोल ला बाक्‍ब। मारदे हना मेको चेम्‍बमी आंम चेम्‍शो मूर्ति कली थमा सुइक्‍ब। तन्‍न मेको मूर्ति ब्‍वाक्‍ने मचाप्‍ब। यसैया ४४:१०-२० 19 आबी आबी, गे शी कली ‘सेंसो’ दे ब्‍वाक्‍ने मचाप्‍ब फुल्‍लु कली ‘बोक्‍को’ देंनेवे। मार, मेकोमी मुर कली शेंने चाप्‍बा? मेको सुन चांदीमी गिल्‍शो बाक्‍त। तन्‍न मेको नु काइ ब्रोंइतीक सोक्‍त मबाक्‍ब। भजन संग्रह ११५:४-८ 20 मिनु परमप्रभु यावे आंम आ बाक्‍तीकेमी बाक्‍ब। रागी नेल्‍ल मेको आ ङोंइती मान पा सिक्‍सी पवल” देंत। भजन संग्रह ११:११; भजन संग्रह ७६:९; जकरिया २:१७; प्रेरित ८:३