1 Orze' mile' Pilat mandad, ndin bixa' Jesús, 2 no mizuxkwa' rë sondad ze' tu koron yich, mbaino mizo'b xa'i yek Jesús, mbaino mixo'b bixa' tu kap kulor yind tich Jesús, nela nile' men kun tu rey ga', 3 orze' nguzubi bixa' lo Jesús par nzhab bixa':

―¡Rey che'n rë men Israel, par dubta' banal!

Mbaino mikë' bixa'i ro' Me. 4 Xtu wëlt nguro' Pilat al tich, lo rë men Israel xa' nzhin ze', par nzhab xa':

―Biwi' go, lë'da zo xa' lo go par ne goi, na ngurël, yent kwan nak miyi' re'.

5 Orze' nguro' Jesús lo rë men ze', nzob koron yich ze' yek Me, mbaino nzho'b kap yind ze' tich Me, orze' nzhab Pilat:

―¡Biwi'u! ¡Lë' miyi' re' re'!

6 No or une rë ngulëi' ro ze' Jesús, kun rë xa' nikina yado', nguzublo nguruzhië bixa':

―¡Bikë'u xa' lo krus! ¡Bikë'u xa' lo krus!

Orze' nzhab Pilat:

―Bi'y go xa', no go bikë' xa' lo krus; na ngurël, yent kwan nak xa' re'.

7 Per nzhab rë men Israel ze' lo Pilat:

―¡Lo ley che'n no nidi'zh, ñal gat xa', porke lë' xa' nidi'zh, Xga'n Dios xa'!

8 Or mbin Pilat kure', más mizheb xa'; 9 nguio xa' xtu wëlt le'n yalao par xtu wëlt mina'bdi'zh xa' lo Jesús, nzhab xa':

―¿Plo ka nzël?

Per nangakabt Jesús, 10 orze' nzhab Pilat:

―¿Chon gat nikabal lon? ¿Chi nanetal, na gak le mandad kël lo krus, mbaino gak len mandad, liya' bixa' lu?

11 Per nzhab Jesús:

―Nagakt le'l ni tu yalgustis kun na chi lë' Dios naziyël; xa' michi da lol, más nzë'b xki xa' ze' ke lu.

12 No dizde orze', mikwa'n Pilat mod par ngaliya' xa' Jesús, per lë' rë men Israel más naye nguruzhië bixa' lo Pilat:

―¡Chi lë'l liya' miyi' ba', nagaktal xa' kwa'n nichë'l César, porke rë men xa' gak rey, chi gat lë't César kubi xa', xa' ze' nak xa' nidil kun César!

13 No or mbin Pilat kure', nguro' xa' kun Jesús al tich no nguzob xa' plo nile' xa' yalgustis, plo lë kun widi'zh grieg, Enlosado, no lë' kun widi'zh hebreo lëi, Gabata (kun xtu widi'zh kure' gab, Plo Nax Ke Wen). 14 Lë' zhë ze' nak zhë kwa'n nizuxkwa' men kwa'n par lani Pask, no pas mer garol zhë orze', lë'chi ngwayab Pilat lo rë men Israel ze':

―¡Biwi' go, lë' rey che'n go re'!

15 Orze' naye nguruzhië bixa':

―¡Gulutin go xa' ba'! ¡Gulutin go xa' ba'! ¡Bikë' go xa' lo krus!

Per nzhab Pilat:

―¿Taxa kë'n rey che'n go lo krus?

Orze' nzhab rë kwa'n nak ngulëi' ro ze':

―¡Yentra' cho xtu rey kinu no, nab tsa César!

16 Mbaino michi Pilat Jesús lo bixa', par kë' bixa' Jesús lo krus, orze' ñanu bixa' Me.

17 No mile' bixa' mis Jesús mbi'y krus che'n Me yën Me, par nzhanu bixa' Jesús plo lë Kalaber (kun widi'zh hebreo lëi Gólgota), 18 ze' mikë' bixa' Jesús lo krus, no nu xchop men mikë' bixa' lo krus; tu ga' xa' kad lad che'n Me. 19 No yek krus che'n Jesús, mile' Pilat mandad nkë widi'zh kwa'n nzhab se': “Jesús xa' nzë yezh Nazaret, rey che'n rë men Israel.” 20 Nayax men Israel mbi'l widi'zh re', porke plo mikë' bixa' Jesús lo krus, gax ña'ne par yezh Jerusalén, no rë widi'zh ze' nzobni'y kun widi'zh hebreo, no kun widi'zh latín, mbaino kun widi'zh grieg. 21 No por kure' nzhab rë ngulëi' ro che'n rë men Israel lo Pilat:

―Nakë'tal sa': “Xa' re' nak rey che'n rë men Israel”, neka bizob: “Xa' re' nidi'zh, nak xa' rey lo rë men Israel.”

22 Per nzhab Pilat:

―Kwa'n mikë'n, sa' ya'ne.

