1 सिदकीयाह पिप दुम्‍मेनु, २१ बर्स दुम्‍शो बाक्‍त। मिनु मेकोम यरूसलेममी ११ बर्स सासन पाप्‍तु। मेको आ ममा आ नें हामुतल बाक्‍त। मेको लिब्‍ना ङा येरमीया आ तमी बाक्‍त। 2 मिनु मेकोम येहो-याकीममी खोदेंशो पा परमप्रभु यावे आ ङोंइती मार मरिम्‍शो बाक्‍मे, मेको पाप्‍तु। 3 मिनु यरूसलेम नु यहूदा ङा मुरपुकीमी परमप्रभु यावे कली शुश गाइक्‍पाइक्‍तेक्‍म। मोपतीके मेकोमी मेको आन कली आ ङोंइती रे तिल्‍तु। मिनु बेबीलोन ङा पिप सिदकीयाहम कली मटीव। 4 सिदकीयाहम सासन पवा आ ९ बर्स, १० महिना, १० नाक्‍त बेबीलोन ङा पिप नेबुकदरेसरमी आ लडाइ पाइब नेल्‍ल कुरशा, यरूसलेम नु लडाइ पथ जाक्‍त। मिनु मेकोपुकीमी सहर आ लाङगा रे पुम्‍ताक्‍म। सहर ङा गारो ङोइक्‍चा कली एर ओंथ ङोइक्‍तीक सेल्‍तेक्‍म। 5 मोपा पिप सिदकीयाहम सासन पवा आ ११ बर्सम सहर आ एर ओंथ नेल्‍ल रे पुम्‍ताक्‍म। 6 मिनु ४ महिना ङा ९ नाक्‍ती सहरम थम ठेयब अन्‍काल दुम्‍त। मिनु मेको सहर आ आगामी जचा कली मारेइ मबा। 7 मिनु सहर ङा गारो प्रेत्‍तेक्‍म। मिनु लडाइ पाइब नेल्‍ल प्रोक्‍तेक्‍म। कल्‍दी ङा मुरपुकी सहर आ एर ओंथ बाक्‍तेक्‍म। मो हना यो मेकोपुकी पिप आ फल फुल रू ङा गारो निक्‍शी आस दाते ङा लाप्‍चो रे पा ग्रूशा प्रोक्‍तेक्‍म। मिनु मेकोपुकी अराबाह रागी गे लाम्‍तेक्‍म। 8 तन्‍न कल्‍दी ङा लडाइ पाइबपुकीम पिप सिदकीयाह कली खेदा पाम्‍तेक्‍म। मिनु मेको कली यरीको ङा दिंमम थित्‍तेक्‍म। मेको आ लडाइ पाइब नेल्‍ल ब्रशा एर ओंथ दुम्‍तेक्‍म। 9 मिनु मेको ग्‍याइक्‍चा पुंइसाक्‍व। मिनु मेकोपुकीमी पिप कली हमाथ रागी ङा रिब्‍लामी बेबीलोन ङा पिप आ ङोंइती चाक्‍तेक्‍म। मिनु मेकेर बेबीलोन ङा पिपमी मेको कली आ सजाइ नेंपाइक्‍तु। 10 मेको रिब्‍लामी बेबीलोन ङा पिपमी सिदकीयाह आ तौ आन कली मेको आ ङोंइतीन साइक्‍तीमी। मिनु यहूदा ङा ठेयब मुर नेल्‍ल आन कली यो रिब्‍लाम साइक्‍तीमी। 11 मिनु मेकोमी पिप सिदकीयाह आ मिक्‍च फेत्‍ताक्‍व। मिनु मेको कली कांसा के साङलोमी पाइक्‍ताक्‍म। मिनु मेको कली बेबीलोनमी लाइश्‍शा मबेक्‍म सम्‍म चोक्‍शा वोइक्‍तु। येरमीया ३२:५

