1 Jisasame pii manapi dokaita pitaka lamaiyoo etapala, baanya disaipolo dupa lamaiyoo, 2 “Napinya Kaeyamo Pasopa gii doko ene ipanya pimupa, yuu gii lapoma silyamo doko, nyakamame masilyamino. Gii dokopa, Akalinya Ikiningi doko poko itanya pyao yukuina lao, yanda singi dupanya kingilyaka maitana” lea.

3 Gii dokopaka pitisa mupapi, Judamanya isingi akalipi, dupa pitisa mupa dupanya, aiyomba Kaeyapasa lenge dokonya, andaka pii lao kambuiyami. 4 Kambuingi dokonya pituu, nyakamame aipa petala Jisasa waa katao, anjoo nyepala pyao kumasemape lao, kaita kutiami. 5 Kutapala lao pituu, “Aopyoo latala endakali dupame pyao pitamina, gii epe dokonya dopa napimana” leami.

6 Jisasa baa taono Betani dokonya, akali kopetali Saimone lenge dokonya andaka, nee nao petea. 7 Peteamopa, enda mendeme penge yakane mendenya, wele tunduma pipae, muni andake pupenge tumbatae mende minao epea. Ipupala Jisasanya aiyombanya, wele doko kaii lakamaiya. 8-9 Kaii lakamaiyamo doko kandatala, “Wele dake endakalimi sambaminopa, muni andake nyepala, endakali daa jepae dupa maipumalina, aipuma wele dake baame mee pyoo nepelyape?” lao, disaipolo dupame imbu kaeyami. 10 Dopa leamino doko Jisasame sepala, dokaita lamaiyoo, “Baame namba-kisa kalai epe etete mende pilyamona, aipuma nyakamame enda dakenya mona kenda pisakamailyamipi? 11 Endakali daa jepae dupa koteaka lao nyakama-pipa apata katatamiaka doko, namba nyakama-pipa gii longo mende, kalya naeyalamano. 12 Enda dakeme wele tunduma pipae, kaii lakalamo dokome, nambanya yonge doko malu pipenge dokonya depa lasoo pyakalamo. 13 Nambame nyakama kiningi langilyo: Yuu dupa pitakanya, wai pii epe doko lao taeyatamino gii dokopa, enda dakeme pilyamo dupa apata masina lao, taeyatamina” lea.

14 Judasa Iskariota lenge doko, 12 disaipolo dutupanya mende, baa pitisa mupa dupa kateamisa pupala, 15 dokaita tipa pyoo, “Nambame Jisasa nyakama laitaka pitoo, nyakamame namba aki mende ditamipi?” lea. Dopa leamopa, dokaitame baa silipa muni 30 maiyami. 16 Gii dokopa pituu, Judasame pitisa dokaita Jisasa laitaka pyaanya, kaitini kutia.

17 Israele tange dupame betesa yisa napalenge nengema, yuu gii tee pyao dokonya, disaipolo dupame Jisasa kateasa ipupala baa lamaiyoo, “Napinya Kaeyamo Pasopa nee doko, naimame anja depa lamape?” leami. 18 Dopa leaminopa baame dokaita lamaiyoo, “Nyakamame Jerusalema pupala, akali mende kanjaminona, doko lamaiyoo, 'Mana Lenge Akali dokome, baanya gii doko tengesa petelyamona, Napinya Kaeyamo Pasopa nee doko, baanya disaipolo dupa-pipa, embanya andaka natoo lalamona' lao lamaiyepape” lea. 19 Dokopa disaipolo dupame Jisasame leamoli pyoo, nee akipi depa leami.

