A Slolonel Dios D'a Vin̈aj
JEREMÍAS
Jeremías sb'i jun libro tic, yujto a slolonel Dios yalnac d'a vin̈aj Jeremías a' tz'ib'ab'ilcan d'ay. A vin̈aj Jeremías chi', ec'nac cajan vin̈ d'a yol smacb'en Judá ayic toxoval tz'ic'jib'at eb' aj Judá chi' d'a Babilonia. A jun tic ujinac d'a ab'il 600 ayic manto javi Jesucristo. Tzijtum el ix yal vin̈aj Jeremías chi' to ol javoc yaelal d'a yib'an̈ juntzan̈ nación yuj smul, yujto a eb' anima cajan d'ay, a d'a juntzan̈ comon dios tz'och eb' ejmelal. An̈eja' pitzanto vin̈aj Jeremías chi' ayic ix ac'ji ganar Jerusalén yuj eb' aj Babilonia, ix yilan vin̈ sb'at vin̈ rey yed' juntzan̈xo eb' cajan ta' icha presoal. Palta ix yalanpaxcan vin̈ to a eb' aj Judá chi' ol meltzajxoc eb' d'a sluum chi', ol sb'oanxi schon̈ab' eb' chi'.
A jun libro tic chan̈ macan̈ yaji. A b'ab'el macan̈, tz'el yich d'a capítulo 1 masanto d'a 25. Ata' syal juntzan̈ lolonel vin̈aj Jeremías chi' d'a eb' anima yed' d'a eb' yajal yaj d'a chon̈ab' chi' d'a stiempoal chan̈van̈ eb' slajvub' rey. A schab'il macan̈, tz'el yich d'a capítulo 26 masanto d'a 45. A d'a tic syalcot yuj tastac ix ec' d'a yib'an̈ vin̈aj Jeremías. Syalanpaxcot yuj juntzan̈ ab'ix to ayocto ix yalancan Dios d'a vin̈, aton yuj tas ol yutej Dios chi' yac'an snivanil sc'ol eb' anima. A yoxil macan̈, tz'el yich d'a capítulo 46 masanto d'a 51. A d'a tic ix yalcan juntzan̈ lolonel Dios d'a yib'an̈ juntzan̈ nación ay d'a slac'anil Israel. A schan̈il macan̈, aton capítulo 52. A d'a tic syal yuj tas ix aj yac'ji ganar Jerusalén yed' tas ix aj yic'jib'at eb' anima d'a Babilonia.
A vin̈aj Jeremías chi', te xajan val eb' yetchon̈ab' vin̈ yuuj, ix cus val vin̈ ayic ix yalan vin̈ to ol javoc yaelal d'a yib'an̈ eb', ol satjoquel schon̈ab' eb'. Man̈ jantac juntzan̈ versículo tz'alancoti to ix te cus vin̈ yujto schecab' Dios yaj vin̈, palta a slolonel Dios, lajan val icha junoc c'ac' sq'ue n̈iln̈onoc, max yal smac'ji tupoc, icha chi' yaj d'a vin̈.
A juntzan̈ versículo vach' d'a jun libro tic, a tz'alancot yuj tastac ol ujoc ayic toxo ix ec' juntzan̈ yaelal tic, ol sb'o junxo schab'il strato Dios yed' schon̈ab'. A jun trato chi', ol sc'anab'ajej eb' yujto ol tz'ib'chajcanoch d'a spixan eb'.
1
1 A in Jeremías in tic, yuninal in vin̈aj Hilcías, yin̈tilal in eb' sacerdote cajan d'a chon̈ab' Anatot d'a yol smacb'en lum Benjamín. Aton d'a jun tic tz'ib'ab'ilcan tas ix yal Jehová d'ayin yic svaleli. 2 Ix el yich slolon Jehová d'ayin ayic 13 ab'il yoch vin̈aj Josías yuninal vin̈aj Amón reyal d'a Judá. 3 Ix lolonn̈ej d'ayin ayic ayoch vin̈aj Joacim yuninal vin̈aj Josías chi' reyal d'a Judá. Ix lolonn̈ej pax d'ayin masanto ayic yoil ujal yoch yuxluchil ab'il yoch vin̈aj Sedequías reyal, yuninal pax vin̈aj Josías chi'. Ata' ix ic'jib'at eb' cajan d'a Jerusalén icha preso d'a Babilonia.
