1 Nimitzicnelía, TOTECO.

Na niitztoc momaco.

2 TOTECO, ipan ta nimotatía pampa temachti techmaquixtis.

Techyahualojtoc para amo huelis nechajsise nocualancaitacahua.

Ta tinotamanahuijca.

Ipan ta, noTeco Dios, nimotatía,

pampa na niitztoc momaco.

Quena, san ipan ta nimotemachía.

Ta techyahualojtoc para techmocuitahuía.

Ta tieli quej se huejcapantic tepancali cati cuali huan temachti.

Ica ta mochicahualis nitatanis.

3 San monequi nijnotzas TOTECO cati quinamiqui para nijhueyichihuas,

huan yaya nechmanahuis inimaco nochi nocualancaitacahua.

4 Eltoya quej nechpixtoya imaco miquilisti.

Nochi cati fiero cati onca ipan ni taltipacti nechtanisnequiyaya.

5 Nopa mijca ostot nechtaquechilijtoya hasta ayecmo nijpixqui fuerza.

San se quentzi más huan nimiquisquía.

6 Pero quema más nimotequipachohuayaya,

nijnotzqui TOTECO.

Nijtajtani ma nechpalehui noTeco Dios.

Huan yaya nechtacaquili hasta nepa ipan ilhuicac.

Quena, quichihuili cuenta cati niquilhui.

7 Huajca chicahuac mohuiso tali hasta momajmatijque nochi tepeme.

Moojolinijque nopa tepeme hasta campa tatzquitoque,

huan mohuihuixojque pampa Toteco Dios cualanqui.

8 Elqui quej quisayaya pocti ipan iyacatzol,

huan ipan icamac quisayaya se tit cati nochi quitamitatiyaya,

huan nochi quisosolohuayaya.

Quena, quimajcahuayaya ticoli xaxahuacatoc pampa nelcualanqui.

9 Pampa Toteco Dios quitapo nopa cortina ten ilhuicac,

huan temoc para nechpalehuis.

Nejnentihualayaya ipan miyac mixti cati nelyayahuic.

10 Toteco Dios tejcoc ipan ieltapal se iilhuicac ejca cati itoca querubín,

huan patantihualajqui ipan ajacat.

11 Yaya motzajqui ica tzintayohuilot,

huan moyahualo ica at para amo aqui quiitas.

12 Tapetanilot quiyacantihualajqui quema ajsico yaya cati tahuel cahuani.

Huan nojquiya huetzqui tesihuit huan ticoli xaxahuacatoc.

13 TOTECO quichijqui ma quicaquica itoscac quej se tatomonilot cati quisqui ilhuicac.

Quena, Toteco Cati Más Hueyi tahuejchijqui.

¡Tahuel miyac tesihuit huan ticoli xaxahuacatoc huetzqui!

14 Quimajcajqui cuataminti ma quinajsi nochi nocualancaitacahua,

huan inijuanti cholojtejque.

TOTECO quintzohuitejqui ica se hueyi tapetanilot huan quintzontamilti.

15 Quema TOTECO tailpitzqui,

nochi nopa at ipan hueyi at san sejco momanqui hasta nesqui nochi nopa tali cati mocahua atatzinta campa más tahuejcata.

Ica icamanal TOTECO mopanexti itzinpehualtil taltipacti, pampa yaya cualanqui.

16 Huan TOTECO quicalaqui imax hasta campa más huejcata,

huan nechquixti ten nopa hueyi at.

17 Nechmaquixti inimaco nocualancaitacahua cati quipiyayayaj miyac chicahualisti.

Quena, nechmanahui ten nocualancaitacahua cati más quipiyayayaj chicahualisti que na.

18 Inijuanti nechtanque ica na quema amo nijpixqui fuerza,

pero TOTECO nechtananqui.

19 Nechquixti huan nechsehui campa amo mahuilili.

Nechmanahui pampa nechicnelía.

20 TOTECO nechmacatoc cati quinamiqui pampa nijchijtoc cati xitahuac.

Nechtaxtahuijtoc pampa cuali nonemilis.

21 Nijtoquilijtoc iojhui TOTECO huan amo nimoiyocacajtoc ten ya.

22 Niquelnamictoc nochi icamanal huan amo quema nijcajtejtoc itanahuatil.

23 Xitahuac niitztoc iixpa.

Nimoiyocatalijtoc ten nochi cati fiero.

24 Huan TOTECO nechtaxtahuijtoc quej quinamiqui ica cati cuali nijchijtoc,

pampa quiitztoc para cuali nonemilis iixpa.