20 Yuu kuiyala peamopa, Jisasa baanya 12 disaipolo dutupa-pipa, nee nao peteami. 21 Nee nao pituu, baame dokaita lamaiyoo, “Nambame nyakama kiningi langilyo: Nyakamanya mendeme, namba enge nyipumu dokome, namba pyao kumasepenge akali dupa laitaka pyaapomona” lea. 22 Dopa leamopa, nyakama mona etete kenda kaeyapala, baa tipa pyoo, “Kamongo, doko namba kandao leepe?” lao laa-laa peami. 23 Dopa leaminopa Jisasame yanu pyao, “Nee disanya poeyanyoo nao, apata pilyamano dakenya mendeme, dopa pyaapomo. 24 Akalinya Ikiningi doko kumatana lao, pepa pyapae singi dokonya, dopaka pita-lamo. Dopaka doko, akali enge nyetamo doko, koeyata-lamo. Endangimi baa namandeali, doko yaka jialina” lea. 25 Dopa leamopa, Jisasa enge nyiamo akali Judasa dokome, baa lamaiyoo, “Mana Lenge Akali, embame leeno doko, namba lao leepe?” lea. Dopa leamopa, Jisasame baa lamaiyoo, “Emba tangeme leleno dokoakana” lea.

26 Nyakama nee nao pituu, Jisasame betesa mende nyepala, Gote lao yaka pilino latala konjia. Konjepala baanya disaipolo dupa maiyoo pituu, “Dake nambanya yonge dokona, nyoo nalapa” lea. 27-28 Dopa latala baame kapo waene peteta mende nyepala, Gote lao yaka pilino latala, dokaita maiyoo pituu, “Nambanya taiyoko kaii lelyo dakeme, endakali longo dupa pitakanya, koo dupa kunao nepao, Goteme pii enenge mende lao setekelyamona, nyakama pitakame nyoo nalapa. 29 Nambame nyakama langilyo: Namba dee waene nala naeyaowaka katao, tanga nambanya Takangenya isingi mate dokonya, waene enenge doko nyakama-pipa apata natamana” lea. 30 Dopa lateamopa, dokaitame wee mende latala, kamaka pyakalyetala, Olipimanda peami.

31 Dokopa Jisasame dokaita lamaiyoo, “Goteme dapa lea: 'Sipisipi setao katenge doko pyatopa, sipisipi dupa wakale saa latamina' lao, pii pepa pyapae silyamo. Lapae silyamoliaka pyoo, indupa kuka gii dakepa, kenda pipae namba-kisa ipatamo kandatala, nyakama pitakame namba soo yakinalamino. 32 Dopaka doko, Goteme namba dee sakatasetatamopa, nyakama Galilea paa naeyataminopa, namba wambao patona” lea. 33 Dokopa Pitame Jisasa lamaiyoo, “Disaipolo dupa pitakame emba soo yakinatala pataminopa, nambame emba yakinala naeyatona” lea. 34 Dopa leamopa, Jisasame baa lamaiyoo, “Nambame emba kiningi langilyo: Indupa kuka gii dakenya, yaka pauli pii ene laanya pitamopa, paa tepomasa embame namba nakandengena laapenona” lea. 35 Dopa leamopa, Pitame baa lamaiyoo, “Nambame emba yakinala naeyato. Emba kumateno dokonya namba apataka kumatambana” lea. Dokopa disaipolo yangi dupa pitakame dopaka leami.

