1 यहोसु बेक्‍म नोले इस्राएलीपुकीमी परमप्रभु यावे कली “ङोंइती आंइ दाते ङा तेको थरमी कुशा, कनानी आन कली लडाइ तोचा?” दे हिल्‍लो पामे बाक्‍त। उत्‍पत्ती ४९:८; न्‍यायाधीस १८:५; न्‍यायाधीस २०:१८; प्रस्‍थान २८:३०; गन्‍ती २७:२१ 2 मिनु परमप्रभु यावेमी “यहूदा आ थर ङा मुर कुचा माल्‍नीम। नेनीन, गो मेको रागी मेको आन कली गेनुङ” देंमाक्‍त। 3 मिनु यहूदा आ लोक्‍ब सिमियोन कली “गे आं कली गेशो रागी ग्राचा कली वारच पथ पिवो। मोपा गो कनानी नु लडाइ पाइनस। नोले गो गे नु इ कली गेशो रागी ग्राचा कली वारच पथ लाइनुङ” देंमाक्‍त। मिनु सिमियोन आ थर ङा मुर यहूदा आ थर ङा मुर नु लमा बाक्‍त। 4 मिनु यहूदा आ थर ङा मुरपुकीमी लडाइ पा परमप्रभु यावेमी कनानी नु परिज्‍जी आन कली मेको आन गुइम गेवा बाक्‍त। मेकोपुकीमी मेको आन कली खेदा पामे बाक्‍त। बेसेक सहरमी १० हजार मुर आन कली साइश्‍शा ग्रामा बाक्‍त। 5 मेकेर मेकोपुकीमी अदोनी-बेसेक माइश्‍शो पिप नु लडाइ पामे बाक्‍त। मेकोपुकीमी कनानी नु परिज्‍जी आन कली ग्रामा बाक्‍त। 6 मिनु अदोनी-बेसेक प्रोक्‍माक्‍त। तन्‍न यहूदा आ थर ङा मुरपुकीमी मेको कली खेदा पा थिश्‍शा, आ गुइ खोइल ङा बोंग्‍ये ख्रोइश्‍शा गेमे बाक्‍त। 7 मिनु अदोनी-बेसेकमी “गुइ खोइल ङा बोंग्‍ये ख्रोइश्‍शो ७० जना पिपमी आं निश्‍शा जतीक रे दोक्‍शो जचा थोव़क जाम्‍तेक्‍म। ङोंइती गो दोदेंशो पङा, मुल परमप्रभुमी आं कली यो मोदेंशोन पाप्‍तु” देंमाक्‍त। मिनु यहूदा ङा मुरपुकीमी मेको पिप कली यरूसलेम चाक्‍गमे बाक्‍त। मिनु मेको मेकेर बेक्‍माक्‍त।

8 यहूदा आ थर ङा मुरपुकीमी यरूसलेम कली लडाइ पा ग्राशा, आंम के सेल्‍मे बाक्‍त। मेकोपुकीमी मेकेर ङा मुर आन कली तरवारमी क्‍योरशा सदमे बाक्‍त। मिनु सहर कली मी सुइक्‍त्‍मे बाक्‍त। न्‍यायाधीस १:२१ 9 मिनु नोले यहूदा ङा मुरपुकी पहाडी रागीमी, नेगेब नु दिंममी बाक्‍शो कनानी नु लडाइ पथ लमा बाक्‍त। यहोसु १०:४०; यहोसु ११:१६-२० 10 मिनु मेकोपुकीमी हेब्रोन ङा कनानी नु लडाइ पामे बाक्‍त। मिनु शेशै, अहीमान नु तल्‍मै कली ग्रामा बाक्‍त। हेब्रोन आ ङोंइती ङा नें किरयथ-अरबा बाक्‍त। यहोसु १५:१३-१९