12 बेबीलोन ङा पिप नेबुकदरेसरमी सासन पवा आ १९ बर्स ५ महिना १० नाक्‍ती पिप कली खाल पाइब आन कप्‍तान नेबुजरादान यरूसलेममी जाक्‍त। 13 मिनु मेकोमी परमप्रभु यावे आ खिं, पिप आ दरवार नु यरूसलेम ङा खिं नेल्‍लेम मी सुइक्‍ताक्‍व। मेकोमी ठेयब खिं नेल्‍लेम मी सुइक्‍ताक्‍व। 14 मिनु पिप कली खाल पाइब आन कप्‍तान नु बाक्‍शो कल्‍दी ङा लडाइ पाइब नेल्‍लेम यरूसलेम आ एर ओंथ बाक्‍शो गारो नेल्‍ल प्रेत्‍तेक्‍म। 15 मिनु पिप कली खाल पाइब आन कप्‍तान नेबुजरादानमी नेल्‍ल आन क्‍येङा प्रुङग, सहरम प्रोंइशा वोइश्‍शो मुरपुकी बेबीलोन ङा पिप आ बाक्‍तीके प्रोक्‍शा जाक्‍दीश्‍शो मुरपुकी नु लीशो मार, मार, सेल्‍स जोक्‍ब मुर आन कली ग्‍याइश्‍शा लाइक्‍तीमी। 16 तन्‍न पिप कली खाल पाइब आन कप्‍तान नेबुजरादानमी रागी ङा अङगुर रू नु अरु रूम गेय पचा कली, थम प्रुङग आन कली ला प्रोंइशा वोइक्‍तीमी।

17 कल्‍दीपुकीम परमप्रभु यावे आ खिंम बाक्‍शो कांसा के थामपुकी, कांसा के ठेयब चिक्‍तीके बोस, मेको आ कांसा के नित्‍तीके लाइक्‍तेक्‍म। कल्‍दीपुकीमी मेको नेल्‍ल प्रोल्‍शा, बेबीलोन लाइक्‍तेक्‍म। येरमीया २७:१९-२२; १राजा ७:१५-३९; २राजा २५:१३-१७ 18 मेकोपुकीमी बोसपुकी, बेल्‍चापुकी, सल्‍दो ख्रोइक्‍तीक कांइची, अरु बोसपुकी, डाडु नु कांसा के बोस नेल्‍ल नु चढ़ेचा कली माल्‍शो मारेइ मारेइ लाइक्‍तेक्‍म। 19 पिप कली खाल पाइब आन कप्‍तानम सुन नु चांदीम सेल्‍शो आइक्‍च लोटापुकी, कोइला कुर पतीक, बोसपुकी, बत्ती दा‍तीकपुकी, डाडु, तूचा थोव़क चढ़ेशोनु माल्‍तीक बोसपुकी नेल्‍ल लाइक्‍तु। १राजा ७:१५-३७ 20 पिप सोलोमनम परमप्रभु यावे आ खिं कली सेल्‍पाइश्‍शो ठेयब थाम निक्‍शी, कांसा के ठेयब चिक्‍तीके बोस मेको आगाम बाक्‍शो १२ ओटा कांसा के ब्‍यफ नु मेको आगाम बाक्‍शो नित्‍तीके बाक्‍तेक्‍म। मेको आन कांसा नाक्‍ने मचाप्‍चा ङा शुश बाक्‍त। 21 मेको थाम निम्‍फा १८, १८ कुबीत लाइश्‍शो, १२, १२ कुबीत ब्रेम्‍शो नु आस थांइशो ४, ४ अङगुल बाक्‍ताक्‍स। मिनु आस आगा चहिं श्‍येत्‍थ बाक्‍ताक्‍स। कुबीत का ०.५ मिटर खोदेंशो बाक्‍ब। 22 मेको आ तार कांसा के पिया पाइश्‍शो बाक्‍त। मेको आ पिया ५ कुबीत लाइश्‍शो बाक्‍त। मेको आ पिया कांसा के जाली नु दारीम आ बुटामी एर ओंथ नेल्‍ल हिरशो बाक्‍त। मिनु अर्को थाम यो ङोंइती ङा खोदेंशो पा सेल्‍शो बाक्‍त। 23 मेको आस एर ओंथ नेल्‍ल ९६ ओटा दारीम बाक्‍तेक्‍म। मेको आस एर ओंथ नेल्‍ल ङा जाली कली हिरशो दारीम सहे का बाक्‍तेक्‍म।