36 Dopa lateaminopa, Jisasa baanya disaipolo dupa-pipa, Gesemani ee dokonya peami. Pupala baame dupa lamaiyoo, “Namba omosale loma sala pelyona, nyakama asa pilyepa” lea. 37 Dokopa Jisasa baa mona kenda kaeyapala, Pitapi, Sebedi ikiningi dolapopi laminao umbisale pea. 38 Pupala dutupa lamaiyoo, “Nambanya mona doko etete kenda pipaeme putukupala, kumapenge julumuna, nyakama asa kandao katamana kalyepape” lea. 39 Dopa latala baa kuki umbisale pao, yuunya tombauli sepala, loma soo pituu, “Apane, embame namba-kisa kenda pipae silyamo dake, nyoo nepakapenge jia kandeno doko, nyoo nepakape. Embame namba-kisa kenda pipae silyamo dake, nyoo nepaka lapuliaka doko, nambame masilyo dokonya-kaita napipi. Embame masilino dokonya-kaita pipi” lea. 40 Dopa lao loma sepala ipao kandeamopa, disaipolo dutupa luu palyasiamisa, baame Pita lamaiyoo, “Nyakama aipuma namba-pipa, awa mendai iki dokonya kandao isoo nakatalamipi? 41 Kiningi etete, nyakamanya moname pyuani kaeyapumupa, yongeme papa tambulyamona, makande pingi dupanya nyakama pao koeyatamina, loma soo kandao isoo kalyepape” lea. 42 Dopa latala Jisasa paa lapo pyoo loma sala pea. Loma soo pituu, “Apane, kenda pipae epelyamo dake, namba-kisa epena lao kaeya kandeno doko, embame masilino dokonya-kaita pipi” lea. 43 Loma sepala dee ipao kandeamopa, disaipolo dutupa lemonguti kaeyapala, luu paliu siami. 44 Paliu sina latala, baa paa tepo pyoo loma sala pea. Pupala wamba loma siamo dutupaka sia. 45-46 Loma sepala dee ipao disaipolo dutupa lamaiyoo, “Nyakama mee luaka paliu silyamipi? Namba enge nyipumu akali doko ipatelyamo. Akalinya Ikiningi doko, koo pingi endakali dupa laitaka pyaapomo, gii doko ipatelyamona, mona sakatalapa” lea.

47 Jisasame dopa lao kateamopa, baanya 12 disaipolo dutupanya mende, Judasa lenge doko epea. Epeamo dokonya, endakali kambu andake mende, konja-wua, kolyepepi dupa minao, baa apata epeami. Dupa pitisa mupapi, Judamanya isingi akalipi, dupame pena leaminosa epeami. 48 Jisasa enge nyiamo akali dokome, wambao endakali kambu doko lamaiyoo, “Nambame akali mende nunu pitu dokona, nyakamame baa minatala anjalapape” lea. 49 Dopa lamaitala ipao baa Jisasa kateasa tolao pupala, “Mana Lenge Akali, kuakama!” lea. Dopa latala baa nunu pia. 50 Dopa piamopa, Jisasame baa lamaiyoo, “Kaimia, embame pyaanya epeno doko pipoko” lea. Dokopa endakali kambu dokome, Jisasa minatala anjiami. 51 Anjeteaminopa, Jisasa-pipa apata kateamino dupanya mendeme, baanya konja-wua doko kolanyetala, pitisa mupa dupanya aiyomba dokonya, kalai akali mendenya kale lyanya nepea. 52 Dopa piamopa, Jisasame baa lamaiyoo, “Embanya konja-wua doko palenge andanda dokonya, mandi. Konja-wua miningi dupa, konja-wuameaka kumingi. 53 Nambame nambanya Takangeme, namba nisina lao wii lalu pipupa, baame enjele 72 tausenepi mende, epena lapyalina lao masala naelepe? 54 Namba nisina lapuli doko, kenda pipae dake namba-kisa, dopa pyoo ipupengena lao, pii pepa pyapae singi doko dii manja naeyapyalina,” Jisasame lea. 55 Dopa latala, baame endakali kambu doko lamaiyoo, “Nyakamame pake nenge mende, anjala epele lao konja-wuapi, kolyepepi, dupa minao namba anjala epelyamipi? Nambame koteaka lao lotuu anda andake dokonya, endakali dupa mana lamaiyoo kateo dokopa, nyakamame namba anjala naeyami. 56 Dopaka doko, wamba propeta dupame pii pepa piami dupa, angi jina lao, dutupa pitaka pilyamona” lea. Dokopa disaipolo dupa pitakame Jisasa yakinatala, paka pyakao peami.