11 मिनु नोले देबीर ङा मुरपुकी नु लडाइ पचा ठीक दुम्‍मा बाक्‍त। देबीर कली ङोंइती किरयथ-सेफेर देंबाक्‍तेक्‍म। 12 मिनु कालेबमी “सुम किरयथ-सेफेर कली लडाइ पा ग्राबा, मेको कली आं तमी अकसा ग्‍युंबे पा गेनुङ” देंमाक्‍त। यहोसु १५:१६ 13 मिनु कालेब आ लोक्‍ब केनाज आ तौ ओथ्‍नीएलमी किरयथ-सेफेर कली ग्रामाक्‍त। मिनु कालेबमी आ तमी अकसा कली मेको नु ग्‍युंबे पा गेवा बाक्‍त। यहोसु १५:१६-१९ 14 मिनु काबु ओथ्‍नीएलमी अकसा कली “आं आफ ‘रू का गेयी’ दे पुन” दे मदा बाक्‍त। मिनु अकसा आ गधा रे तोंइसे बाक्‍त। मोपा तोइश्‍शो तशा कालेबमी “गे मार माल्‍दे?” दे हिल्‍लो पवा बाक्‍त। 15 मिनु अकसामी “आं कली मारेइ गेनीनी कों? गे आं कली नेगेबमी रू गेतीनी। मोपतीके मुल आं कली ब्‍वाक्‍कु बुक्‍तीक पाइश्‍शो रू यो गेने” देंमाक्‍त। मिनु कालेबमी मेको कली आइदी नु आइक्‍था ङा ब्‍वाक्‍क बुक्‍तीके निक्‍शी गेवा बाक्‍त।

16 मोसा आ शिउ आ खिं ङा होबाब आ चच युइ, केनीपुकी नु यहूदा ङा मुरपुकी खजूर रवा आ सहर रे पा आराद सहर आ नेक्‍था ङा नेगेबमी बाक्‍शो यहूदा ङा गोरशो रागीमी लमा बाक्‍त। मिनु मेकेर बाक्‍ब अमालेक ङा मुरपुकी नु बाक्‍चा गोव़मे बाक्‍त। न्‍यायाधीस ४:११; गन्‍ती १०:२९; यहोसु १२:१४ 17 मिनु यहूदा ङा मुरपुकी आंम लोक्‍ब सिमियोन आ थर ङा मुरपुकी नु लशा, सेफतमी बाक्‍ब कनानी आन कली लडाइ पा मेको आन सहर खतम पोक्‍गमे बाक्‍त। मोपतीके मेको सहर आ नें होरमा वोदमे बाक्‍त। ब्‍यवस्‍था २०:१२-१८ 18 यहूदा आ थर ङा मुरपुकीमी गाजा, अश्‍कलोन, एक्रोन सहर नु मेको आ नेक्‍था बाक्‍शो रू नेल्‍ल आंम के सेल्‍मे बाक्‍त। 19 मिनु परमप्रभु यावेमी यहूदा आ थर ङा मुर आन कली वारच पतीके मेकेर ङा पहाडी रागी नेल्‍ल आंम के सेल्‍मे बाक्‍त। तन्‍न मेकोपुकीमी दिंम ङा मुर आन कली खेरने मचाप्‍‍बमे बाक्‍त। मारदे हना मेकोपुकी नु फलाम के बग्‍गी बाक्‍मा बाक्‍त। 20 मिनु मोसामी देंशो खोदेंशो पा कालेब कली हेब्रोन सहर गेमे बाक्‍त। मिनु मेकोमी अनाक आ तौ सां आन कली मेकेर रे खेरा बाक्‍त। यहोसु १४:६-१५ 21 तन्‍न बेन्‍यामीन आ थर ङा मुरपुकीमी यरूसलेम ङा यबुसी आन कली मखेरमे बाक्‍त। मोपतीके यबुसीपुकी मुलाक्‍त सम्‍म यरूसलेममी बेन्‍यामीन आ थर ङा मुरपुकी नु बाक्‍नीम। न्‍यायाधीस १:८; यहोसु १५:६३; यहोसु १८:२८

