૧ હે ઈશ્વર, તમારા નામે મને બચાવો

અને તમારા પરાક્રમથી મારો ન્યાય કરો.

૨ હે ઈશ્વર, મારી પ્રાર્થના સાંભળો;

મારા મુખની વાતો પર કાન ધરો.

૩ કેમ કે વિદેશીઓ મારી વિરુદ્ધ થયા છે

અને જુલમગારો મારો જીવ લેવા મથે છે;

તેઓએ ઈશ્વરને પોતાની આગળ રાખ્યા નથી.

૪ જુઓ, ઈશ્વર મારા મદદગાર છે;

પ્રભુ જ મારા આત્માના આધાર છે.

૫ તે મારા શત્રુઓને દુષ્ટતાનો બદલો આપશે;

તમારાં સત્ય વચનો પ્રમાણે દુષ્ટોનો નાશ કરો.

૬ હું રાજીખુશીથી મારાં અર્પણો ચઢાવીશ;

હે યહોવાહ, હું તમારા નામની સ્તુતિ કરીશ, કેમ કે તે ઉત્તમ છે.

૭ કેમ કે તેમણે મને સર્વ સંકટમાંથી છોડાવ્યો છે;

મારી ઇચ્છા પ્રમાણે મારા શત્રુઓને થયું, તે મેં નજરે જોયું છે.