1 मिनु नोले मार दुम्‍त देंशा हना, मुरपुकी नु आन मीशपुकीमी आंम आन यहूदी लोक्‍ब आन पर्बम लोव़ का ब्रपाइक्‍तेक्‍म। 2 का निक्‍शीमी “गो, आंइ तमी तौ शुश बाक्‍नीमी। गो शुश बाक्‍तीके ब्रोंइचा कली अन्‍न माल्‍नीकी” देंतेक्‍म। 3 मिनु का निक्‍शीमी “अन्‍कालमी अन्‍न ग्‍याप्‍चा कली आंइ रूपुकी, आंइ अङगुर रूपुकी नु आंइ खिंपुकी जाकट वोइक्‍चा माल्‍ताक्‍क” देंतेक्‍म। 4 मिनु का निक्‍शीमी “पिप कली तिरो थाप्‍चा कली आंइ रू नु अङगुर रूपुकी गेशा, जेर ताक्‍तक। 5 गो यो आंइ लोक्‍ब खोदेंशो बाक्‍नीकी। आंइ तमी तौ मेको आन तमी तौ खोदेंशो बाक्‍नीम। मिनु गो आंइ तमी तौ आन कली वाइलीम वाइल दुम्‍चा कली लेयचा माल्‍नीकी। आंइ तमी का निक्‍शी ङोंइतीन लेयचा पुंइसाक्‍म। गोपुकीमी मेको आन कली प्रोंइने मचाप्‍नीकी। मारदे हना आंइ रू नु अङगुर रू नेल्‍ल मुर आन के दुम्‍ने थुम्‍तु” देंतेक्‍म। लेवी २५:३९; २राजा ४:१; यसैया ५०:१; मत्ती १८:२५

6 मोपा मेको आन लोव़ नेंशा, आन ङाक्‍शो तशा, शुश गाइक्‍ताक्‍यी। 7 तन्‍न गो आं थुंमी लोव़ पाता। मिनु गो मान ताइब नु ठेयब मुर आन कली हुइश्‍शा “क्‍येट आ चाइक्‍ब ताक्‍चा, दे आंम लोक्‍ब आन कली जेर गेनीनी” दे माइक्‍ताक्‍मी। मिनु मेको आन पर्बम मुर नेल्‍ल खुप्‍ताक्‍ङमी। प्रस्‍थान २२:२४ 8 मिनु गो मेको आन कली “गोपुकीमी अर्को रागीम लेयशो वाइलीम वाइल दुम्‍शो आंइ लोक्‍ब यहूदी आन कली आंइ चाप्‍शो थाप्‍शा, मुर आन गुइ रे प्रोंइतक। गेपुकी चहिं आंम इन लोक्‍ब रागी रागी ङा मुर आन कली लेयनीनी? मिनु मेकोपुकीम गो आंमान लेंशा ग्‍याप्‍चा माल्‍नीकी?” दे शुश हुइक्‍ताक्‍ङ। मिनु मेकोपुकी सिक्‍सी पा मारेइ मदेंम। लेवी २५:४७-४९ 9 मिनु लेंशा “इन पशो मरिम्‍शो बाक्‍ब। आंइ जोरी सत्रुपुकीमी आंइ कली शुक्‍शी मपपाइक्‍थु, आंइ परमप्रभु कली मान पा हिंशा, गेय पचा ममाल्‍नीनी ङा? 10 गो आंमान, आं लोक्‍बपुकी नु आं गेय पाइबपुकीमी यो मेको आन कली क्‍येट नु अन्‍न जेर गेतक। मुल गो चाइक्‍ब पुंइचा प्रोंइय। ब्‍यवस्‍था १५:१-११ 11 गे मुलाक्‍तीन मेको आन रू, अङगुर रू, आन तेल रवा रू नु आन खिं लेश्‍शा गेने। मिनु क्‍येट, अन्‍न, नक अङगुर रस नु तेल, मार मार जेर पुन्‍मे, मेको नेल्‍ल मो गेने” दे माइक्‍तामी। 