22 योसेफ आ थर ङा मुरपुकीमी बेथेल नु लडाइ पचा कली लमा बाक्‍त। परमप्रभु यावे योसेफ आ थर ङा मुरपुकी नु बाक्‍माक्‍‍त। 23 मेकोपुकीमी बेथेलमी क्‍यारी पाइब मुर सोइक्‍तमे बाक्‍त। ङोंइती बेथेल आ नें लूज बाक्‍माक्‍त। उत्‍पत्ती २८:१९; यहोसु १२:१६ 24 मेको क्‍यारी पाइबपुकीमी मुर का कली बेथेल सहर रे ग्रूशो तशा, मेको कली “सहर दोपा ओव़चा? आंइ कली शेंदीन। गो इन कली मारेइ यो मरिम्‍शो मपाइनीकी” देंमा बाक्‍त। 25 मिनु मेको मुरुमी सहर दोपा ओव़चा, मेको नेल्‍ल कोंइदा बाक्‍त। मिनु योसेफ आ थर ङा मुरपुकीमी मेको सहर ओव़शा, मेकेर ङा मुर नेल्‍ल आन कली तरवारमी क्‍योरशा सदमे बाक्‍त। तन्‍न मेको लां शोव़ब नु आ खिं ङा मुर आन कली मारेइ यो मपामे बाक्‍त। यहोसु ६:२५ 26 मिनु मेको लां कोंइब मुर हित्ती आन रागी लमाक्‍त। मिनु मेकेर सहर का सेल्‍शा, मेको सहर आ नें लूज वोदा बाक्‍त। मेको सहर कली मुलाक्‍त सम्‍म लूज देंनीम।

27 मनस्‍से आ थर ङा मुरपुकीमी बेथ-शेआन, तानाक, डोर, इब्‍लाम नु मेगीददो ङा मुर आन कली नु मेकेर ङा गाउं ङा मुर आन कली मखेरमे बाक्‍त। मारदे हना कनानीपुकीमी मेकेर बाक्‍चा थुं पामे बाक्‍त। यहोसु १७:११-१३ 28 नोले इस्राएलीपुकी बोल्‍यो दुम्‍शा, मेको आन कली वाइलीम वाइल सेल्‍ना सेल्‍न बाक्‍मा बाक्‍त। तन्‍न मेको आन कली गेनायो मखेरमे बाक्‍त।

29 एफ्राइम आ थर ङा मुरपुकीमी यो गेजेर सहरमी बाक्‍ब कनानी आन कली मखेरमे बाक्‍त। मेकोपुकी गेना हना यो गेजेरमी बाक्‍मा बाक्‍त। यहोसु १६:१० 30 जबूलून आ थर ङा मुरपुकीमी कित्रोन नु नहलोल सहरमी बाक्‍ब कनानी आन कली मखेरमे बाक्‍त। मिनु कनानी जबूलून ङा मुर आन दातेमी बाक्‍शा, आन वाइलीम वाइल दुम्‍मा बाक्‍त। यहोसु १९:१५ 31 आशेर आ थर ङा मुरपुकीमी अक्‍को, सीदोन, अहलाब, अकजीब, हेल्‍बा, अफीक नु रेहोब सहरमी बाक्‍ब आन कली मखेरमे बाक्‍त। 32 मोपा आशेर आ थर ङा मुरपुकी कनानी नु बाक्‍मा बाक्‍त। मारदे हना सुइ कली मखेरमे बाक्‍त। 33 नाप्‍ताली आ थर ङा मुरपुकीमी बेथ-शेमेश नु बेथ-अनात सहरमी बाक्‍ब आन कली मखेरमे बाक्‍त। मिनु मेकेर ङा कनानी नु बाक्‍मा बाक्‍त। तन्‍न बेथ-शेमेश नु बेथ-अनातमी बाक्‍ब आन कली वाइलीम वाइल सेल्‍मे बाक्‍त। यहोसु १९:३८

34 मिनु एमोरीपुकीमी दान आ थर ङा मुर आन कली पहाडी रागी मेर सोइक्‍तमे बाक्‍त। दिंममी यिचा मगेमे बाक्‍त। 35 एमोरीपुकीमी हार-हेरेस, आइयालोन नु शा-आल्‍बीम सहरम बाक्‍चा थुं पामे बाक्‍त। तन्‍न योसेफ आ थर ङा मुरपुकीमी मेको आन कली लडाइ पा ग्राशा, वाइलीम वाइल सेल्‍मे बाक्‍त। यहोसु १९:४२ 36 एमोरी आन सांद दक्‍खिन अक्रब्‍बीम आइक्‍था, सेला सहर रे लाइश्‍शा, मेको क्‍येङा आइक्‍था सम्‍म लशो बाक्‍माक्‍त।