23 No or milox mikë' rë sondad Jesús lo krus, orze' mia'n bixa' kun xab Jesús kwa'n al tich, mile' bixa'i tap lë' par tlë'gai' nka' bixa'; no nu xab Jesús kwa'n al le'n, lë túnica, nguzen bixa'i, no lë'i gat nadibt, tutsa lë' nakxao' lar ze', 24 orze' nzhab rë sondad ze' lo wech bixa':

―Nachëzt be lar re'; neka kit be par ne be, cho ya'n kun lë'i,

Sa' mile' bixa' par ngok rë widi'zh kwa'n nzobni' lo Yech che'n Dios plo nzobni':

Kure' mile' rë sondad,

25 per xan krus plo nikë Jesús, nzo xna' Me mbaino nzo bël xna' Me, no nzo Mari tsa' Cleofas, no nu Mari Madalén nzo ze'. 26 Kuze', or une Me xna' Me, nzo xna' Me gax laka kun tu rë men che'n Me xa' más nichë'l Me, orze' nzhab Me lo xna' Me:

―Una', lë' xga'nal ba'.

27 Mbaino lo xa' ze' nzhab Me:

―Lë' xna'l ba'.

No dizde orze' mbi'y xa' ze', xna' Me lizh xa'.

28 No or milox rë kure', lë' Jesús ya nane la, lë' rëi ngok la, no nes par lox gak rë widi'zh che'n Dios kwa'n nzobni' por lë' Me, kuze' nzhab Jesús:

―Nizëi' laxto'n.

29 No ze' nzo tu jar nits gub ni, orze' yek tu ram ya kwa'n lë hisopo, michël bixa' tlë' lar xi'l, orze' mikë bixa' kure' le'n jar re', no michi bixa'i ro' Jesús. 30 Or milox ngu' Jesús kure', orze' nzhab Me:

―Lë' rëi milox la ngok.

Orze' mirek Me lo yuo, miza' Me alm che'n Me lo Xuz Me Dios.

31 Lë' zhë ze' nak zhë kwa'n nizuxkwa' men kwa'n par lani Pask, per lë' rë xa' nak zhi'n lo rë men Israel, gat nzhaklat bixa' ya'n kwerp che'n Jesús, mbaino kwerp che'n xchop rë miyi' ze' lo krus, mer zhë kwa'n gal lani ze', porke zhë ze' nak zhë más tsak par rë men Israel. Kuze' mina'b bixa' lo Pilat, par ki'ch bixa' ni' rë xa' nikë lo krus ze', nes par gat ga' bixa', no la ga' bixa' lo krus mis zhë ze'. 32 Orze' ngwa rë sondad par ndi'ch bixa' ni' galo laka xa' kwa'n nkë lo krus ta' Jesús, no sa' ska mile' bixa' kun xtu xa' kwa'n nkë xtu lad ta' Jesús, 33 per or nguzubi bixa' plo nikë Jesús, une bixa', lë' Jesús ngut la. Kuze' nangayi'cht bixa' ni' Me, 34 per tu rë sondad ze' ndid tu lans ta' koxti che'n Jesús, orze' lwega' nguro' ren kun nits plo ndid xa' kure'. 35 No xa' midi'zh kure', lë' xa' une loi, no walika kwa'n une xa' no kwa'n nidi'zh xa', nes par nu go, yilai. 36 Se' ngok nes par ngok widi'zh re' kwa'n nzobni' lo Yech che'n Dios kwa'n nzhab se': “Ni tu wes che'n Me nangacht.” 37 No xtu plo se' nzobni': “Une men or nguzhid bixa' kun lans ta' Me.”

38 Or milox ngok kure', orze' ngwa Che xa' nak tu men yezh Arimatea lo Pilat par mina'b xa' lo Pilat, wei' xa' kwerp che'n Jesús, mbaino nguziyël Pilat. No Che re' nak tu men che'n Jesús, per yent cho lo nzhabt xa'i por nizheb xa' lo rë xa' nak zhi'n lo rë men Israel. 39 No nu Nicodemo xa' ngwadi'zhnu Jesús tu or yë'l, nzhanu xa' kwa'n nixla' nax mbaino noche kun mirra mbaino áloe; no naga'i nzhi'bra' gal bichi' kil. 40 Orze' Che kun Nicodemo mila bixa' kwerp che'n Jesús, no michël bixa' lare, mbaino ngulo bixa' kwa'n nixla' nax ze' kwerp che'n Me. Se' nile' rë men Israel or nika'ch bixa' men. 41 No plo mikë' bixa' Jesús lo krus, nzhi'b tu bëd ya, no ze' nakxao' tu ba' plo ni tu men nagat ga'ch. 42 Ze' mika'ch bixa' Jesús, porke ña'ne gax laka plo nkë Me lo krus, mbaino nu mizhin gax la lani che'n rë men Israel, kuze' nayen laka mika'ch bixa' Me.