25 TOTECO, tiquinicnelía huan tiitztoc temachti ica cati teicnelíaj huan cati temachme.

Tiitztoc cuali ica cati quihuejcacahua tajtacoli.

26 Tiquintiochihua cati tetiochihuaj,

pero timochihua titetic ica inijuanti cati mosisiníaj.

27 Tiquinmaquixtía cati moechcapanohuaj,

pero tiquinpinahualtía cati mohueyimatij.

28 TOTECO, ta cati tinoDios,

ta techmaca taahuili.

Ta tijcuectoc nopa tzintayohuilot campa niitztoc ica taahuili.

29 Ica mochicahualis, noTeco Dios,

niquintehuis nocualancaitacahua,

huan nipanos iixco nopa tepamit cati ica quitzactoque inialtepe.

30 Iojhui Toteco Dios nelía xitahuac.

Huan icamanal cati quitencahua,

cuali para ipan timotemachise.

TOTECO quinmanahuía nochi cati ipan ya motemachíaj.

31 Amo cana aqui seyoc Dios quej TOTECO.

Amo aqui seyoc cati huelis ipan timotemachise huan techmanahuis.

32 Toteco Dios nechmaca chicahualisti,

huan nechchihualtía ma ninejnemi xitahuac.

33 Yaya nechfuerzajmaca para amo ma nihuetzi.

Noicxihua mochihuaj temachti quej iicxihua se chivo quema moquetzaj campa tahuejcapa huan talxixitaca.

34 Toteco Dios nechmachtía taya ma nijchihuas quema onca tatehuilisti.

Nechfuerzajmaca para cuali ma niquitzqui nopa tetic tepos huitoli cati quichijtoque ica bronce.

35 Toteco Dios, ta techmanahuía huan techmaquixtía.

Techitzqui ica monejmat.

Ica mohueyi teicnelijcayo techhueyichijtoc.

36 Tijchijtoc noojhui más patahuac para ma amo nihuetzis.

37 Niquintepotztocac nocualancaitacahua huan niquinajsito.

Huan amo nimocuetqui hasta quema niquintzontamiltijtoya.

38 Niquinhuejhuelo huan ayecmo quema motananase.

Huetzque noicxita.

39 Toteco Dios, ta techfuerzajmacac ipan nopa tatehuilisti huan tijchijqui para nocualancaitacahua ma motancuaquetzaquij noixpa.

40 Miyaqui moicancuetque para cholojtehuase huan quej nopa huelqui niquintzontamilti.

41 Inijuanti tetzajtzilijque para ma quinpalehuiquij,

pero amo aqui huelqui quinpalehui.

Quinotzque TOTECO,

pero yaya amo quinnanquili.

42 Quej se quitisi talcuajnexti huan quihuica ajacat,

na quej nopa niquinchijqui.

Huan ininpa nimoquejquetzqui quej soquit ipan ojti.

43 TOTECO nechmanahuijtoc ten nopa sequinoc altepet ehuani cati mosisiníaj huan quinequiyayaj nechtehuise.

Yaya nechchijtoc ma nieli niinintayacanca masehualme cati campa hueli ehuani.

Masehualme cati amo niquinixmatiyaya hualahuij para nechtequipanose.

44 Quema quicaquij nocamanal,

inijuanti nechneltoquilíaj.

Cati ehuani ipan sequinoc altepeme huihuipicaj noixpa.

45 Nochi motemacaj noixpa huan huihuipicatiyahuij quema quisaj campa motatijtoque.

46 Itztoc TOTECO.

Nijpaquilismacas yaya cati nechmocuitahuía.

Ma tijhueyitalica Toteco Dios,

notemaquixtijca.

47 Yaya nopa Dios cati momacuepa ica cati fiero inijuanti cati nechcocojtoque.

Quintalijtoc masehualme ipan miyac tali nomaco para ma niquinnahuati.

48 Yaya nechmanahuía ten nocualancaitacahua huan nechhueyitalía iniixpa cati nechcualancaitaj.

TOTECO, ta techmaquixtijtoc inimaco nopa tatehuijca masehualme,

49 yeca nitepohuilis ten ta campa hueli.

Nihuicas huan nijhueyitalis motoca.

50 Miyac huelta tijchijtoc para ma nitatani, na niDavid,

ninopa nitanahuatijquet cati techtapejpenijtoc.

Tijpiya hueyi moyolo ica na cati techtalijtoc ma nitanahuati.

Quena, hueyi moyolo ica na huan tijpiyas hueyi moyolo para nochipa ica noixhuihua.