1 Ilhuicacti tepohuilía ihueyitilis Toteco Dios.

Tanemijya technextilía cati pano cuajcualtzi yaya hueli quisencahua.

2 Quena, tonaya huan tayohua ilhuicacti quisenhuiquilía tepohuilía para tahuel hueyi italnamiquilis.

3 Masque amo teno caquisti huan amo tijcaquij yon se camanali,

nochi masehualme campa hueli quiitaj iyejyejca ilhuicacti huan quimachilíaj cati techpohuilía.

4 Eltoc quej ilhuicacti quipiya itoscac cati ajsi hasta campa ontantoc taltipacti,

huan teyolmelahua para itztoc Toteco Dios.

Ipan ilhuicacti yaya quiquetzqui ichaj tonati.

5 Huan tonati quisa mojmosta huan yahui ipan iojhui ica paquilisti quej se telpocat quisa ipan ichaj para mosihuajtiti.

Quena, nopa tonati mochihua quej se motalojquet cati paqui motalohua pampa quimati quintanis ne sequinoc.

6 Tonati quisa ilhuicacti inacasta huan quimaca huelta hasta ne seyoc inacasta.

Amo aqui huelis motatis para amo quitonalmictis.

7 Ileyes TOTECO eltoc senquisa cuali,

huan temaca yancuic nemilisti.

Huelis timotemachise ipan icamanal,

pampa ya nopa quichihua ma talnamiqui se masehuali cati moechcapanohua.

8 Itanahuatilhua TOTECO eltoc melahuac huan xitahuac.

Quinmaca paquilisti masehualme ipan iniyolo.

Quena, sesen tamanti cati TOTECO techilhuijtoc ma tijchihuaca eltoc quej se taahuili cati chicahuac.

Quitaahuilía toojhui para tiquitase.

9 Senquisa cuali para ma tijtepanitaca TOTECO huan ma tiquimacasica para tiquixpanose.

Elis cuali para nochipa.

Cati TOTECO quiijtojtoc para ma tijchihuaca,

ya nopa melahuac.

Quena, ya nopa temachti.

10 Noja más nijpatiita que oro.

Quena, noja más cuali que miyac oro cati senquisa cuali.

Quema se masehuali quiselía Icamanal Toteco ipan iyolo,

eltoc más tzopelic que se sayolnecti cati yancuic quipatzcatoque.

11 Nopa tanahuatilme nechmacaj talnamiquilisti, na niitequipanojca,

para amo ma nitajtacolchihua.

Cati quintoquilía itanahuatilhua TOTECO hueyi quitanis.

12 Amo aqui momaca cuenta ten itaixpanolhua sese huelta quema quichihua cati amo cuali.

TOTECO, techtapojpolhui notajtacolhua cati amo nijmatiyaya sinta nijchijtoya.

13 Huan techpalehui para amo nimohueyimatis,

huan para amo quema ma nitajtacolchihua ica nopaquilis.

¡Amo! Amo xijcahua tajtacoli ma nechnahuati.

Quej nopa nielis se masehuali cati amo aqui huelis nechtelhuis ica yon se tamanti.

Huan niitztos nitatzejtzeloltic.

14 Ma mitzpacti cati niquijtohua huan cati nimoilhuía, TOTECO,

ta tinotamanahuijca huan tinotemaquixtijca.