24 मिनु पिप कली खाल पाइब आन कप्‍तानमी ठेयब चढ़ेब सेरायाह, मेको आ नोले ङा चढ़ेब सेफन्‍याह नु लाप्‍चो खाल पाइब सां आन कली ग्‍याइश्‍शा लाइक्‍तीमी। 25 मिनु मेकोमी सहरम मेना सम्‍म लीशो लडाइ पाइब आन कली कोव़ब कप्‍तान का नु पिप कली अर्ती गेब ७ जना मुर आन कली ग्‍याइश्‍शा लाइक्‍तीमी। मेको रागीम लडाइ पाइब आन कली पुक्‍ब आन कप्‍तान आ ब्रेक्‍ब मुर नु सहरमी थिश्‍शो अरु ६० जना वोंइश मुर आन कली यो ग्‍याइश्‍शा लाइक्‍तीमी। 26 मिनु मेको पिप कली खाल पाइब कप्‍तान नेबुजरादानमी मेको आन कली लाइश्‍शा रिब्‍लामी बेबीलोन ङा पिप आ बाक्‍तीकेम चाक्‍तीमी। 27 मिनु बेबीलोन ङा पिपम मेको आन कली हमाथ रागी रिब्‍ला सहरम साइक्‍तु। मोपा मेकोपुकी यहूदा आ रागी रे ग्‍याइश्‍शा लाइक्‍चा पुंइसाक्‍म।

28 मिनु नेबुकदरेसरमी सासन पवा आ ७ बर्सम ग्‍याइश्‍शा लाइश्‍शो मुरपुकी हिक्‍शोनु, हजार सां २३ जना यहूदी बाक्‍तेक्‍म। 29 मेकोमी सासन पवा आ १८ बर्सम यरूसलेम रे ८ सहे ३२ जना आन कली ग्‍याइश्‍शा लाइक्‍तु। 30 मेकोम सासन पशो २३ बर्स दुम्‍मेनु, पिप कली खाल पाइब आन कप्‍तान नेबुजरादानमी ७ सहे ४५ जना यहूदी आन कली ग्‍याइश्‍शा लाइक्‍तीमी। मिनु मेको मुर नेल्‍ल पा ४ हजार ६ सहे जना बाक्‍तेक्‍म।

31 यहूदा ङा पिप येहो-याकीन कली ग्‍याइश्‍शा लाइश्‍शो ३७ बर्समी एवील-मेरोदक बेबीलोन ङा पिप दुम्‍त। मेको आ सासन पशो १२ महिना २५ नाक्‍ती दुम्‍मेनु, मेकोमी यहूदा ङा पिप येहो-याकीन कली चोक्‍तीक रे प्रोंइपाइक्‍तु। 32 मेकोमी मेको नु रिम्‍शो पा लोव़ पा बेबीलोनम आं नु बाक्‍शो पिप नेल्‍ल आन क्‍येङा ठेयब सेल्‍शा, मेको कली मान गेशा वोइक्‍तु। 33 मोपा येहो-याकीनमी आ जेल्‍खानम फेक्‍तीक वा प्रुइश्‍शा, आ लीशो नाक्‍ती नेल्‍ल पिप नु जशा बाक्‍शा पाप्‍‍तु। 34 बेबीलोन ङा पिपमी येहो-याकीन कली नाक्‍त किंत किंत मेको मबेक्‍म सम्‍म आ माल्‍शो मारेइ मारेइ गेप्‍तु।