1 मिनु “परमप्रभु यावे, गो आंइ कली मार दुम्‍शो बाक्‍बा, मेको मिम्‍तीन। आंइ कली मरिम्‍शो पशो कोव़ङीन। 2 आंइ थेरशो रू अर्को रागी ङा मुर आन के दुम्‍त। आंइ खिं यो अर्को रागी ङा मुर आन के दुम्‍तेक्‍म। 3 गोपुकी रोम रोइक्‍च दुम्‍तक। आंइ ममा वोंइश बेक्‍शो मीश मुर खोदेंशो दुम्‍तेक्‍म। 4 गोपुकीमी तूचा ब्‍वाक्‍कु यो ग्‍याप्‍चा माल्‍नीकी। शी यो ग्‍याप्‍चा माल्‍नीकी। 5 गोपुकी जुवा लाप्‍शो खोदेंशो पा आंइ कली खेदा पाइनीम। गोपुकी दशो बाक्‍नीकी। तन्‍न नाइक्‍चा मताइ‍नीकी। प्रस्‍थान २०:५; येरमीया ३१:२९ 6 गो इजीप्‍त नु अस्‍सुर रागी नु जचा थोव़क तचा कली सल्‍ला पाइतक। 7 आंइ किकी पिपीमी पाप पाम्‍तेक्‍म। मिनु बेक्‍तेक्‍म। गोपुकी मेको आन हेंथे पशो राइतक। 8 वाइलपुकीमी आंइ कली हुकुम पाइनीम। आंइ कली मेको आन गुइ रे पा प्रोंइब सुइ मबाक्‍नीम। 9 गोपुकीमी आंइ जचा थोव़क बेक्‍चा ङा गोरशो रागीम लशा, चाक्‍चा माल्‍नीकी। 10 गो शोव़लु बेक्‍‍तीके आंइ कुशुल चुप्‍लु खोदेंशो पा होश दुम्‍त। 11 सियोनम मीश मुर आन कली बिथोलो पाइनीम। यहूदा सहरम कन्‍ने मीश आल आन कली बिथोलो पाइनीम। 12 मेकोपुकीमी सासन पाइब आन कली क्‍युक्‍शा साइक्‍तेक्‍म। खाल्‍पा आन कली मान मपामे। २राजा २५:१९-२१ 13 ठिटापुकीमी श्‍येत पा यात हिल्‍चा माल्‍नीम। वोंइश आलपुकीमी शी कुरशा गोल्‍चा चिक्‍शा गाक्‍नीम। 14 खाल्‍पापुकी सहर ङा ठेयब लाप्‍चोमी ग्रुम्‍शा बाक्‍चा प्रोंइतेक्‍म। मिनु ठिटापुकीमी बाजा ताप्‍चा प्रोंइतेक्‍म। 15 आंइ थुं रे पा ग्‍येरशा बाक्‍तीक जाम्‍त। गो आंइ सिल पतीक नेल्‍ल रोंका पतीके दुम्‍त। 16 सिरपेच आंइ पिया रे दोक्‍त। आबी, गो पाप पाइतक। येरमीया १३:१८ 17 मोपतीके आंइ थुं खाइक्‍त। मिनु आंइ मिक्‍च ब्रा ब्रा दुम्‍त। 18 सियोन डांडाम श्‍येत दुम्‍त। मेको सिवार आन बाक्‍तीके दुम्‍त। 19 तन्‍न गे, परमप्रभु यावे गेना हना यो सासन पाइनीनी। इन सासन पतीके नेल्‍ल पाला सम्‍म लीब। 20 गे मारदे आंइ कली प्रेंदी‍नी? गे मारदे आंइ कली इश ङा नाक्‍त सम्‍म प्रोंइनी? 21 परमप्रभु यावे, आंइ कली इन गे लेप्‍पाइक्‍की। मिनु गो थमा पा इन गे लेत्‍नीकी। आंइ नाक्‍त ङोंइती ङा खोदेंशो सेलीन। भजन संग्रह १२६: 22 गे आंइ कली थमा पा मप्रोंइशो बाक्‍तीनी हना नु आंइ तशा शुश मगाइश्‍शो बाक्‍तीनी हना, मोदेंशो दुम्‍ल” दे पुंइतक।