57 Dokopa Mosesanya loo mana nyepae akalipi, Judamanya isingi akalipi, dupa pitisa mupa Kaeyapasa kateasa ipao kambu piami. Kambu piamino dokonya, Jisasa anjoo laminao epeami. 58 Dokopa Pita waa katao, maitanya Jisasa watao pea. Pupala pitisa mupa dupanya aiyomba dokonya, anda kamapusa kolamatala, aipa pilyamipi lao kandatoo latala, yanda singi dupa-pipa petea. 59 Pitisa mupapi, kanjole kambuingi andake dokomepi, Jisasa pyao kumasemana latala, akali mendapuame baa-kisa sambo pii setao, kote lena lao kutiami. 60 Dokopa akali longo ipupala, Jisasa-kisa sambo pii setao, kote leami. Dopa leaminoaka doko, baa pyao kumasepenge tenge mende kandao nanyiami. Etao dokonya, akali lapoma ipupala 61 lao pituu, “Akali dakeme, 'Gotenya lotuu anda andake doko, kapa pao lakyepala, yuu gii teponya pituna' leana” leambi. 62 Dokopa pitisa mupa dupanya, aiyomba dokome toeya katapala Jisasa lamaiyoo, “Pii emba-kisa tenge setao lelyambino dake, aipuma yanu napilipi?” lea. 63 Dopa leamoaka doko, Jisasa ema napia. Dopa piamosa, pitisa mupa dupanya aiyomba dokome, dee baa lamaiyoo, “Gote saka katenge dokome kandao kalyamona, embame pii tolao kiningi doko naima langi. Emba Gote Ikiningi, Kraisa dokope?” lea. 64 Dopa leamopa, Jisasame baa lamaiyoo, “Embame leleno dokoakana, nambame nyakama dapa langilyo: Akalinya Ikiningi doko, Gote etete pupu lapae dokonya kingi tolae dokonya pituu, tanga kaitinya kopa tambe-tambe ipatamopa, nyakamame kandatamina” lea. 65 Dopa leamo sepala, pitisa mupa dupanya aiyomba dokome, baa tangenya yonge pee dupa minao lapyepala, lao pituu, “Baame Gote lamba lao pii lelyamo doko, nyakamame sepelyamino. Aipuma endakali mendapuanya pii deaka nyemanape? 66 Nyakamame aipa pimana lao masilyamipi?” lea. Dopa leamopa dupame, “Baa pyao kumasepengena” leami. 67 Dopa latala, baanya lengelyapinya sopokalimi pyapa, kimiame pyapa piami. Dee mendapuame baa kingi kapame pyao pituu, 68 “Emba kini propeta-tamo doko, emba akali dokome pyalumu lao naima langi” leami.

69 Pita anda kamapusa peteamopa, pitisa mupa dupanya aiyomba dokonya, kalai pyakamaiyoo petenge wanaku mendeme ipupala, baa lamaiyoo, “Emba Galilea tange Jisasa dokopa apata katengembana” lea. 70 Dopa leamopa, Pitame endakali kateamino dupanya enombanya tanga lao, “Embame leleno doko namba nakandengena” lea. 71 Dopa latala baa lome kambusa peamopa, kalai wanaku waka mendeme kandatala, endakali dosa kateamino dupa lamaiyoo, “Akali dake Nasarete tange Jisasa dokopa, apata katengembana” lea. 72 Dokopa Pitame deaka tanga lao, “Goteme namba kandao katamupa lelyo. Akali leeno doko nakandenge daana” lea. 73 Gii kuki pateamopa, akali dosa kateamino dupame ipupala, Pita kandao, “Embanya pii dokome panalumuna, kiningi etete emba akali dupanya mendeaka-lamona” leami. 74 Dopa lateaminopa, Pitame lao pituu, “Namba akali doko nakandengena, sambo lato doko, Goteme namba pinana” lea. Dopa lalu piamopa, yaka pauli pii mende lea. 75 “Yaka pauli pii ene laanya pitamopa, embame paa tepomasa, namba nakandengena laapenona,” Jisasame leamo dutupa masetala, Pita kamaka pyakalyetala, putukuo ee lea.