12 मिनु मेकोपुकीमी “गो नेल्‍ल लेश्‍शा गेनीकी। मेकोपुकी रे मारेइ मताक्‍नीकी। इन देंशो खोदेंशो पा नेल्‍ल पाइनीकी” देंतेक्‍म। मिनु गो चढ़ेब आन कली ब्रेश्‍शा “आंइ देंशो खोदेंशो पा पाइनीकी” दे कसम जपाइक्‍तामी। 13 मिनु नोले गो आं फेक्‍शो वा रे थुर थुर पा फुरक हेम्‍शा “आन देंशो मखाप्‍ब कली परमप्रभुमी आन खिं नु आन थेरशो रू रे ओं पान थुर थुर पा हेमल। मोपा थुर थुर पा श्‍येत्‍थ दुम्‍मल” देंती। मिनु मेकेर बुक्‍शा बाक्‍ब नेल्‍लेमी “आमेन” देंतेक्‍म। मिनु मेकोपुकीमी परमप्रभु यावे कली ठेयब सेल्‍शा, आन देंशो खोदेंशो पाम्‍तेक्‍म। आमेन देंबमी “गो यो मोदेंशो मिम्‍नुङ” देंब।

14 मिनु आरता-सास्‍त पिप दुम्‍शो २० बर्स दुम्‍मेनु, गो यहूदा रागीमी हुकुम पचा कली योव़चा पुंइसाक्‍यी। मेना रे मुल १२ बर्स दुम्‍त। मेको आरता-सास्‍त पिप दुम्‍शो ३२ बर्स दुम्‍त। मेको १२ बर्स सम्‍म गो नु आं लोक्‍बपुकीमी हुकुम पाइब आन ततीक जचा थोव़क मजक। 15 आं क्‍येङा ङोंइती ङा आं खोदेंशो पा हुकुम पाइबपुकीमी मुर आन कली ठेयब श्‍येत गेशो बाक्‍तेक्‍म। मेकोपुकीमी नाक्‍त किंत किंत ङा जचा थोव़क, शोब्‍ले, अङगुर शांबु नु ४० चांदी के शेकेल यो लाइश्‍शो बाक्‍तेक्‍म। मिनु मेको आन गेय पाइबपुकीमी यो मुर आन कली साप्‍पा दिप्‍शो बाक्‍तेक्‍म। तन्‍न गो परमप्रभु कली मान पा हिंशा मोदेंशो मपङ। चांदी के शेकेल का ११.५ ग्राम ङा क्‍येट बाक्‍ब। 16 मिनु गो आंमा गारो प्रोव़तीक गेय यो पाता। गोपुकीमी रू का यो मग्‍याप्‍क। आं गेय पाइब नेल्‍ल गारो प्रोव़थ जाक्‍तेक्‍म। 17 मिनु गो नु सहे का ५० जना यहूदी आन ठेयब मुरपुकी काथा बाक्‍शा जाम्‍तेक्‍म। मिनु एर ओंथ रागी रे आंइ कली ग्रुम्‍थ जाक्‍बपुकी यो गो नु बाक्‍शा जाम्‍तेक्‍म। 18 नाक्‍त का कली मार जचा थोव़क ठीक सेल्‍शो बाक्‍त, देंशा हना, ब्‍यफ का, ६ ओटा रिम्‍शो दोम्‍शो भेडा नु ब्‍वापुकी ठीक सेल्‍शो बाक्‍तेक्‍म। मिनु १०, १० नाक्‍त कली मारेइ मारेइ अङगुर शांबु यो चाक्‍शो बाक्‍त। मोदेंशो शुश माल्‍ती हना यो, गो गेनायो हुकुम पाइब आ तचा माल्‍शो जचा थोव़क ममलु। मारदे हना मुरपुकी शुश श्‍येत जशो बाक्‍तेक्‍म। 19 गो परमप्रभु यावे कली “आं परमप्रभु, गो एको मुर आन कली मार मार रिम्‍शो पङा, मेको मप्रेंदीन” देंती। नेहेम्‍याह १३:१४,२२,३१