4
जोरी सत्रुमी गेय तेक्चा माल्शो
1 “गो गारो प्रोव़ना प्रोव़न बाक्नीकी” देंशो लोव़ सान्बल्लतमी नेंशा, उरशा, शुश गाइश्शा, यहूदी आन पर्बम शुक्शी पाप्तु। नेहेम्याह २:१०,१९ 2 मिनु मेकोमी यहूदी आन पर्बम शुक्शी पा, आ लोक्बपुकी नु सामरीया ङा लडाइ पाइब आन ङोंइती “एको मारेइ सोक्त मपाइश्शो यहूदीपुकीमी मार पना पन बाक्नीमी? मार, मेकोपुकीमी आन गारो लेंशा प्रोव़ने चाप्नीमी? मार, मेकोपुकीमी चढ़ेनीमी? मार, मेकोपुकीम काबुमी थुम्नीमी? मेको मीम दुप्शो फुल्लुम गारो प्रोव़ने चाप्नीमी ङा?” दे लोव़ पाप्तु। 3 मिनु अम्मोनी ङा तोबीयाह सान्बल्लत आ नेक्था बाक्शा “मेकोपुकीमी मेको प्रोव़तेक्म हना यो, सिवार का मेको तारी ङोंइसाक्व हना, नेल्ल ब्रेप्ब” देंत। 4 मिनु गो चहिं “आंइ परमप्रभु, इन नोफा दाइश्शा, नेनीन। गो शुश शुक्शी पाइक्चा पुंइसाक्क। मेको आन पशो शुक्शी लेश्शा, मेको आन तार कोप्तीन। मेको आन कली ग्याइश्शा, अरु आन रागी लाइक्पतीन। 5 मेको आन मरिम्शो पतीके नेल्ल क्याम्शा मगेने। मारदे हना मेकोपुकीमी गारो प्रोव़ब आन कली शुक्शी पा, आन थुं तोक्शा गेम्तेक्म” दे परमप्रभु कली पुंइता। 6 मिनु गोपुकीमी आधा लाइश्शो सम्म गारो प्रोव़शा, एर ओंथ नेल्ल हिरने थुम्शो। मारदे हना प्रोव़ब मुरपुकीमी आन थुं नुशा, ग्येरशा, गारो प्रोव़तेक्म।
जोरी सत्रु आन कली तेक्शो
7 मिनु सान्बल्लत, तोबीयाह, अराबीपुकी, अम्मोनीपुकी नु अश्दोदीपुकीमी “यरूसलेम ङा गारो रिम्शो पा सेल्ना सेल्न बाक्नीम। आ पोव़ला यो सुना सुन बाक्नीम” दे तुइश्शा, शुश गाइक्ताक्म। 8 मिनु मेकोपुकी गारशा, यरूसलेम कली लडाइ पा, खतम सेल्चा, दे खुम्साक्म। 9 गोपुकी चहिं आंइ परमप्रभु कली पुंइना पुंइन बाक्तक। मिनु गोपुकीमी “मारेइ पाइनीमी, कों” दे मेको आन कली कोव़शा, नाक्दो नाक्त खाल पाइबपुकी वोइक्तक।
10 मिनु यहूदा ङा मुरपुकीमी “फुल्लु कुरब आन बोल जाम्ना जाम्न लत। मारदे हना शोर गाक्शो शी, फुल्लु नु खप शुश दुम्तीके, गोपुकी गारो प्रोव़ने मचाप्नीकी” दे गन गन पाम्तेक्म। 11 मिनु आंइ जोरी सत्रुपुकीमी “मेको आन मतुइक्थु, मतथु, मेको आन दातेमी जाक्दीश्शा, मेको आन कली साइश्शा, आन गेय थुम्पाइय्य” देंमुमा बाक्त। 12 तन्न मेको आन नेक्था बाक्ब गाउं गाउं ङा यहूदीपुकी आंइ बाक्तीक जाक्शा “आंइ जोरी सत्रु गोपुकी नु लडाइ पचा कली बुक्शा बाक्नीम” दे शुश खेयप देंतेक्म। 13 मोपतीके गो गारो आ नेल्ल क्येङा आइक्च दुम्तीके, आंइ जोरी सत्रु आन शुश श्येत मजथु, ओव़ने चाप्तीकेम, मुर आन कली खुप्ताक्ङमी। मेको आन कली तरवार, तूतीक नु लिब्रा कुरपाइश्शा मेकेर वोइक्तामी। 14 मिनु गो मेको आन कली हिंशो तशा “महिनीन। नेल्ल क्येङा ठेयब नु मान पा हिंचा माल्शो परमप्रभु कली मिम्तीन। मिनु आंम लोक्ब, तमी तौ, मीश नु आंम खिं आ पर्बम लडाइ पने” दे ठेयब मुरपुकी, सासन पाइबपुकी नु मुर नेल्ल आन कली माइक्तामी। नेहेम्याह १:५
15 आन मिम्शो गोपुकीमी तुइक्ताक्क नु परमप्रभुमी आन मिम्शो नेल्ल क्याम्शा गेवा बाक्त, दे आंइ जोरी सत्रुपुकीमी तुइक्तमे बाक्त। मोपतीके गो नेल्ल आंम आंम गेय पा गारो प्रोव़थ लेत्तक। 16 मेको नाक्त ङा मेरे गो आंइ उइक्थ मुरपुकीमी गारो प्रोव़शा बाक्शो। मिनु लीशो उइक्थ मुरपुकीमी तूतीक, तेक्तीक नु लिब्रा कुरशा, फलाम के फेक्तीक फेक्शा बाक्तेक्म। मिनु ठेयब मुरपुकीमी गारो प्रोव़ब यहूदा ङा मुर नु गारशा, आन थुं बारपाइक्तेक्म। 17 कुरब मुरपुकीमी आन गुइ कामी कुरतीक नु अर्को गुइमी या कुरतेक्म। 18 गारो प्रोव़ब मुरपुकीमी आन किप्शुरमी चुक्ब पिप्शा प्रोव़तेक्म। तुराही ताप्ब आं नेक्था बाक्शो बाक्त। 19 मिनु गोमी ठेयब मुर, हुकुम पाइब नु मुर नेल्ल आन कली “गेय थम ठेयब नु शुश ब्रशा बाक्शो बाक्ब। गोपुकी गारो आ नेक्था, तन्न ङोन ङोन बाक्नीकी। 20 तेकेर रे तुराही ग्रीशो नेंनीनी, मेकेर रीब पा बुक्कीन। आंइ परमप्रभुमी आंइ पर्बम लडाइ पाइब” दे माइक्तामी। प्रस्थान १४:१४ 21 मोपा गो उइक्थ मुरपुकीमी गेय पस ङा पस बाक्तक। मिनु उइक्थ मुरपुकी सुनी रे नाक्दो सम्म या शेशा बाक्तेक्म। 22 मेना गो मुर आन कली “नाक्दो खाल पाइब, नाक्त गेय पाइब नु मेको आन कली वारच पाइब नेल्ल यरूसलेममीन नां सोंइचा माल्नीम” दे यो माइक्तामी। 23 मोदेंशो पा गो, आं लोक्बपुकी, आं गेय पाइबपुकी नु आं नेक्था बाक्ब खाल पाइबपुकी वा मप्रुइक्थु, आंइ या शेशान इप्तक।