Ix avtaj vin̈aj Jeremías yuj Jehová
4 Ayic ix el yich slolon Jehová d'ayin, ix yalan icha tic:
5 Ach Jeremías, yictax manto ach vac' pitzvoc d'a a nun, sic'b'ilachxoel vuuj. Ayic manto ach alji, sic'b'ilachxoel vuuj yic tzach och in checab'oc d'a juntzan̈ chon̈ab', xchi d'ayin.
6 Ix in tac'vi icha tic:
Mamin Jehová, ach Vajalil, unin into. Maxto nachaj tas svutej in loloni, xin chi.
7 Ix yalanxi Jehová chi' d'ayin: Man̈ ala' to unin ach. An̈ej to ol ach b'at b'aj ol ach in checb'ati, ol alan tas ol in chec ala'.
8 Malaj mach b'aj tzach xivi. A in Jehová in svala' to ayinn̈ejoch ed'oc yic tzach in colani, xchi d'ayin.
9 Ix lajvi chi', ix yac'ancot sc'ab', ix yac'anoch d'a in ti', ix yalan d'ayin:
10 Aton val ticnaic svac'och in lolonel d'a a ti'. Tzach in checb'at d'a juntzan̈ chon̈ab' yic tzalan yab' eb' to ol javoc yaelal d'a yib'an̈ eb', ol satel eb', ol lajvoquem eb'. Ay chon̈ab' chi' ol satel d'a juneln̈ej, ay pax ol b'ochajxiq'ueoc, xchi Jehová.
A chab' tas ix ch'oxji yil vin̈aj Jeremías
11 Ix lolonxi Jehová d'ayin, ix yalani: ¿Tas tzil chi' ach Jeremías? xchi. A jun te' c'ab' almendro svila', xin chi.
12 Yel tzala'. Ol viln̈ej to a tas sval tic d'ayach ol elc'och d'a elan̈chamel, xchi Jehová chi'.1.12A d'a hebreo quenxon̈ej man̈ lajanoc sjajil chab' lolonel tic: “Almendro” yed' “Sviln̈ej”.
13 Ix yalanxi Jehová chi' d'ayin d'a schaelal: ¿Tas tzil chi'? xchi d'ayin. Svil jun lum chen van xeji, van stob'cot d'a stojolal norte, xin chi d'ay.
14 Ix yalanxi d'ayin: A d'a norte chi', ata' ol cot yaelal ol javoc d'a yib'an̈ masanil eb' anima cajan d'a tic.
15 A in Jehová in tic sval d'ayach to ol laj vavtejcot jantac soldado scot d'a juntzan̈ chon̈ab' ay d'a norte. Ol oymaj eb' d'a spatictac chon̈ab' Jerusalén tic yed' d'a spatictac juntzan̈xo chon̈ab' d'a smacb'en Judá. Ol javoc sreyal eb', ol sb'oanem sdespacho eb' d'a spuertail Jerusalén tic.
16 Aton jun yaelal tic ol vac'cot d'a yib'an̈ eb' anima ix och smul d'ayin. Ix in yactejcan eb', axo d'a juntzan̈ comon dios ix sb'o eb', ata' ix och eb' ejmelal. Ix sn̈usanpaxtz'a incienso eb' d'ay.
17 A ticnaic ac' ip, tec'b'ej a b'a, b'at alan masanil tas ol in chec ala'. Man̈ ach xiv d'a eb' etanimail chi'. Tato ol ach xivoc, ol ach vac' ib'xocq'ue d'a yichan̈ eb'.
18 A ticnaic tzach vac'och icha junoc chon̈ab' te tec'an, icha val junoc oy nab'a hierro, ma icha muro nab'a bronce. Yuj chi' ol yal a tec'b'an a b'a d'a yichan̈ chon̈ab' Judá, d'a yichan̈ eb' rey, eb' yajal, eb' sacerdote yed' d'a yichan̈ masanil anima.
19 Ol yac' oval eb' chi' ed'oc, palta a in val Jehová in svala' to man̈ ol ach telvoc yuj eb', yujto ayinn̈ejoch ed'oc ach in colani, xchi Jehová.